Matayo 13 - Baibuli Ekibono kya Katonda 2014

Olufumo olw'omusizi

¹ Ku lunaku olwo Yesu yaafuluma mu ndhu yaaja yaatyama ku mbali okw'enhandha.

² Ebiyindi eby'abantu byesololeza gh'ali, era yaaniina bwa mu lyato yaatyama, eikuukuubira lyonalyona lyayemerera ku bukalu.

³ Yaabakobera ebintu kamaala mu nfumo yaakoba ati: “Omusizi yafuluma okusiga ensigo.

⁴ Bwe yali asiga, edhindi dhaagwa ku ngira enhonhi dhaidha dhaadhirya.

⁵ Ate edhindi dhaagwa ku lubaalebaale okuzira itaka lingi, era mangu ago dhaamera kuba tidhaali na itaka lingi.

⁶ Aye endhuba olwavaayo, ng'edho edhaali dhimeze dhiniala, era olw'obutaba na mizi nga dhikala.

⁷ Edhindi dhaagwa mu mawa, amawa gaadhifundekeza.

⁸ Ate edhindi dhaagwa mu itaka eirungi dhaayama, okundi kikumi, okundi nkaaga, okundi asatu.

⁹ Ali n'amatu awulire.”

Ekigendererwa mu nfumo

¹⁰ Agho Abeegeresebwa baaseeta gh'ali, baamukoba bati: “Lwaki oyogera nabo mu nfumo?”

¹¹ Yaabairamu ati: “Kuba imwe mwagheebwa okumanha ebyama eby'Obwakyabazinga obw'omu igulu, aye abo tibagheebwanga.

¹² Kuba aliku ni k'ali nako alyongerwaku yaaba na bingi. Aye azira, ni k'ali nako kalimutoolebwaku.

¹³ Kale ni ndhogera nabo mu nfumo kuba babona aye tibabona, bawulira aye tibawulira waire okutegeera.

¹⁴ Era abo batuukiriza Isaia kye yalanga ng'akoba ati, ‘Okuwulira muliwulira aye timulitegeera, era n'okubona mulibona aye timulitegeera;

¹⁵ kuba omwoyo ogw'abantu bano mukalangafu, amatu gaibwe gasembye, n'amaiso gaibwe bagazibye. Nkani bandiboine n'amaiso gaibwe, bandiwuliire n'amatu gaibwe, baategeera n'omwoyo, baakyukira ye ndi naabawonia.’

¹⁶ “Aye imwe mwesiimye, kuba amaiso gaimwe gabona n'amatu gaimwe gawulira.

¹⁷ Bwenebwene mbakobera nti, abalanzi kamaala n'abantu abatuufu beegomba okubona bye mubona, aye tibaabibona era n'okuwulira bye muwulira aye tibaabiwulira.

Yesu ainhonhola olufumo olw'omusizi

¹⁸ “Kale imwe muwulire olufumo luno olw'omusizi.

¹⁹ Yeenayeena awulira ekibono eky'Obwakyabazinga n'atakitegeera, ali ng'oti n'ensigo eyagwa ku ngira omubi aidha yaswankula ekyo ekisigiibwa mu mwoyo gwe.

²⁰ Ensigo eyagwa ku lubaalebaale, n'oyo awulira ekibono, mangu ago yaakisangaalira n'eisanhu.

²¹ Aye ng'azira mizi, era asigala atyo akaseera katono. Ebizibu oba okukirigibwa bwe bibaagho olw'ekibono, mangu ago ng'alekayo.

²² Ensigo edhaagwa mu mawa, n'oyo awulira ekibono aye okweraliikirira eby'obulamu obw'ensi, n'okuguyibwa eby'obukombe bifundekeza ekibono kyaloba kwama naire.

²³ Ate ensigo edhaagwa mu itaka eirungi, n'oyo awulira ekibono yaakitegeera, yaayama ebibala: owekikumi, owenkaaga, n'owasatu.”

Olufumo olw'eisubi eibi

²⁴ Kabiri yaabakobera olufumo olundi ng'akoba ati: “Obwakyabazinga obw'omu igulu bufaanana ng'omuntu eyasiga ensigo enungi mu nimiro ye.

²⁵ Abantu bwe baali batendwike, omuzigu yaidha yaamansa ensigo edh'eisubi eibi mu ngaano, yeejiira.

²⁶ Ebisimbe bwe byakula ni bitaaku n'ebibala, ng'eisubi eibi lyona liboneka.

²⁷ Agho abagheereza ba mwenemu baaseeta gh'ali baamukoba bati, ‘Musengwa, mu nimiro yo tiwasigamu nsigo nungi? Memale lwaki mulimu eisubi eibi?’

²⁸ Yaabakoba ati, ‘Omuzigu n'eyakola ekyo.’ Abagheereza baamukoba bati, ‘Buti oyenda tuje tuliighemu?’

²⁹ Aye yaabakoba ati, ‘Busa, tomanha bwe muba mwigha eisubi ibi ni mwighiramu na ngaano.

³⁰ Muleke byombi bikulire ghalala okutuuka mu kukesa, era mu kukesa ndikoba abakesi baasooka okwighamu eisubi eibi, baalisiba ghalala mu binhwa baalyokya, ate engaano baagisololeza mu kyagi kyange.’ ”

Olufumo lwa kaladaali n'ekizimbulukusa

³¹ Yaabakobera olufumo olundi ati: “Obwakyabazinga obw'omu igulu bufaanana ng'oti n'akamuuma ka kaladaali, omuntu ke yatoola n'asiga mu nimiro ye.

