Matayo 12 - Baibuli Ekibono kya Katonda 2014

Ebigema ku Sabbato

¹ Agho olwatuuka Yesu yaabita mu misiri egy'engaano ku lwa Sabbato. Abeegeresebwa be endhala yaabaluma, era batandiika okuwulula engaano bwe balya.

² Aye Abafarisaayo olwakibona baamukoba bati: “Bona, Abeegeresebwa bo bali kukola ekitaikirizibwa kukola ku Sabbato.”

³ Aye Yesu yaabakoba ati: “Timusomangaku Daudi kye yakola, endhala bwe yamuluma ni be yali nabo?

⁴ Bwe yangira mu ndhu ya Katonda, n'alya emigaati egigheereibwayo eri Katonda, gye yali taikirizibwa kulya, waire be yali nabo okutoolaku bakabona bonka?

⁵ Oba timusomangaku mu Mateeka muti ku lwa Sabbato, bakabona boonoona Sabbato mu isinzizo, aye baaloba kuba na musango?

⁶ Aye ka mbakobere: ghano ghaligho asinga n'eisinzizo.

⁷ Ate nguli mubaire mwidhi ekyaghandiikibwa kino bwe kikoba, ‘Nhenda kisa aye ti misengo’, mwandibaire nga timusalira banaimwe musango abazira kye basobiiza

⁸ kuba Omwana w'Omuntu ni Musengwa wa Sabbato.”

Omuntu ow'omukono ogwaniala

⁹ Olwava agho, Yesu yaaja yangira mu sinagoga yaibwe.

¹⁰ Mwalimu omuntu eyali n'omukono ogwaniala. Agho baamubuuza oba nga kiikirizibwa okuwonia ku Sabbato nga benda bamuseeghe.

¹¹ Yesu yaabakoba ati: “Naani ku imwe aba n'entaama ye, n'egwa mu kiina ku Sabbato, aloba okugigema n'agitoolamu?

¹² Omuntu tasinga ntaama mughendo? Agho ni kiikirizibwa okukola obulungi ku Sabbato.”

¹³ Agho yaakoba omusaadha ati: “Funhulula omukono gwo.” Yaagufunhulula era gwairagho okuba omulamu nga gule ogundi.

¹⁴ Aye Abafarisaayo olwafuluma nga beekobaana kubona ngeri ya kumuzikirizaamu.

Omugheereza wa Katonda omulondemu

¹⁵ Yesu olwamanha olukwe olwo yaava agho. Era abantu kamaala baamunonereza, era yaabawonia boonaboona.

¹⁶ Yaabasikirira n'obutamulaalaisa.

¹⁷ Kino kyatuukiriza Isaia omulanzi kye yalanga ati:

¹⁸ “Ono n'omugheereza wange ye nalonda omugonzi, omwoyo gwange mwe gusagambira. Ndidha kumutaamu Mwoyo wange, akobere amaghanga eby'amazima.

¹⁹ Taliba wa ntaka oba akaabuka, era ghazira aliwulira iroboozi lye mu maagaanana.

²⁰ Olugada oluvuniike talirukutulamu, n'olutambi olunioka taliruzikiza, okutuusa ng'atuusiiza amazima ku bughanguzi.

²¹ Era mu liina lye, amaghanga agandi mwe galisuubirira.”

Yesu ni Beelezebulu

²² Agho Yesu baamuleetera omuntu aliku omuzimu omubi nga mutulu era kasiru, yaamuwonia yaaba ng'aghanga okwogera era n'okubona.

²³ Abantu boonaboona beewuunhia inho era baakoba bati: “Ono ti ni mwidhukulu wa Daudi?”

²⁴ Aye Abafarisaayo olwakiwulira baakoba bati: “Ono emizimu emibi tagibinga na buyinza bundi, okutoolaku obwa Beelezebulu omukulu waagyo.”

²⁵ Yesu bwe yamanha bye balowooza yaabakoba ati: “Obwakyabazinga bwonabwona omuzira kwisania buzikirira era n'ekibuga oba amaka omuzira kwisania, tibisobola kubaagho.

²⁶ Kale ni oba Sitaani abinga Sitaani, mwene aba yeeyawiiremu kale obwakyabazinga bwe bughanga butya okubaagho?

²⁷ Ye oba nga nze emizimu emibi ngibinga na buyinza bwa Beelezebulu, ab'ekikunsu kyaimwe bagibinga na buyinza bw'ani? Abo ni n'abalibasalira omusango.

