Mariko 9 - Baibuli Ekibono kya Katonda 2014

¹ Yaabakoba ati: “Bwenebwene ka mbakobere, ghaligho abandi ku bemereire ghano abatalirega ku kufa okutuusa lwe balibona Obwakyabazinga bwa Katonda nga bwidha n'amaani.”

Okufuuka obundi okwa Yesu

² Nga ghabiseegho enaku mukaaga, Yesu yaagema ku Petero ku Yakobo ni ku Yoanne, yaaja nabo bonka eyo embali ku lusozi oluleeyi eyo, yaafuuka obundi, nga babona.

³ Ebivaalo bye byamesunkana, nga byeru inho, nga ghazira na mwozi mu nsi aghanga kubyamula atyo.

⁴ Agho Eliya ni Musa baababonekera nga bali kwogera ni Yesu.

⁵ Petero yaakoba Yesu ati: “Mwegeresa, tulongoire twaba ghano era ka tuseemente entindi isatu, eyiyo eya Musa n'eya Eliya!”

⁶ Yali taidhi ky'ayogera, kuba baali batiire inho.

⁷ Agho ekireri kyavaayo kyabakingiriza, era eiroboozi lyava mu kireri liti: “Ono ni mutabane wange omugonzi, mumuwulirenga.”

⁸ Mangu ago, okuja okulingalinga nga ghazira muntu wundi ye babona, okutoolaku Yesu yenka ni beene.

⁹ Bwe baali baikirira ku lusozi, yaabasikirira obutakoberaku muntu kye baboine okutuusa Omwana w'Omuntu ng'azuukiire mu bafu.

¹⁰ Era ekibono kino baakitereka mu beene, ng'eno bwe beebuuzagania okuzuukira mu bafu kye kitegeeza.

¹¹ Era baamubuuza bati: “Lwaki Abanamateeka bakoba bati Eliya n'ateekwa okusooka okwidha?”

¹² Yaabairamu ati: “Kituufu Eliya asooka okwidha okutereeza byonabyona era nga bwe kyaghandiikibwa ku Mwana w'Omuntu, wa kudaazibwadaazibwa ebintu kamaala n'okutwalibwa ng'ekitagasa.

¹³ Aye ka mbakobere, Eliya yaidha ira! Baamukola nga bwe baayenda, nga bwe kyali kimughandiikiibwaku.”

Aliku omuzimu omubi awonezebwa

¹⁴ Bwe baatuuka aghaali Abeegeresebwa be, baabona ekiyindi eky'abantu ekinene nga kibeetooloire, n'Abanamateeka nga babatakania.

¹⁵ Era mangu ago abantu olwamulengera, baasamaalirira n'okwewuunhia, baamulumuukirira baamulamusa.

¹⁶ Yesu yaababuuza ati: “Kiki ekibatakania nabo?”

¹⁷ Agho mulala mu kiyindi yairamu ati: “Mwegeresa nkuleeteire mutabane wange aliku omuzimu omubi gu kasiru.

¹⁸ Buli lwe gumwidhaku, gumutandigira ghansi, yaafuukeera eiwovu mu kanwa, yaaluma emba, yaakadambala. Nsabye Abeegeresebwa bo bagumubingeku, aye tibasoboire.”

¹⁹ Yesu yaakoba ati: “Yii, oluse luno oluzira kwikiriza! Ndituusa gha okuba n'imwe? Ndituusa gha okubaguminkiriza? Mumundeetere ghano.”

²⁰ Baamuleeta gh'ali. Era olwamubona, omuzimu gwamusikambula. Mangu ago gwamutandigira ghansi, yeegalangula bw'afuukeera eiwovu mu kanwa.

²¹ Agho Yesu yaabuuza lata we ati: “Amaze ntangama ki ng'ali ati?”

²² Yaamukoba ati: “Kuva mu buto. Era emikuzi kamaala nga gumusuula mu muliro ni mu maadhi, gumwite. Aye oba nga ghaligho ky'osobola okutukolera, tusaasire, otuyambe.”

²³ Yesu yaamukoba ati: “Waakoba oti oba nsobola! Byonabyona bisoboka y'oyo aikiriza.”

²⁴ Mangu ago lata w'omwana yaayogerera ghaigulu, nga n'okulira bw'alira, ati: “Isebo, ndhikiriza, aye nhamba mu butaikiriza bwange.”