³² Waire nga n'akatonioli mu nsigo dhoonadhoona, bwe kamera kakula kaaba kabba okusinga ebimera ebindi kaafuuka muti, era enhonhi edh'omu ibbanga dhiidha dhaazimba ebisu mu nsaga dhaagwo.”

³³ Yaabakobera olufumo olundi ati: “Obwakyabazinga obw'omu igulu bufaanana ng'oti n'ekizimbulukusa, omukazi kye yatoola n'atabika mu biibo ebisatu eby'engaano, okutuusa byonabyona bwe byazimbuluka.”

Yesu kyeyava akozesa enfumo

³⁴ Ebyo byonabyona Yesu yabikoberanga abantu mu nfumo, era ghazira kye yabakobera nga takozeisa lufumo.

³⁵ Kino ni kyatuukiriza omulanzi kye yakoba ati: “Ndyogeranga mu nfumo, ndyatula ebitaatulwanga okuva ku kwinhama okw'ensi.”

Yesu ainhonhola olufumo olw'eisubi eibi

³⁶ Agho Yesu yaasiibula abantu, yangira mu ndhu. Abeegeresebwa be baaseeta, baamukoba bati: “Twinhonhole olufumo olw'eisubi eibi ery'omu nimiro.”

³⁷ Yesu yaabakoba ati: “Asiga ensigo enungi n'Omwana w'Omuntu,

³⁸ enimiro n'ensi, ensigo enungi n'abaana ab'Obwakyabazinga, ate eisubi eibi n'abaana ab'omubi.

³⁹ Omuzigu asiga eisubi eibi ni Sitaani, okukesa n'enkomerero ey'ensi, abakesi ni bamalaika.

⁴⁰ Kale ni ng'eisubi eibi bwerisolozebwa ni lyokebwa mu muliro, kityo bwe kiriba ku nkomerero ey'ensi.

⁴¹ Omwana w'Omuntu alituma bamalaika be baasunsula mu Bwakyabazinga bwe ebyo byonabyona ebireetera abantu okwonoona, era n'abakola ebibi

⁴² baabasuula mu nkoomi ey'omuliro, omuliba okugegenga n'okuluma emba olw'obulumi obubitirivu.

⁴³ Abo abatuufu balimesunkana oti ndhuba mu Bwakyabazinga bwa Iseibwe. Ali n'amatu awulire.

Enfumo eisatu ku Bwakyabazinga obw'omu igulu

⁴⁴ “Obwakyabazinga obw'omu igulu bufaanana n'eky'obukombe ekyagisibwa mu nimiro. Omuntu bw'akizuula akigisa, ate olw'eisanhu ly'aba nalyo, aja yaatunda ebibye byonabyona yaagula enimiro eyo.

⁴⁵ “Era Obwakyabazinga obw'omu igulu bufaanana omusuubuze eyayagala amabaale ag'omughendo.

⁴⁶ Bwe yazuula eibaale eirala ery'omughendo einho, yaaja yaatunda ebibye byonabyona yaaligula.

⁴⁷ “Era Obwakyabazinga obw'omu igulu bufaanana ng'akatimba akategebwa mu nhandha kaasoloza buli kika kya kyanhandha.

⁴⁸ Bwe kaidhula baakasika baakatuusa ku bukalu, baatyama, baalondamu ebirungi nga bata mu nsawo, ng'ebibi babisuula ere.

⁴⁹ Kityo bwe kiriba ku nkomerero ey'ensi: Bamalaika baliidha baayawula ababi mu balungi

⁵⁰ baabasuula mu nkoomi ey'omuliro omuliba okugegenga n'okuluma emba olw'obulumi obubitirivu.

Ebiyaaka n'ebikaire

⁵¹ “Ebyo byonabyona mubitegeire?” Baamukoba bati: “Yii.”

⁵² Yaabakoba ati: “Kale ni kiisi Munamateeka ayega mu by'Obwakyabazinga obw'omu igulu afaanana ng'oti n'omuntu mwenemu, atoola mu iterekero lye ebiyaaka n'ebikaire.”

Baloba okwikiriza Yesu e Nazarethi

⁵³ Yesu bwe yamaliriza enfumo edho, yaava agho,

⁵⁴ yaatuuka mu kibuga eky'ewaibwe yaayegeresa mu sinagoga yaibwe, era baayasaamirira inho baakoba bati: “Ono amagezi agaaga agho agatoola gha, era aghanga atya okukola ebyewuunhio by'akola?

⁵⁵ Ono ti n'omwana ow'omubaadhi? Inhina ti ni Maria? Ni baganda be ti ni Yakobo, ni Yosefu, ni Simoni, ni Yuda?

⁵⁶ Baanhina boonaboona tibali kwaife? Memale ono ebyo byonabyona abitoola gha?”

⁵⁷ Kale baamuboola. Aye Yesu yaabakoba ati: “Omulanzi azira ye batamutaamu kitiisa, okutoolaku mu kyalo eky'ewaibwe ni mu ndhu ey'ewaibwe.”

⁵⁸ Era eyo tiyakolayo byewuunhio kamaala kuba tibaikiriza.