Matayo 19 - Baibuli Ekibono kya Katonda 2014

Okwegeresa ku bufumbo

¹ Mperaano Yesu bwe yamala okwogera ebyo, yaava e Galilaaya yaaja mu biketezo eby'e Buyudaaya, ng'osomoike Yorudani.

² Abantu lukunkumuli baamunonereza era yaabawoneza eyo.

³ Agho Abafarisaayo baaseeta gh'ali, baamuleba nga bakoba bati: “Kiikirizibwa omusaadha okubinga mukazi we ng'amulanga ensonga yoonayoona?”

⁴ Yesu yaakoba ati: “Timusomangaku muti, ‘Okuviira irala mu mainhama, omutonzi yakola omusaadha n'omukazi?’

⁵ Yaabakoba ati, ‘N'olw'ensonga eyo kyova omuntu alekanga ise n'inhina yeeyimba ghalala ni mukazi we, ababiri baafuuka omuntu mulala’

⁶ nga tibakaali babiri, aye muntu mulala. Agho ni Katonda kye yayimba omuntu atakiyimbululanga.”

⁷ Baamukoba bati: “Memale lwaki Musa yalagira okukola embaluwa emubinga era n'okumusiibula?”

⁸ Yesu yaabakoba ati: “Musa yabaganha okubinga bakazi baimwe olw'okuba muli ba nkandya, aye nga okuva mu mainhama kityo ti bwe kyali.

⁹ Aye ka mbakobere: Oyo yeenayeena abinga mukazi we, okutoolaku nga lwa bwenzi, memale n'abayiza owundi, oyo aba ayenze.”

¹⁰ Abeegeresebwa baamukoba bati: “Oba nga ensonga dhityo bwe dhiri ku musaadha ni ku mukazi we ekisinga n'obutabayiza.”

¹¹ Yesu yaabakoba ati: “Ti kiri nti abantu boonaboona baghanga okutegeera ekibono kino, okutoolaku abo be kyagheebwa.

¹² Kuba eriyo abatabayiza olw'okuba baazaalibwa nga tibaghanga kubayiza, yaabaayo abaafuulibwa okuba abatasobola kubayiza, ate yaabaayo abaasalagho beene obutabayiza olw'Obwakyabazinga obw'omu igulu. Kale oyo akitegeire, atyo akitegeere.”

Yesu agha abaana abato omukisa

¹³ Agho ghaabaagho abaamuleetera abaana abato, abagemeku nga bw'abasabira aye Abeegeresebwa be baabadhuuka.

¹⁴ Yesu yaabakoba ati: “Abaana mubaleke mutabalobera kwidha ye ndi, kuba abali ng'oti n'abo n'ababa mu Bwakyabazinga obw'omu igulu.”

¹⁵ Bwe yamala okubaisaaku emikono yaava agho.

Omwisuka omukombe

¹⁶ Agho ghaabaagho omuntu mulala yaidha ye Yesu yaakoba ati: “Mwegeresa, kirungi ki kye nteekwa okukola okughanga okufuna obulamu obutawaagho?”

¹⁷ Yesu yaamukoba ati: “Ombuuliza ki ku kirungi? Omulungi ali mulala. Aye oba nga oyenda okufuna obulamu obutawaagho, gema ebiragiro.”

¹⁸ Yaamukoba ati: “Ebiri gha?” Yesu yaakoba ati: “Toitanga, toyendanga, toibanga, otaghaayirizanga,

¹⁹ lata wo n'inhoko obaghanga ekitiisa, era ogonzanga mwino nga bwe weegonza mwene.”

²⁰ Omwisuka yaamukoba ati: “Bino byonabyona nabigema. Kiki kye nkaabulaku?”

²¹ Yesu yaamukoba ati: “Oba ng'oyenda okuba atuukiriire, ja otane ebibyo, oghe abaavu, era oidhe onnonereze, obukombe oliba nabwo mu igulu.”

²² Aye omwisuka olwawulira ekyo, yaaja ng'afootookereire, kuba yali n'ebintu kamaala.

²³ Agho Yesu yaakoba Abeegeresebwa be ati: “Bwenebwene ka mbakobere: Kiriba kikalangufu omukombe okungira mu Bwakyabazinga obw'omu igulu.

²⁴ Era ka mbakobere: Kiba kyangu engamiya okubita mu mpami ey'empiso okusinga omukombe okutuuka mu Bwakyabazinga bwa Katonda.”

²⁵ Abeegeresebwa olwawulira ekyo, beewuunhia ekibitiriire nga bakoba bati: “Memale olwo naani aghanga okulokolebwa?”

²⁶ Yesu yaabalingirira, yaabakoba ati: “Ku bw'omuntu kino tikisoboka, aye mu Katonda byonabyona bisoboka.”

²⁷ Agho Petero yaamukoba ati: “Bona eno, ife twaleka byonabyona twakunonereza olwo ife tulifuna ki?”

²⁸ Yesu yaabakoba ati: “Bwenebwene ka mbakobere mu kiseera eky'okwiza byonabyona obuyaaka, ng'Omwana w'Omuntu atyaime ku kityamo kye eky'ekitiisa, imwe abaanonereza mwena mulityama ku bityamo ikumi n'abiri mwafuga ebika eikumi n'ebibiri ebya Isiraeli.

²⁹ Era yeenayeena aleka enhumba, oba baganda be, oba baanhina, oba ise, oba inhina, oba abaana, oba ebibandha, ku lwange aliirizibwagho emikuzi kikumi, era yaafuna n'obulamu obutawaagho.

³⁰ Aye abantu kamaala ab'emberi abaliba ab'ensembo, n'ab'ensembo abaliba ab'emberi.