²⁸ Aye, oba nga emizimu emibi ngibinga na buyinza bwa Mwoyo wa Katonda, Obwakyabazinga bwa Katonda butuuse mu imwe.

²⁹ “Ole aghanga atya okungira mu ndhu y'omuntu ow'amaani n'anhaga ebibye okutoolaku ng'asoose kusiba muntu oyo ow'amaani? Memale olwo ni yaanhaga eby'omu ndhu ye!

³⁰ “Oyo ataba ninze aba muzigu wange n'oyo atasololeza ghalala ninze asansaania.

³¹ Kale ni ka mbakobere: Abantu balisoniyibwa buli kibi ni mu nsambo yoonayoona evuma Katonda aye alivuma Mwoyo Mutukuvu talisoniyibwa.

³² Era n'oyo alisala ku Mwana w'Omuntu ekibono alisoniyibwa aye oyo alyogera ekibi ku Mwoyo Mutukuvu, talisoniyibwa, idho ni lule.

Omuti n'ebibala byagwo

³³ “Omuti mugwete mukalamu nga n'ekibala kyagwo kikalamu oba omuti mugwete mubi nga n'ekibala kyagwo kibi kuba omuti gumanhirwa ku kibala kyagwo.

³⁴ Imwe eizaire ery'emisota, musobola mutya okwogera ebikalamu nga muli babi! Ebiidhwire mu mwoyo, omunwa ti bye gwogera?

³⁵ Omuntu omulungi, ku birungi by'abiika kw'atoola ebirungi, n'omuntu omubi, ku bibi by'abiika kw'atoola ebibi.

³⁶ “Aye ka mbakobere: ku lunaku olw'okusaliraku omusango abantu balyewozaaku ebyakalebule bye boogera.

³⁷ Ebibono byo n'ebirikuviiraku okusinga omusango, era ebibono byo n'ebirikuviiraku omusango okukusinga.”

Okusaba akamanhiso

³⁸ Agho abandi ku Banamateeka n'Abafarisaayo baamwiramu nga bakoba bati: “Mwegeresa twenda otughe akamanhiso.”

³⁹ Aye Yesu yaabairamu yaabakoba ati: “Abantu ab'oluse luno aboonooni, abatatya Katonda, nga benda obumanhiso! Ate ng'ezira kamanhiso ke baja kugheebwa okutoolaku aka Yona omulanzi:

⁴⁰ Nga Yona bwe yali munda y'ogwenhandha okumala enaku eisatu, omusana n'obwire, n'Omwana w'Omuntu atyo bw'aliba mu itaka munda enaku isatu, omusana n'obwire.

⁴¹ Ab'e Nineve, mu kusalirwa omusango, balisituka baalumiriza abantu ab'oluse luno kuba beenenia Yona bwe yalangirira okwenenia ate nga ghano ghaligho n'asinga Yona.

⁴² Kyabazinga omukazi ow'e Sheba, mu kusalirwa omusango alisituka, yaalumiriza abantu b'oluse luno kuba yava etali kumpi yaidha okuwulirisa amagezi ga Solomoni. Aye ghano ghaligho asinga Solomoni.

Okwira okw'omuzimu omubi

⁴³ “Omuzimu omubi bwe guva mu muntu, guja nga gubita mu bifo ebikalukalu nga gwagala agh'okuba, gwaloba kuzuulagho.

⁴⁴ Agho nga gukoba guti, ‘Ka ndhireyo mu ndhu yange mwe nava.’ Era bwe gwira gujaagaana nga ndhereere, ndheye era nga etegekeibwa bukalamu.

⁴⁵ Agho ni nga guja guleeta giinaagwo egigusinga n'obubi, nga gingira nga giba omwo era olumaliira obulamu obw'omuntu oyo buba bubi okusinga obwasooka. Kityo bwe kiriba ku bantu ab'oluse luno aboonooni.”

Baganda ba Yesu n'inhina

⁴⁶ Yesu yali akaayogera eri abantu, baganda be n'inhina baaba ku luya nga benda okwogera naye.

⁴⁷ Ghaabaagho omuntu yaamukoba ati: “Bona, inhoko ni baganda bo bali ku luya benda kwogera n'iwe.”

⁴⁸ Yesu yairamu eyamukobera ati: “Naani mukaire wange era ni baani baganda bange?”

⁴⁹ Agho yaasonka ku Beegeresebwa ng'akoba ati: “Bano ni mukaire wange, ni baganda bange.

⁵⁰ Buli akola Lata wange ali mu igulu ky'ayenda, oyo ni muganda wange, ni mwanhinaze ni mukaire wange.”