Matayo 2 - Baibuli Ekibono kya Katonda 2014

Abasaadha abaava e buvandhuba

¹ Agho Yesu bwe yazaalibwa e Bethelehemu mu Buyudaaya, mu byanda bya kyabazinga Herode, ghaabaagho abakugu mu by'emuunienie abaava e buvandhuba baatuuka mu Yerusalemu.

² Baakoba bati: “Ali gha oyo azaaliibwa okuba kyabazinga ow'Abayudaaya? Kuba tuboine emuunienie y'e buvandhuba era n'okwidha tumusinze.”

³ Olwawulira bino, kyabazinga Herode ni Yerusalemu yoonayoona baatabulwa.

⁴ Agho Herode yaasoloza Bakabona Abakulu boonaboona n'Abanamateeka ab'eighanga yaababuuza gha Kurisito ye yali ow'okuzaalibwa.

⁵ Baamukoba bati: “Mu Bethelehemu eky'e Buyudaaya kuba kyaghandiikibwa omulanzi kiti:

⁶ ‘Iwe Bethelehemu mu nsi ya Yuda, toli mutene mu bwami obw'omu Yuda, kuba mu iwe n'omwidha okusimuka omufuzi, anaalabirira abantu bange Abaisiraeli.’ ”

⁷ Agho ni Herode yaayeta abasaadha mu kyama yaababuuza ku biseera emuunienie bye yabonekeramu.

⁸ Yaabatuma e Bethelehemu ng'akoba ati: “Muje mwagale bukalamu omwana oyo, era bwe mumuzuula muntemyaku zeena nsobole okwidha okumusinza.”

⁹ Olwamala okuwulira ebya kyabazinga baasimbula, aye okuja okubona nga muunienie ye baabona e buvandhuba ebakulembeiremu okutuusa bwe yatuuka n'eyemerera ghaigulu gh'ekigo aghaali omwana.

¹⁰ Bwe baabona emuunienie baasangaala ekibitiriire.

¹¹ Agho baingira mu ndhu, baabona omwana ghalala n'inhina Maria, beeyala ku itaka baamusinza era baasibulula ebitereke byaibwe baamugha ebirabo: Zaabu, obubbaani ni mirra.

¹² Era nga bwe baalabulwa mu kirooto obutaira wa Herode, baagema engira eyindi okuja mu nsi ey'ewaibwe.

Okulumukira e Misiri

¹³ Agho ng'abo baakavaagho, malaika wa Musengwa yaabonekera Yosefu mu kirooto yaamukoba ati: “Situka otoole omwana n'inhina mulumukire e Misiri, era musigale eyo okutuusa lwe ndiba ni kye nkukoba, kuba Herode aja kunoonia omwana okumwita.”

¹⁴ Agho Yosefu yaasituka yaagema ku mwana n'inhina obwire obwo baaja e Misiri

¹⁵ era baasigala eyo okutuusa Herode bwe yafa. Kyali kityo okutuukiriza Musengwa kye yayogerera mu mulanzi ati: “Nayeta omwana wange ave mu Misiri.”

Okwita abaana abato

¹⁶ Agho Herode bwe yategeera nga bamutebwike, yaasungughala ekibitiriire era yaalagira okwita abaana abalenzi boonaboona ab'emyaka ebiri n'okwika ghansi abaali mu Bethelehemu n'ebiketezo ebikiriinaine, okusinziira ku biseera bye yali amaze okukakasa obukalamu n'abasaadha bale.

¹⁷ Kityo ni kyatuukirira omulanzi Yeremia kye yakoba ati:

¹⁸ “Mu Rama yaawulikikayo amamiro ag'okugegenga n'okukuba empungu edh'amaani. Rakeli ng'agegenga olw'abaana be, era nga tayenda na kusaasirwa, kuba baali nga tibakaaligho.”

Okuva e Misiri

¹⁹ Agho Herode bwe yamala okufa, malaika wa Musengwa yaabonekera Yosefu mu kirooto, e Misiri.

²⁰ Yaamukoba ati: “Situka ogeme ku mwana n'inhina muje mu nsi ya Isiraeli, kuba abaali banoonia okwita omwana bamaze okufa.”

²¹ Agho Yosefu yaasituka yaagema ku mwana n'inhina yaaja mu nsi ya Isiraeli.

²² Aye bwe yawulira ati Arikelao n'eyali afuga Buyudaaya ng'omusika wa Herode, yaatya okuja eyo. Era bwe yalabulwa mu kirooto yaaja mu biketezo eby'e Galilaaya.

²³ Era bwe yatuuka yaatyama mu kibuga ekyetebwa Nazarethi kyatuukirira kityo ekyayogerwa abalanzi kiti: “Alyetebwa Munazarethi.”