Matayo 16 - Baibuli Ekibono kya Katonda 2014

Abafarisaayo basaba akamanhiso

¹ Agho Abafarisaayo n'Abasaddukaayo baaseeta aghaali Yesu, nga bamuleba, abaghe akamanhiso akava mu igulu.

² Aye Yesu yairamu yaabakoba ati: “Eigulo bwe bwerituuka, mukoba muti, ‘Obwire bunaaba bukalamu kuba eigulu limyuse’

³ ate mu nkyo eigulu bwe limyuka mukoba muti, ‘Gazigwire era gandiba amabi.’ Mwidhi emboneka ey'eigulu ky'etegeeza aye mwaloba okumanha obumanhiso obw'ebiseera bino?

⁴ Abantu ab'oluse luno aboonooni era abatatya Katonda benda akamanhiso! Ate nga akamanhiso tikaidha kubagheebwa, okutoolaku akamanhiso aka Yona.” Yaabavaaku yaaja.

Ekizimbulukusa eky'Abafarisaayo n'Abasaddukaayo

⁵ Abeegeresebwa bwe baasomoka enhandha beerabira okutwala emigaati. Yesu yaabakoba ati:

⁶ “Mwekuume era mwegendereze ekizimbulukusa eky'Abafarisaayo n'Abasaddukaayo!”

⁷ Aye baatoolera okwebuuzagania beene na beene nga bakoba bati: “Kuba tituleese migaati?”

⁸ Yesu yaakimanha n'okubakoba ati: “Ye bano abali n'okwikiriza okutono! Lwaki mwogera ku ky'okubula emigaati?

⁹ Mukaali kutegeera, naire okwidhukira emigaati etaanu gye mwagabula abantu enkumi eitaanu, n'ebiibo bye mwasoloza?

¹⁰ Waire emigaati omusanvu gye mwagabula enkumi eina, n'ebiibo bye mwasoloza?

¹¹ Kale kitya bwe mutategeera nti bye mbakobye tibigema ku migaati? Aye mwegendereze ekizimbulukusa eky'Abafarisaayo n'Abasaddukaayo.”

¹² Agho ni baategeera bati takobye kwegendereza kizimbulukusa kya migaati, aye ebyegeresebwa Abafarisaayo n'Abasaddukaayo.

Petero ayatula ati Yesu ni Kurisito

¹³ Agho Yesu bwe yatuuka mu biketezo bya Kaisaria Filippi, yaabuuza Abeegeresebwa be ati: “Omwana w'Omuntu abantu bamweta batya?”

¹⁴ Baakoba bati: “Abandi bamweta Yoanne Omubatiza, abandi Eliya, ate abandi Yeremia, oba omulanzi ng'abalanzi abandi.”

¹⁵ Yaabakoba ati: “Aye imwe mundheta mutya?”

¹⁶ Simoni Petero yaamwiramu ati: “Niiwe Kurisito Omwana wa Katonda omulamu.”

¹⁷ Yesu yaamukoba ati: “Simoni mutabane wa Yona, oli wa nkabi, kuba ti muntu buntu eyakubwikulira ekyo, aye Lata wange ow'omu igulu.

¹⁸ Era zeena ka nkukobere, Petero, ‘Oli lubaale, era ku lubaale kuno, kwe ndizimba Ekikunsu kyange eky'Abaikiriza mu Kurisito n'emiryango egy'e magombe tigirikisobola naire.

¹⁹ Ndikugha ebisumuluzo eby'Obwakyabazinga obw'omu igulu, era kyonakyona ky'olisiba ku nsi nga ni mu igulu kisibiibwa, ate kyonakyona ky'olisimulula ku nsi nga ni mu igulu kisimulwirwa.’ ”

²⁰ Agho ni yaasikirira Abeegeresebwa obutakobera ku muntu yeenayeena bati ni Kurisito.

Yesu alanga okufa kwe n'okuzuukira

²¹ Okuva ku olwo Yesu yaatoolera okulaga Abeegeresebwa be ati ali n'okuja e Yerusalemu, n'okudaazibwadaazibwa einho abakulu ab'ebika, Bakabona Abakulu, n'Abanamateeka, era bamwite, ate azuukire ku lunaku olwokusatu.

²² Agho Petero yaamwiza gha mbali yaamukoba ati: “Musengwa tokoba otyo, Katonda agwana ayambe ebyo birobe kukutuukaku.”

²³ Aye Yesu yaakyuka yaakoba Petero ati: “Nva mu maiso Sitaani, oli kitimuguunha mu ngira yange kuba ebya Katonda tobitegeera, otegeera bya bantu.”

²⁴ Agho Yesu yaakoba Abeegeresebwa be ati: “Oba nga ghaligho ayenda okuunonereza, alobe kwefaaku naire, abbeede omusalaba gwe annonereze

²⁵ kuba buli ayenda okuwonia obulamu bwe abufiirwa aye oyo afiirwa obulamu bwe ku lwange alibufuna.

²⁶ Omuntu aganhulwamu ki okufuna ensi yoonayoona aye n'afiirwa obulamu bwe? Oba omuntu aghanga kughaayo ki okununula obulamu bwe?

²⁷ Omwana w'Omuntu aja kwidha mu kitiisa kya Ise, ni bamalaika be, era buli muntu amughe ekimugwana ng'ajiira ku bikolwa bye.

²⁸ Bwenebwene ka mbakobere ghaligho abandi ku beemereire ghano abataja kukomba ku kufa okutuusa nga baboine Omwana w'Omuntu ng'aidha nga Kyabazinga.”