Matayo 23 - Baibuli Ekibono kya Katonda 2014

Okwekuuma Abanamateeka n'Abafarisaayo

¹ Agho Yesu yaayogera eri ebiyindi eby'abantu n'Abeegeresebwa be.

² Yaakoba ati: “Abanamateeka n'Abafarisaayo n'abatyama ku kityamo kya Musa.

³ Kale byonabyona bye bakoba mubikole era mubigeme, aye mutakola bye bakola, kuba bye bakoba ti bye bakola.

⁴ Basiba emigugu emizito, egiteetwikika baagitwika abantu, ate nga beene tibenda na kugigemaku.

⁵ Era mu byonabyona bye bakola benda abantu bababone, kuba bagaziya fulakiteria dhaibwe, baaleeya amadhwenge ag'ebivaalo byaibwe.

⁶ Bagonza okuba mu bifo eby'ekitiisa ku mbaga, era ni mu sinagoga bagonza ebifo ebisinga bukalamu

⁷ okulamusibwa mu biya, n'abantu okubeeta bati, ‘Mwegeresa.’

⁸ “Aye imwe batabeetanga bati, ‘Mwegeresa,’ kuba muli n'omwegeresa mulala ate mwenamwena muli baluganda.

⁹ Era ku nsi kuno mutabanga na muntu ye mweta ‘Lata’, kuba Iseimwe ali mulala, ali mu igulu.

¹⁰ Waire imwe okwetebwa abalanzi kuba omulanzi waimwe ali mulala, ni Kurisito.

¹¹ Asinga obukulu mu imwe ali n'okuba mugheereza waimwe.

¹² Oyo eyeetwala okuba owa ghaigulu aliisibwa ghansi, ate eyeisa ghansi alitwalibwa okuba owa ghaigulu.

¹³ “Mukagwireku Abanamateeka n'Abafarisaayo abakuusa imwe, kuba mwigaliragho abantu Obwakyabazinga obw'omu igulu kuba imwe beene timungira waire okuganha abenda okwingira.” [

¹⁴ “Mukagwireku Abanamateeka n'Abafarisaayo, abakuusa imwe, mukaavuula eby'omu ndhu dha banamwandu, ate mwasaba esaala edhitakutuka nga mwenda okweraga. Kale ekibonerezo kyaimwe kikakali.]

¹⁵ “Mukagwireku Abanamateeka n'Abafarisaayo, abakuusa imwe, kuba mubunia ebifo eby'oku nhandha ni ku bukalu, okufunayo omuntu omulala ye mukyusa ate bwe mumala okumufuna, mwamufuula agwanira geyeena emikuzi ebiri okubasinga.

¹⁶ “Mukagwireku imwe, abakulembera abandi nga muli batulu. Mukoba muti, ‘Alayira mu liina ery'eisinzizo ekirayiro tikimusiba, aye alayira mu zaabu ow'eisinzizo asibwa ekirayiro kye.’

¹⁷ Muli basiru ate abatulu einho. Kiki ekisinga, zaabu oba eisinzizo eritukuza zaabu?

¹⁸ Era mukoba muti, ‘Ole bw'alayira mu alutaari, ekirayiro tikimusiba, aye yeenayeena alayira mu kirabo ekiri ku alutaari asibwa ekirayiro kye.’

¹⁹ Abatulu imwe, kiki ekisinga, ekirabo oba alutaari etukuza ekirabo ekyo?

²⁰ Kale ni ole alayira alutaari, alayira mu alutaari n'ebyo byonabyona ebigiriku.

²¹ Era n'oyo alayira mu isinzizo, alayira mu isinzizo ni mu Katonda oyo aba mu isinzizo eryo.

²² Ate alayira mu igulu, alayira mu kityamo kya Katonda ni mu Katonda akityamaku.

²³ “Mukagwireku Abanamateeka n'Abafarisaayo, abakuusa imwe, kuba mughaayo ekitundu kirala kirala ku buli bitundu ikumi eky'obuwoowo obuwoomesa eiva, nga buno: eduosimo, anetho, ni kumino. Aye mwaleka ebisinga obukulu ebiri mu Mateeka, bino: Okukolera banaimwe ebibagwaniire, ekisa, n'okwikiriza. Ebyo mugwaine okubikola ate ni bire obutabireka.

²⁴ Imwe abakulemberamu abandi nga muli batulu, musengeedha ensowera egwire mu maadhi ge muja okunhwa, aye ate mwamira engamiya enamba!

²⁵ “Mukagwireku Abanamateeka n'Abafarisaayo, abakuusa imwe, ebikopo n'esowaani mubinhiriza ku ngulu ate nga munda mwidhwire bukambuzi na bya mulyakubi.

²⁶ Mufarisaayo iwe omutulu, sooka onaaze munda mu kikopo, memale onhirize ni ku ngulu.

²⁷ “Mukagwireku Abanamateeka n'Abafarisaayo, abakuusa imwe, kuba mufaanana ng'amagombe ge basiizeeku langi endheru obulungi, nga gaboneka bulungi ku ngulu, aye nga munda gaidhwire magumba ga bafu na buli kivundu kyonakyona.

²⁸ Mutyo mwena bwe muli: Ku ngulu mufaanana ng'abantu abatuukirivu, aye munda mwidhwire buguya na budheemu.

²⁹ “Mukagwireku Abanamateeka n'Abafarisaayo abakuusa imwe, kuba muzimba amagombe g'abalanzi, mwatimba ebiidhukizo eby'abatuukirivu,

³⁰ era mwakoba muti, ‘Nguli twaligho mu biseera bya badhaadha titwandyeyimbye nabo mu kuyugha musaayi gwa balanzi.’

³¹ Kale mutyo beene mwakakasa muti muli baana b'abo abaita abalanzi.

³² Kale ni mumalirize badhaadha baimwe kye batoolera.

³³ “Imwe emisota, abaana ab'emisota egy'obusagwa! Muliwona mutya okusalirwa omusango gwa geyeena?

³⁴ Kale ndidha kubatumira abalanzi, n'abasaadha abagezi n'abeegeresa abandi mulibaita, mwabakomerera ku misalaba, abandi mulibakuba enkoba mu sinagoga dhaimwe, era mwabakiriga mu buli kibuga.

³⁵ Agho ni mulibaaku omusango olw'omusaayi ogw'abatuufu ogwayuyibwa mu nsi, okuva ku musaayi gwa Abeli ataali na musango okutuuka ku musaayi gwa Zekaria omwana wa Berakia ye mwaitira ghagati gh'eisinzizo n'alutaari.

³⁶ Bwenebwene, ka mbakobere: Bino byonabyona biribaagho ku bantu ab'oluse luno.

Enaku egema Yesu olwa Yerusalemu

³⁷ “Yerusalemu, Yerusalemu iwe aita abalanzi, n'okuba abatumiibwa y'oli amabaale! Emikuzi emeka gye nayenda okusoloza abaana bo aghalala ng'enkoko bw'esoloza obwana bwayo mu maghagha, aye nga tonganha?

³⁸ Kale ni endhu yaimwe yaakulekebwa agho ebe kifulukwa,

³⁹ kuba ka mbakobere: Timuliirayo kumbona okutuusa lwe mulikoba muti, ‘Wa nkabi oyo aidha mu liina lya Musengwa.’ ”