Matayo 22 - Baibuli Ekibono kya Katonda 2014

Olufumo olw'embaga ey'obufumbo

¹ Agho kabiri Yesu yaayongera okubeegeresa mu nfumo, yaakoba ati:

² “Obwakyabazinga obw'omu igulu bufaananizibwa ng'oti ni kyabazinga eyategekera mutabane embaga ey'obufumbo.

³ Yaatuma abagheereza be okuja okunona abaayetebwa ku mbaga, aye baaloba okwidha.

⁴ Kabiri yaatuma abagheereza abandi yaabakoba ati, ‘Mukobe abaayetebwa muti, embaga etuuse, mmaze okwita ente endaagho n'ente entototo empiite, era mmaze okutegeka buli kintu baidhe ku mbaga.’

⁵ Aye era tibaafaayo beetambulira ku dhaibwe, omulala yaaja ku bya kibandha kye, owundi yaaja mu bya kutunda.

⁶ Abaasigalagho baagema abagheereza baababisa bubi era baabaita.

⁷ Kyabazinga yaanakughala, yaasindika amagye ge gaazikiriza abaisi abo era gaayokya n'ekibuga kyaibwe.

⁸ Agho yaakoba abagheereza be ati, ‘Kituufu embaga ewoire okutegeka, aye ababaire beeteibwa ti n'abaali bagwaine.

⁹ Kale ni muje eyo mu maagaanana, be munaayagaana boonaboona mubeete ku mbaga.’

¹⁰ Agho abagheereza baaja eyo mu maagaanana baasoloza buli ye baayagaana, abalungi n'ababi, era ekisenge eky'embaga kyaidhula abageni.

¹¹ “Agho kyabazinga bwe yangira okulamusa ku bageni yaayagaanamu omuntu atavaire kivaalo kya ku mbaga.

¹² Yaamukoba ati, ‘Muna, ongire otya muno ng'ozira kivaalo kya ku mbaga?’ Ole yaabuudhaala bubuudhaale.

¹³ Agho kyabazinga yaakoba abagheereza ati, ‘Mumusibe amakono n'amagulu mumusuule ku luya mu kizikiiza eri okugegenga n'okuluma emba olw'obulumi obubitirivu.’

¹⁴ “Abantu kamaala abeetebwa, aye batono abalondebwa.”

Okugha omusolo gwa Kaisari

¹⁵ Agho Abafarisaayo baaja beekobaana engeri ye baghanga okumuleba mu by'ayogera.

¹⁶ Baamutumira abeegeresebwa baibwe, ni baine ba Herode, baakoba bati: “Mwegeresa twidhi oli wa mazima era oyegeresa mu mazima engira ya Katonda, ozira ye weeguya, kuba tojiira ku mboneka ya bantu.

¹⁷ Kale tukobere, odhuuba otya? Kiikirizibwa okugha Kaisari omusolo oba bbe?”

¹⁸ Yesu bwe yamanha olukwe lwaibwe yaabakoba ati: “Bakuusa imwe, lwaki mundeba?

¹⁹ Mundage ku mpiiya dhe bagha omusolo.” Baamuleetera edinari.

²⁰ Yaabakoba ati: “Kino ekifaananie ni bino ebighandiiko ebiriku by'ani?”

²¹ Baakoba bati: “Bya Kaisari.” Agho yaabakoba ati: “Kale ni ebya Kaisari mubiirize Kaisari n'ebya Katonda mubiirize Katonda.”

²² Olwawulira ekyo beewuunhia inho, era baamuleka baaja.

Ebigema ku kuzuukira

²³ Ku lunaku lwene olwo, Abasaddukaayo, abakoba bati ezira kuzuukira, baaseeta aghaali Yesu, baamubuuza bati:

²⁴ “Mwegeresa, Musa yakoba ati, ‘Omusaadha bw'afanga ng'azira mwana, muganda w'omufu atwalanga namwandu oyo yaafunira muganda we eizaire.’

²⁵ Kale ni ghaaligho aboluganda musanvu ewaife eyo, omuberi yaabayiza, yaafa nga talese izaire, era omukazi yaamulekera muke we.

²⁶ Kyaba kityo ku wokubiri, ni ku wokusatu, okutuusa ku womusanvu.

²⁷ Olumaliira lwa boonaboona okufa, omukazi yeena yaafa.

²⁸ Kale ni ku lw'okuzuukira aliba muka ani ku abo omusanvu? Kuba boonaboona baamubayizaaku.”

²⁹ Yesu yaabairamu ati: “Mughaba inho olw'obutamanha Byaghandiikibwa, waire okumanha amaani ga Katonda

³⁰ kuba ku lw'okuzuukira ezira kubayiza waire kubayira, aye baliba nga bamalaika mu igulu bwe bali.

³¹ Aye ebigema ku kuzuukira okw'abafu, timusomangaku Katonda kye yabakoba, bwe yakoba ati:

³² ‘Ninze Katonda wa Aburahamu, Katonda wa Isaaka, Katonda wa Yakobo?’ Ti Katonda wa bafu aye Katonda wa balamu.”

³³ Ebiyindi eby'abantu bwe baawulira ebyo baayasaamirira olw'endhegeresa ye.

Ekiragiro ekisinga

³⁴ Abafarisaayo bwe baawulira bati Yesu asiriisa Abasaddukaayo, beesoloza.

³⁵ Era mulala ku abo, nga Munamateeka, yaamubuuza ng'amuleba ati:

³⁶ “Mwegeresa kiragiro ki ekisinga mu Mateeka?”

³⁷ Yesu yaamukoba ati: “ ‘Ogonzanga Musengwa Katonda wo n'omutima gwo gwonagwona, n'omwoyo gwo gwonagwona, n'okutegeera kwo kwonakwona.’

³⁸ Kino n'ekiragiro ekisooka era ekisinga.

³⁹ Ekyokubiri kifaanana ng'oti n'ekyo: ‘Ogonzanga muntu mwino nga bwe weegonza mwene.’

⁴⁰ Mu biragiro bino ebibiri n'omuva Amateeka goonagoona n'eby'abalanzi.”

Kurisito mwidhukulu wa Daudi

⁴¹ Agho Abafarisaayo bwe baali nga bakeesololeiza ghalala, Yesu yaababuuza

⁴² ati: “Mudhuuba mutya ku Kurisito? Mwana w'ani?” Baamukoba bati: “Wa Daudi.”

⁴³ Yesu yaabakoba ati: “Memale lwaki Daudi ng'aidhuziibwa Mwoyo, amweta ‘Musengwa’ ng'akoba ati,

⁴⁴ ‘Musengwa yakoba Musengwa wange ati: Tyama ku mukono gwange omusaadha, okutuusa bwe ndita abazigu bo ghansi gh'ebigere byo’

⁴⁵ Agho ni oba Daudi amweta ‘Musengwa’, kabiri aba atya mwidhukulu we?”

⁴⁶ Tighaaba amwiramu kibono, era okuva ku olwo tighaaba akana kwongera kumubuuza.