Matayo 20 - Baibuli Ekibono kya Katonda 2014

Abakozi ab'omu isamba ery'emizabbibu

¹ “Kuba Obwakyabazinga obw'omu igulu bufaanana ng'oti ni mwene ghaka eyawuuna okuta abakozi mu isamba lye ery'emizabbibu.

² Ng'amaze okwisania n'abakozi okubagha dinari ndala buli lunaku, yaabasindika mu isamba lye ery'emizabbibu.

³ Yaafuluma ku saawa eyokusatu yaabona abandi nga beemereire agho mu kiya nga bazira kye bakola.

⁴ Era abo yaabakoba ati: Mwena muje mu isamba lyange ery'emizabbibu, ndidha kubagha ekyo ekinaabagwanira.”

⁵ Era baaja. Kabiri yaafuluma ku saawa eyomukaaga, n'eyomwenda yaakola n'ekirala.

⁶ Era ni ku saawa oti ikumi na ndala yaafuluma, yaayagaana abandi abeemereire, yaabakoba ati: “Lwaki mwemereire ghano olunaku lwonalwona nga muzira kye mukola?”

⁷ Baamukoba bati: “Kuba ghazira atughaire kya kumukolera.” Yaabakoba ati: “Mwena muje mu isamba ery'emizabbibu.”

⁸ Eigulo bwe bweryatuuka, mwene isamba ery'emizabbibu yaakoba omusaadha we akozesa abakozi ati: “Yeta abakozi obasasule enkemba ng'otoolera n'abasembyeyo okwidha, okutuuka ku basoose.”

⁹ Ab'esaawa eikumi nga n'endala baatuuka, baafuna dinari ndala buli muntu.

¹⁰ Abaasooka bwe baatuuka baadhuuba nga baakufuna ekisingagho aye boona baafuna dinari ndala buli muntu.

¹¹ Olwagifuna beemuluguunhiza mwene ghaka bati:

¹² “Bano abasembyeyo okwidha bakoleire bwa saawa ndala, aye mbo waabaazayaza n'ife abakoze olunaku lwonalwona nga n'omusana gutumamula?”

¹³ “Aye mwene ghaka yaakobaku mulala ati, ‘Muna tikuseire. Titwaisainia n'iwe kukolera dinari ndala?

¹⁴ Gema ekikyo weejiire nze nhenze okugha ono asembyeyo okwidha ng'oti niiwe bwe nkughaire.

¹⁵ Ghaligho ekindobera okukozesa ebyange nga bwe nhenda? Oba, nze okuba omulungi n'okuuninga ekimodi?’

¹⁶ “Kale ab'ensembo batyo bwe baliba ab'emberi ate n'ab'emberi baaba ab'ensembo.”

Yesu ayogera ku kufa kwe omukuzi ogwokusatu

¹⁷ Agho Yesu bwe yali ng'ali kumpi okuniinaniina e Yerusalemu, yaatoola Abeegeresebwa Eikumi n'Ababiri yaabaiza embali mu kyama, era mu ngira yaabakoba ati:

¹⁸ “Bona eno, buti tuli kuniinaniina e Yerusalemu, Omwana w'Omuntu aidha kugheebwayo mu Bakabona Abakulu n'Abanamateeka bamusalire ogw'okufa.

¹⁹ Era balimughaayo mu bamaghanga agandi, baamukiina, baamukuba enkoba, baamukomerera ni ku musalaba aye ku lunaku olwokusatu alizuukira.”

Okusaba kwa inhina w'abaana ba Zebedaayo

²⁰ Agho inhina w'abaana ba Zebedaayo yaaseeta Yesu gh'ali, n'abaana be, yaakuba amakiryaivu yaabaaku ni ky'amusaba.

²¹ Yesu yaamukoba ati: “Oyenda ki?” Yaamukoba ati: “Koba abaana bange bano bombi batyame, omulala ku mukono gwo omusaadha ate owundi ku mugooda, mu Bwakyabazinga bwo.”

²² Yesu yairamu ati: “Kye musaba timukiidhi. Mughanga okunhwa ku kikopo kye nja okunhwa?” Baamukoba bati: “Tughanga.”

²³ Yaabakoba ati: “N'agh'agho, ekikopo kyange mulikinhwaku, aye eky'okutyama ku mukono gwange omusaadha ni ku mugooda, kino ti kyange okukibagha, aye kirigheebwa abo Lata wange be yakitegekera.”

²⁴ Abandi eikumi bwe baakiwulira, baasungughalira aboluganda bano ababiri.

²⁵ Agho Yesu yaabeeta y'ali, yaakoba ati: “Mwidhi ng'abafuzi abamaghanga agandi bagafuga, era n'abakulu baibwe baba n'obuyinza ku banaibwe.

²⁶ Kityo ti bwekiri mu imwe. Yeenayeena ayenda okuba omukulu mu imwe abe mugheereza waimwe,

²⁷ era buli ayenda kuba asooka mu imwe, abe mwiru waimwe.

²⁸ Ng'Omwana w'Omuntu bw'ataidha kugheerezebwa aye okugheereza, n'okughaayo obulamu bwe olw'okununula abantu kamaala.”

Yesu awonia abatulu babiri

²⁹ Baava e Yeriko, eikuukuubira ery'abantu lyamunonereza.

³⁰ Ghaabaagho abatulu babiri abaali batyaime embali ku luguudo, kale olwawulira bati Yesu ali kubita agho, baayasiikana nga bakoba bati: “Musengwa, mwidhukulu wa Daudi tusaasire!”

³¹ Abantu kamaala mu ikuukuubira baabadhuuka nga babakoba basirike aye abatulu baayongera bwa kwasiikana bati: “Musengwa, mwidhukulu wa Daudi, tusaasire!”

³² Agho Yesu yaayemerera, yaabeeta, yaakoba ati: “Mwenda mbakolere ki?”

³³ Baamukoba bati: “Musengwa tuzibule amaiso.”

³⁴ Yesu ekisa kyamugema, yaabagema ku maiso era mangu ago baaghanga okubona era baamunonereza.