Matayo 10 - Baibuli Ekibono kya Katonda 2014

Eikumi n'Ababiri

¹ Agho Yesu yaayeta Abeegeresebwa be Eikumi n'Ababiri, yaabagha obuyinza ku mizimu emibi bagibingenga era bawonienga kiisi bulwaire na bugodhe.

² Amaina ag'Abatume eikumi n'Ababiri ni gano: asooka ni Simoni ayetebwa Petero, ni Anderea muganda we, ni Yakobo mutabane wa Zebedaayo ghalala ni Yoanne muganda we.

³ Filipo ni Barutholomayo, Thomasi ni Matayo omughooza, Yakobo mutabane wa Alufaayo ni Thaddaayo,

⁴ Simoni Omukananayo ni Yuda Isikarioti eyamulyamu olukwe.

Eikumi n'Ababiri batumibwa

⁵ Bano Eikumi n'Ababiri Yesu be yatuma, yaabalagira ati: “Mutajanga mu biketezo bya bamaghanga gandi, era mutangiranga mu bibuga bya Basamaria.

⁶ Aye, muje eri entaama edhaabula edh'omu ndhu ya Isiraeli.

⁷ Bwe muja mubakobenga muti, ‘Obwakyabazinga obw'omu igulu buseese.’

⁸ Abalwaire mubawonianga, abafu mubazuukizanga, abali n'endwaire ey'ebigenge mubalongoosanga, emizimu emibi mugibinganga. Mwafuna kya busa mwena mukigheerenga busa.

⁹ Timutwalanga zaabu, waire feeza, waire mpiiya,

¹⁰ waire nsawo ya lugendo oba ebivaalo ebibiri, waire ngaito oba mwigo kuba omukozi agwana okusasulwa enkemba ye.

¹¹ “Mu buli kibuga oba kyalo kye munaajangamu, mwagale aganha okubakyaza era agho ghe mube mubenga okutuusa lwe muva mu kifo ekyo.

¹² Ate nga mungira mu ndhu eyo, mukobanga muti, ‘Emiraala gibe n'imwe.’

¹³ Era endhu eyo bw'eba ng'egwaine, emiraala gyaimwe ginaagisigalangaku aye bw'eba tegwaine, emiraala gyaimwe ginaabairiranga.

¹⁴ Bwe ghabangagho omuntu yeenayeena aloba okubakyaza, oba okuwulira ebibono byaimwe, mukunkumulanga enkungu mu bigere byaimwe nga muva mu ndhu ye oba mu kibuga ekyo.

¹⁵ Bwenebwene ka mbakobere ku lunaku olw'okusalirwaku omusango, Sodoma ni Gomorra birisaasirwa okusinga ekibuga ekyo.

Abakoberaku ku kukirigibwa okw'okubaagho

¹⁶ “Bona, ndi kubatuma, nga muli oti ntaama ghagati mu misege. Kale ni mube bakabwidhibwidhi ng'emisota, ng'ate muli bawolu ng'oti njiibwa.

¹⁷ Mwekuume abantu kuba balibaghaayo mu mbuga, era ni mu sinagoga dhaibwe, balibakuba enkoba.

¹⁸ Balibatwala mu maiso ag'abafuzi ni bakyabazinga nga babalanga nze, mube badhulizi bange mu abo ni mu bamaghanga agandi.

¹⁹ Aye bwe babaghangayo muteeraliikiriranga kye munaayogera, oba kye munaakoba kuba mu kaseera keene ako munaagheebwanga eky'okwogera.

²⁰ Ti niimwe munaayogeranga ku bwaimwe, aye Mwoyo wa Iseimwe.

²¹ “Omuntu alighaayo muganda we okwitibwa ate omuzaire yaaghaayo omwana we, n'abaana balidheemera abazaire era baabaita.

²² Abantu boonaboona balibakyagha olw'eriina lyange. Aye oyo alyekalangula okutuusa ku nkomerero, alirokolwa.

²³ Era bwe babakiriganga nga muli mu kibuga kino, mulumukiranga mu kindi kuba bwenebwene mbakobera: Timulimaza bibuga bya Isiraeli ng'Omwana w'Omuntu akaali kwidha.

²⁴ “Ayegeresebwa tasinga amwegeresa, waire omugheereza okusinga musengwa we.

²⁵ Kimala ayegeresebwa okuba ng'omwegeresa we, n'omugheereza okuba nga Musengwa we. Kale oba nga mwenemu bamweta Beelezebulu, memale leero balyaza gha okubiiya ab'omu maka ge!

Ateekwa okutiibwa

²⁶ “Kale abo mutabatyanga kuba ghazira kibwikiibwa kitalibwikulibwa, oba ekigisiibwa ekitalimanhibwa.

²⁷ Kye mbakobera mu kizikiiza, mukyogeranga mu musana ate kye muwulira mu kyama, mukirangiriranga ghaigulu ku mayumba.

²⁸ Mutatyanga abo abaita omubiri aye nga tibaghanga kwita mwoyo, aye mutye oyo aghanga okuzikiriza omwoyo n'omubiri mu geyeena.

²⁹ Kale enkazaluya eibiri tidhigula sente ndala eti? Ate nga ghazira ndala ku edho egwa ku itaka nga Lata waimwe tayenze.

³⁰ Aye imwe n'enviiri edh'oku mitwe gyaimwe dhoonadhoona mbale.

³¹ Kale ni mulekenga kutya, muli ba mughendo okusinga enkazaluya kamaala.

Okwatula n'okwegaana Kurisito mu bantu

³² “Kale, kiisi ayatula mu maiso ag'abantu ati wange, nze zeena ndikobera Lata wange ali mu igulu nti wange.

³³ Ate kiisi alineegaana mu maiso ag'abantu, nze zeena ndimwegaana mu maiso ga Lata wange ali mu igulu.

Ti miraala aye ntalo

³⁴ “Mutadhuuba muti naidha kuleeta miraala ku nsi tyaidha kuleeta miraala, aye ntalo.

³⁵ Kuba naidha okuleetagho obutaisania ghagati gh'omwana ni lata we, ghagati gh'omughala n'inhina, ghagati gha namughala n'inhazaala we.

³⁶ Era abazigu b'omuntu banaabanga ba mu ndhu beene.

³⁷ “Oyo agonza lata we oba inhina okusinga nze, tangwanira, n'oyo agonza mutabane oba mughala we okusinga nze, tangwanira.

³⁸ Oyo atabbeeda musalaba gwe n'annonereza, tangwanira.

³⁹ Oyo agezaaku okuwonia obulamu bwe abufiirwa, ate oyo afiirwa obulamu bwe olw'okuba nze abuwonia.

Omuntu ky'afuna olw'ekikolwa kye

⁴⁰ “Asangaalira imwe, aba asangaaliire nze ate asangaalira nze aba asangaaliire ole eyantuma.

⁴¹ Oyo asangaalira omulanzi olw'okuba nga mulanzi, empeera alifuna ya mulanzi n'oyo asangaalira omuntu akola ebituufu olw'okuba akola ebituufu, empeera alifuna ya muntu mutuufu.

⁴² Era yeenayeena aligha omulala ku bato bano olwendo olw'amaadhi amainhogovu okunhwa, olw'okuba Mwegeresebwa wange, bwenebwene mbakobera nti taliroba kufuna mpeera ye.”