²⁵ Yesu olwabona ng'eikuukuubira ery'abantu lyesoloza yaakaabukira omuzimu omubi, yaagukoba ati: “Muzimu iwe kasiru era masighale, nze nkulagira ono muveeku, era toirangayo kumwidhaku.”

²⁶ Agho omuzimu gwayana era gwasikambula inho omulenzi, gwamuvaaku. Yaaba oti afiire era abantu kamaala baakoba bati: “Afiire!”

²⁷ Aye Yesu yaamugema ku mukono yaamusitula, era yaayemerera.

²⁸ Yesu bwe yangira mu ndhu Abeegeresebwa be baamubuuza mu kyama bati: “Lwaki ife titughanze kugubinga?”

²⁹ Yaabakoba ati: “Ekika ekyo tikibingibwa mu ngeri yoonayoona, okutoolaku mu kusaba.”

Yesu kabiri ayogera ku kufa ni ku kuzuukira kwe

³⁰ Olwava agho, beeyongerayo nga basalira mu Galilaaya era nga tayenda ghabeegho amanha.

³¹ Kuba yayegeresa Abeegeresebwa be ati: “Omwana w'Omuntu aja kugheebwayo mu mikono egy'abantu bamwite, era nga ghabise enaku isatu nga bamaze okumwita aidha kuzuukira.”

³² Aye ekibono kye yali abakoba tibaakitegeera, ate baatya okumubuuza.

Naani asinga obubbede

³³ Agho baatuuka e Kaperinaumu. Nga bangiire mu ndhu yaababuuza ati: “Mu ngira mubaire mwogera ku ki?”

³⁴ Aye baasirika busirike, kuba mu ngira baaja nga batakana bati naani mu beene asinga obubbede.

³⁵ Yesu yaatyama yaayeta Eikumi n'Ababiri, yaabakoba ati: “Oyo ayenda okuba asooka, ali na kuba inhuma wa boonaboona era mugheereza wa boonaboona.”

³⁶ Agho yaagema omwana omuto yaamuta ghagati ghaibwe, yaamulera, yaabakoba ati:

³⁷ “Oyo asangaalira omuto oti n'ono mu liina lyange, asangaalira nze ate kiisi ansangaalira tasangaalira nze, aye ole eyantuma.”

Omuntu atatutakania aba munaife

³⁸ Agho Yoanne yaakoba ati: “Mwegeresa twabona omuntu ng'ali kubinga emizimu emibi mu liina lyo ate nga tabita n'ife, twamulobera.”

³⁹ Aye Yesu yaakoba ati: “Timumuloberanga, kuba ghazira oyo akola kyewuunhio mu liina lyange ate mu kiseera n'ekirala n'asobola okundhogeraku obubi

⁴⁰ kuba atatutakania aba munaife.

⁴¹ “Era kiisi yeenayeena alibagha olwendo olw'amaadhi okunhwa mu liina lyange, kuba muli ba Kurisito, bwenebwene mbakobera nti taliroba kufuna mpeera ye.

Ebisendasenda okwona

⁴² “Oyo yeenayeena aleetera omulala ku bato bano abandhikiriza okukola ekibi, ekyandiwuze, oyo n'okusibibwa olubengo olunene mu nkoto n'asuulibwa mu nhandha.

⁴³ Era omukono gwo bwe guba gukusendasenda okwona, gutemeku kasinga ofune obulamu ng'oli n'omukono mulala, okusinga okuba n'emikono ebiri waaja mu geyeena, mu muliro ogutazikira. [

⁴⁴ Enhengere dhaibwe mwe dhitafiira waire omuliro okuzikira.]

⁴⁵ “Era oba nga ekigere kyo kikusendasenda okwona, kitemeku kasinga ofune obulamu ng'oli mulema, okusinga okuba n'ebigere byombi waasuulibwa mu geyeena. [

⁴⁶ Enhengere dhaibwe mwe dhitafiira waire omuliro okuzikira.]

⁴⁷ “Era oba nga eriiso lyo likusendasenda okwona, litoolemu ongire mu Bwakyabazinga bwa Katonda n'eriiso irala, okusinga okuba n'amaiso abiri waasuulibwa mu geyeena

⁴⁸ Enhengere dhaibwe mwe dhitafiira waire omuliro okuzikira.

⁴⁹ “Kuba buli muntu alirungwamu omuliro.

⁵⁰ Omuunhu mulungi. Aye omuunhu bwe guwaamu ensa oba okaalungamu ki? “Mube n'omuunhu mu bulamu bwaimwe era n'emiraala beene na beene.”