Matayo 17 - Baibuli Ekibono kya Katonda 2014

Okufuuka obundi okwa Yesu

¹ Nga ghabiseegho enaku mukaaga, Yesu yaagema ku Petero, Yakobo ni Yoanne muganda we, yaabakulemberamu baaja ku lusozi oluleeyi baaba eyo bonka.

² Agho yaafuuka obundi nga babona, amaiso ge gaayaka oti ndhuba, n'ebivaalo bye byayakaayakana oti musana.

³ Okuja okulinga nga Musa n'Eliya baboneka nga bali kwogera ni Yesu.

⁴ Agho Petero yaakoba Yesu ati: “Musengwa, tulongoire twaba ghano era bw'osiima ndidha kuseementa ghano entindi isatu: eyindi yiyo, eyindi ya Musa n'eyindi y'Eliya.”

⁵ Yali akaayogera, ekireri ekimesunkana kyabakingiriza era eiroboozi lyava mu kireri lyakoba liti: “Ono ni mutabane wange omugonzi, aneesiimisa, mumuwulirenga.”

⁶ Abeegeresebwa olwawulira ekyo, baatya inho, era beeyala ghansi nga beefundiike.

⁷ Aye Yesu yaaseeta yaabagemaku, yaakoba ati: “Musituke, muleke kutya.”

⁸ Bwe baalinga ghaigulu, ghazira wundi ye baabona okutoolaku Yesu yenka.

⁹ Bwe baali baikirira ku lusozi Yesu yaabasikirira, yaakoba ati: “Ghatabaagho ye mukobera ku kye muboine okutuusa ng'Omwana w'Omuntu amaze okuzuukira mu bafu.”

¹⁰ Abeegeresebwa baamubuuza bati: “Lwaki Abanamateeka bakoba bati Eliya n'ow'okusooka okwidha?”

¹¹ Yaabairamu ati: “Kituufu Eliya n'ow'okusooka okwidha, era wa kutereeza byonabyona

¹² aye ka mbakobere: Eliya yaidha ira, aye tibaamumanha era baamukola byonabyona nga bwe baasiima. Mu nsambo n'endala bwe baja okudaazadaaza n'Omwana w'Omuntu.”

¹³ Agho Abeegeresebwa baamanha nga mu bye yali abakoba, yali ayogera ku Yoanne Omubatiza.

Yesu awonia omulenzi eyaliku omuzimu omubi

¹⁴ Bwe baatuuka mu lukunkumuli olw'abantu, ghaabaagho omuntu yaaseeta ye Yesu, yaakuba amakiryaivu gha bigere bye.

¹⁵ Yaakoba ati: “Musengwa, saasira mutabane wange, agwa ensimbu era adaagadaaga inho kuba emikuzi kamaala agwa mu muliro, ate n'olundi mu maadhi.

¹⁶ Namuleeta y'Abeegeresebwa bo aye tibaaghanga kumuwonia.”

¹⁷ Yesu yaakoba ati: “Yii, oluse luno oluzira kwikiriza, era olw'abantu abadankaanu! Ndituusa gha okuba n'imwe? Ndituusa gha okubaguminkiriza? Mumundeetere ghano.”

¹⁸ Yesu yaakaabukira omuzimu omubi gwamuvaaku, era omulenzi yaawona, mu saawa yeene eyo.

¹⁹ Agho Abeegeresebwa baidha ye Yesu nga bali bonka baakoba bati: “Lwaki ife titwasobola kugubinga?”

²⁰ Yaabakoba ati: “Kuba muli n'okwikiriza kutono. Bwenebwene ka mbakobere: bwe muba n'okwikiriza okwaga akamuuma ka kaladaali, mulikoba olusozi luno muti, ‘Va ghano, ja ghale,’ lwaja, era ghazira kye mutalighanga kukola. [

²¹ Aye ogw'engeri eno tiguva ku muntu okutoolaku ng'obise mu kusaba n'okusiiba.]”

Yesu kabiri alanga okufa kwe n'okuzuukira

²² Bwe baali mu Galilaaya Yesu yaabakoba ati: “Omwana w'Omuntu aja kugheebwayo mu mikono egy'abantu,

²³ era baidha kumwita ate ku lunaku olwokusatu alizuukira.” Abeegeresebwa baanakughala inho.

Okugha empooza ey'eisinzizo

²⁴ Agho baatuuka e Kaperinaumu. Abasoloza empooza ey'eisinzizo baaseeta ghe Petero baakoba bati: “Omwegeresa waimwe tagha mpooza ya isinzizo?”

²⁵ Yaakoba ati: “Agha.” Yesu yaamwesooka, yaakoba ati: “Simoni, olowooza otya? Bakyabazinga ab'ensi, empooza oba omusolo babitoola ku baani? Ku bataka oba ku basenze?”

²⁶ Yaakoba ati: “Ku basenze.” Yesu yaamukoba ati: “Ekikoba abataka ba idembe obutagha.

²⁷ Aye obutabanhiiza ja osuule eirobo mu nhandha, era ekyenhandha ky'onaagemya okusooka okitoole okyasamye omunwa. Oidha kwagaanamu empiiya ndala ogitoole ogibaghe, weesasulire era osasulire ninze.”