Matayo 11 - Baibuli Ekibono kya Katonda 2014

¹ Agho Yesu bwe yamaliriza bye yagalagira Abeegeresebwa be Eikumi n'Ababiri, yaava agho yaaja okulangirira n'okwegeresa abantu mu bibuga byaibwe.

Yoanne atuma abakwenda

² Yoanne bwe yali mu ikomera, yaawulira Kurisito by'ali kola. Agho yaatuma abeegeresebwa be

³ okumubuuza bati: “Niiwe ow'okwidha, oba tuteegerere wundi?”

⁴ Yesu yaabakoba ati: “Muje mukobere Yoanne bye muwulire ni bye muboine.

⁵ Abatulu babona, abalema batambula, abali n'endwaire ey'ebigenge balongooka, abaasemba amatu bawulira, abafu bazuukizibwa, n'abaavu bakoberwa Amawulire Amalungi.

⁶ Era wa nkabi atambona ng'ekitimuguunha.”

⁷ Abo bwe baali bali kuja, Yesu yaatoolera okukobera ebiyindi by'abantu ebigema ku Yoanne ati: “Kiki kye mwaja okubona mu irungu? Lugada empewo lw'etengeesa?

⁸ Kale mwaja kubona ki? Muntu avaire madholobera? Abavaala amadholobera baba mu bisaagaati bya bakyabazinga.

⁹ Aye kale imwe mwaja kubona ki? Mulanzi? N'agh'agho, ka mbakobere: Mwaja kubona asingaku n'omulanzi

¹⁰ kuba n'oyo eyaghandiikibwaku ati, ‘Bona, ndi kutuma omukwenda wange akukulembereremu, aidha kukutegekera engira yo mw'olibita.’

¹¹ Bwenebwene ka mbakobere, mu baali bazaaliibwa abakazi timubangamu asinga Yoanne Omubatiza, ate ng'asembayo mu Bwakyabazinga obw'omu igulu amusinga.

¹² Okuva mu byanda bya Yoanne okutuusa buti, Obwakyabazinga obw'omu igulu butwalibwa na maani, era abakozesa amaani n'ababutwala

¹³ kuba Amateeka n'Abalanzi boonaboona okutuukira irala ku Yoanne baayogera ku Bwakyabazinga buno.

¹⁴ Era oba nga mwenda okukimanha oyo ni Eliya ow'okwidha.

¹⁵ Ali n'amatu awulire.

¹⁶ “Abantu ab'oluse luno nnaabagerangerania ku ki? Bali ng'oti n'abaana abato abatyama mu biya baayeta abandi

¹⁷ nga babakoba bati, ‘Twabafuuyira endere timwakina, twakuba empungu, aye timwagegenga!’

¹⁸ “Yoanne yaidha nga talya era nga tanhwa, baakoba bati, ‘Aliku omuzimu omubi.’

¹⁹ Ate Omwana ow'Omuntu yaidha ng'alya era ng'anhwa, baakoba bati, ‘Mubone omusaadha omulyalya, omutamiivu, mukagwa w'abaghooza era n'aboonooni.’ Ate nga obutuufu bw'amagezi bubonekera mu bikolwa byago.”

Okudaazibwadaazibwa okulituuka ku bibuga ebiteenenia

²⁰ Agho Yesu yaatoolera okuvumirira ebibuga mwe yali akoleire ebyewuunhio kamaala, ni biroba okwenenia.

²¹ Yaakoba ati: “Abantu ab'e Korazini, mukagwireku! N'abe Bethisaida, mukagwireku! Kuba ebyewuunhio ebikolerwa mu imwe nguli byali bikoleirwa mu Tiro ni Sidoni, nguli beenenia, baavaala ekutiya, beebbaaka n'eivu.

²² Aye ka mbakobere: Ku lunaku olw'okusalirwaku omusango, Tiro ni Sidoni birisaasirwa okusinga imwe.

²³ Ate imwe abantu be Kaperinaumu, koodhi mwegulumiza kwenda kutuuka bwa mu igulu? Mwidha kwisibwa bwa mu magombe kuba nguli ebyewuunhio ebyabaagho mu imwe byali kubaagho mu Sodoma, nguli kikaaligho n'okutuusa olwaleero.

²⁴ Aye ka mbakobere: Ku lunaku olw'okusalirwaku omusango, Sodoma kirisaasirwa okusinga imwe.”

Mwidhe ye ndi muwuumule

²⁵ Mu kiseera ekyo Yesu yaakoba ati: “Lata nkusaaka, Musengwa ow'eigulu n'ensi, kuba bino wabigisa abagezi n'abamanhi, waabimanhisa abato.

²⁶ N'agh'agho Lata, kuba iwe otyo bwe wasiima.

²⁷ “Byonabyona Lata wange yabingemya, era ghazira aidhi Mwana okutoolaku Lata, waire aidhi Lata okutoolaku Mwana, n'oyo Mwana y'aba asiimye okumumanhisa.

²⁸ “Mwidhe ye ndi imwe mwenamwena abadaaga n'abali n'ebibavuna, ndidha kubawuumuza.

²⁹ Mubbeede ekikoligo kyange, era mundhegereku kuba nze ndi muwombeefu era tyegulumiza agho emyoyo gyaimwe giribatereera

³⁰ kuba ekikoligo kyange kyangu, n'omugugu gwange mugheghere.”