Matayo 18 - Baibuli Ekibono kya Katonda 2014

Naani asinga obubbede

¹ Mu kiseera kyene ekyo Abeegeresebwa baidha ye Yesu baamubuuza bati: “Naani asinga obubbede mu Bwakyabazinga obw'omu igulu?”

² Yesu yaayeta omwana omuto, yaamuta ghagati ghaibwe,

³ yaakoba ati: “Bwenebwene ka mbakobere okutoolaku nga mukyuse mwaba ng'oti baana bato, timughanga naire kwingira mu Bwakyabazinga bwa mu igulu.

⁴ Kale buli eyeisa n'afaanana ng'omwana omuto, oyo n'asinga obubbede mu Bwakyabazinga obw'omu igulu.

⁵ Ate buli asangaalira omuto oti n'ono mu liina lyange, aba asangaalira nze.

Ebisendasenda okwona

⁶ “Aye aleetera omulala ku bato bano abandhikiriza okwona, oyo ekyandiwuze n'okusibibwa olubengo mu nkoto n'asuulibwa mu nhandha ghagati.

⁷ Ensi ekagwireku olw'ebisendasenda abantu okwonoona! Kituufu ebisendasenda okwona tibiroba kubaagho, aye oyo abireeta akagwireku!

⁸ “Omukono gwo, oba ekigere kyo bwe kiba kikusendasenda okwona, kitemeku okisuule ghala omala gaba na mukono mulala oba kigere kirala, waafuna obulamu, otasuuliibwa mu muliro ogutazikira ng'oli n'emikono ebiri oba n'ebigere bibiri.

⁹ Era, oba eriiso lyo likusendasenda okwona, litoolemu olisuule ghala omala gaba ow'eitulu, waafuna obulamu otasuuliibwa mu muliro gwa geyeena ng'oli n'amaiso abiri.

Olufumo olw'entaama eyabula

¹⁰ “Mwegendereze, obutanhoomanga ni bw'aba omulala ku bato bano. Kuba ka mbakobere, mu igulu, bamalaika baibwe buliidho babona amaiso ga Lata wange ali mu igulu. [

¹¹ Kuba Omwana w'Omuntu yaidha okuzaawula abazaaye.]

¹² “Imwe mukibona mutya? Omuntu bw'aba n'entaama dhe ekikumi, memale endala n'ebula, taleka kyenda na mwenda eyo ku nsozi, n'aja n'ayagala eyo ebuze?

¹³ Era bw'agizuula, bwenebwene ka mbakobere: Asagamba inho olw'eyo okusinga olwa dhire ekyenda n'omwenda edhitaabula.

¹⁴ Atyo ni, ni Lata waimwe ali mu igulu tayenda waire mulala ku bato bano azikirire.

Muganda wo bw'ayona

¹⁵ “Muganda wo bw'akukola ekibi, ja omunenie nga muli bwa babiri mwenka. Bw'akuwulirisa, ng'olwo muganda wo oyo omuwoniiza.

¹⁶ Aye bw'atakuwulirisa, otoola mwino mulala oba babiri waaja nabo: Buli kibono kyakakasibwa abadhulizi babiri oba basatu.

¹⁷ Aye bw'aloba okuwulirisa abo, olwo ni ng'okobera Ekikunsu eky'Abaikiriza mu Kurisito. Bw'aloba okuwulirisa n'Ekikunsu eky'Abaikiriza, ng'olwo ni mumubisa ng'azira kwikiriza era ng'omughooza w'omusolo.

¹⁸ “Bwenebwene ka mbakobere: Byonabyona bye munaasibanga ku nsi nga ni mu igulu bisibiibwa ate byonabyona bye munaasimululanga ku nsi nga ni mu igulu bisimulwirwa.

¹⁹ “Era ka mbakobere: Ababiri ku imwe bwe baisania ku kintu kye basaba, Lata wange ali mu igulu alikibakolera

²⁰ kuba ababiri oba abasatu ghe beesololeza mu liina lyange, zeena mbaagho agho ghagati waibwe.”

Olufumo olw'omugheereza atasonigha

²¹ Agho Petero yaaseeta yaamukoba ati: “Musengwa, muganda wange ng'ankoze ekibi nnaamusonighanga kutuusa li? Okutuusa ku mikuzi musanvu?”

²² Yesu yaamukoba ati: “Tikukoba nti okutuuka ku mikuzi musanvu aye, okutuuka ku nsanvu emikuzi musanvu.

²³ Obwakyabazinga obw'omu igulu kyebuva bufaananizibwa ku kyabazinga eyayenda okugondhoola n'abagheereza be ebigema ku bintu bye, bye baali nabyo.

²⁴ Bwe yatoolera okutereeza embalirira ye, baamuleetera eyali n'eibandha lye lya mutwalo gwa talanta.

²⁵ Aye olw'okuba yali nga tasobola kulisasula, musengwa we n'okulagira bamutane, ni mukazi we, n'abaana, n'ebintu bye byonabyona bye yali nabyo, eibandha lisasulwe.

²⁶ “Agho omugheereza yaakuba amakiryaivu yaamweghemba ng'akoba ati, ‘Nguminkiriza, ndidha kukusasula byonabyona.’

²⁷ Musengwa w'omugheereza oyo yaamugemerwa ekisa yaamuleka, era yaamusonigha n'eibandha.

²⁸ “Aye omugheereza oyo bwe yali afuluma yaayagaana mugheereza mwine ye yali abandha dinari kikumi. Yaamugema, yaamugwa mu mamiro nga bw'amukoba ati, ‘Nsasula eibandha lyange.’

²⁹ Mugheereza mwine ono yaakuba amakiryaivu yaamweghemba ng'akoba ati, ‘Nguminkiriza ndidha kukusasula.’

³⁰ Aye yaaloba, era yaaja yaamuta mu ikomera okutuusa ng'amusaswire eibandha.

³¹ Bagheereza baine bwe baabona ebikoleibwa, baanakughala inho, era baaja baakobera musengwa waibwe byonabyona ebyabaagho.

³² Agho musengwa we yaamweta, yaamukoba ati, ‘Mugheereza iwe omubi, nakusoniighe eibandha eryo lyonalyona kuba waneegayiriire

³³ kale iwe weena obaire togwaniire kusaasira mugheereza mwino nga nze zeena bwe nakusaasiire?’

³⁴ Musengwa yaanakughala inho, era yaamughaayo mu ikomera bamudaazedaaze, okutuusa ng'asaswire eibandha lyonalyona.

³⁵ Atyo ni, Lata wange ali mu igulu bw'alibakola, okutoolaku nga buli muntu asonigha muganda we mu mwoyo gwe.”