Matayo 15 - Baibuli Ekibono kya Katonda 2014

Okwegeresa ku mpisa edh'Abayudaaya

¹ Agho Abafarisaayo n'Abanamateeka okuva e Yerusalemu baaseeta aghaali Yesu baakoba bati:

² “Lwaki Abeegeresebwa bo baloba okugema empisa dha badhaadha dhe baatulekera? Tibanaaba mu ngalo dhaibwe nga baja okulya omugaati.”

³ Yesu yaabairamu ati: “Lwaki imwe muloba okugema ekiragiro kya Katonda nga mwegemya empisa dha badhaadha baimwe?

⁴ Ate nga Katonda yakoba ati, ‘Lata wo ni inhoko obatangamu ekitiisa,’ era ati, ‘Oyo avuma Ise oba inhina aitibwenga bwitibwe.’

⁵ Aye imwe mukoba muti, ‘Ole bw'akoba Ise oba inhina ati kye nandikughaire nakisengamu Katonda,

⁶ aba takeetaaga kuta kitiisa mu Ise.’ Mu ngeri eyo ekibono kya Katonda mwakidibya olw'empisa ya badhaadha baimwe.

⁷ Bakuusa imwe! Isaia bye yalanga ku imwe bituufu inho, bwe yakoba ati,

⁸ ‘Abantu bano bantaamu ekitiisa mu bibono bubono, aye omwoyo gwaibwe gundi ghala.

⁹ Bansinza mu nsinza eziramu, nga beegeresa endhegeresa abantu ye bataagho obute, n'eba ng'oti n'endhegeresa eyange.’ ”

¹⁰ Agho Yesu yaayeta abantu baseeta y'ali, yaabakoba ati: “Muwulirise era mutegeere:

¹¹ ekingira mu kanwa ti n'ekireetera omuntu okuba omwonoonefu, aye ekiva mu kanwa n'ekimuleetera okuba omwonoonefu.”

¹² Abeegeresebwa be baaseeta, baamukoba bati: “Oidhi nga Abafarisaayo basungughaire olw'ebibono byo?”

¹³ Yesu yaabakoba ati: “Buli kisimbe ekitasimbwa Lata wange ow'omu igulu kiriighibwagho.

¹⁴ Mubaleke abo abatulu abakulemberamu batulu banaibwe ate nga omutulu bw'akulemberamu mutulu mwine, bombi bagwa mu kiina.”

¹⁵ Petero yaamukoba ati: “Twinhonhole olufumo olwo!”

¹⁶ Yesu yaakoba ati: “Olwo mwena mukaali kutegeera?

¹⁷ Timubona nga buli ekingira mu kanwa kija mu nda, era mwe kiva ni kifuluma?

¹⁸ Aye ebintu ebiva mu kanwa biva ku mwoyo, era ebyo n'ebireetera omuntu okuba omwonoonefu

¹⁹ kuba ku mwoyo n'okuva ebidhuubo ebibi, obutemo, okwenda, okwemadula, obwibi, okughaayiriza, n'okuvuma Katonda.

²⁰ Bino n'ebireetera omuntu okuba omwonoonefu.”

Okwikiriza okw'omukazi Omukanaani

²¹ Yesu olwava agho yaaja mu biketezo eby'e Tiro ni Sidoni.

²² Ghaabaagho omukazi Omukanaani eyava mu kiketezo ekyo, yaaseeta yaayogerera ghaigulu ati: “Musengwa, mwidhukulu wa Daudi, nkusaba ondhune. Mughala wange aliku omuzimu omubi gumutawaania.”

²³ Aye Yesu yaaloba kumwiramu waire kibono. Abeegeresebwa be baaseeta baamweghemba nga bakoba bati: “Musiibule aje kuba ali kutunonereza bw'awowoigana.”

²⁴ Yesu yairamu ati: “Tyatumibwa ghandi okutoolaku eri entaama edhaabula edh'omu ndhu ya Isiraeli.”

²⁵ Aye omukazi yaidha bwidhe yaakuba amakiryaivu yaakoba ati: “Musengwa nhamba.”

²⁶ Aye Yesu yaamwiramu ati: “Ti kikalamu okutoola emere ey'abaana waagisuulira obubwa.”

²⁷ Omukazi yaakoba ati: “N'agh'agho Musengwa aye n'obubwa bulya ku bukunkumuka obumagala okuva ku meeza dha beene bwo.”

²⁸ Agho Yesu yaamukoba ati: “Mukazi iwe okwikiriza kwo kunene! Kikukolerwe nga bw'oyenda.” Era okuva ku saawa eyo omughala yaawona.

Yesu awonia abantu kamaala

²⁹ Yesu yaava agho yaabita ku nhandha ey'e Galilaaya, yaaniina ku lusozi ghaigulu yaatyama eyo.

³⁰ Abantu kamaala baasombokera y'ali, nga baleese abalema, n'abatulu, n'abateesobola, ni bakasiru, n'abandi kamaala, baabata agho mu maiso ge, yaabawonia.

³¹ Abantu beewuunhia inho okubona bakasiru nga boogera, n'abateesobola nga balamu, n'abalema nga batambula, n'abatulu nga babona. Agho baagha Katonda wa Isiraeli ekitiisa.

Yesu aliisa abantu enkumi eina

³² Agho Yesu yaayeta Abeegeresebwa be, yaabakoba ati: “Abantu bano bangemya ekisa, kuba buti enaku isatu nga bali ninze, ate nga bazira ka kulya tyenda kubasiibula nga bayala, kuba baghanga okugwa ku ngira.”

³³ Abeegeresebwa be baamukoba bati: “Memale ife tunaafuna gha mu irungu muno emigaati egimala okwigusa abantu abaaga agho?”

³⁴ Yesu yaabakoba ati: “Muligho n'emigaati emeka?” Baakoba bati: “Musanvu, n'obwenhandha butonotono.”

³⁵ Agho yaalagira abantu batyame ghansi,

³⁶ yaatoola emigaati omusanvu, n'obwenhandha, yeeyanza yaabimegulamu, yaagha Abeegeresebwa be, era Abeegeresebwa be baabigabula abantu.

³⁷ Boonaboona baalya baiguta, baasoloza ebitundu ebyafiikagho, ebiibo musanvu ebiidhuvu.

³⁸ Abaalya baali abasaadha enkumi ina (4,000) nga tobaze bakazi na baana.

³⁹ Agho Yesu yaasiibula abantu yaaniina mu lyato yaaja mu kiketezo eky'e Magadani.