Mariko 8 - Baibuli Ekibono kya Katonda 2014

Yesu aliisa abantu enkumi eina

¹ Mu nnaku edho kabiri abantu baaba kamaala, nga bazira na ka kulya. Yaayeta Abeegeresebwa be yaabakoba ati:

² “Abantu bano bangemya ekisa, kuba buti enaku isatu nga bali ninze, aye bazira ka kulya!

³ Ate nga bwe mbasiibula ni bairayo eka nga bayala batyo, baidha kugwa ku ngira, kuba abandi bava ghala.”

⁴ Abeegeresebwa be baamwiramu bati: “Otoola gha ghano mu irungu emigaati egiigusa abo boonaboona?”

⁵ Yesu yaababuuza ati: “Muligho n'emigaati emeka?”

⁶ Baamwiramu bati: “Musanvu.” Yaalagira abantu batyame ghansi. Yaatoola emigaati omusanvu, yeeyanza, yaagimegulamegulamu, yaagigha Abeegeresebwa be bagabule era baakola batyo baagabula olukunkumuli olw'abantu.

⁷ Era baaliyo n'obwenhandha butono buti, bwona yaabugha enkabi nga yeebaza era yaakoba bwona babugabule.

⁸ Baalya, baiguta era baasoloza ebiibo musanvu eby'ebitundu ebyafiikagho.

⁹ Abaalya baali ng'oti nkumi ina (4,000).

¹⁰ Yaabasiibula, era tiyalwa yaaniina mu lyato n'Abeegeresebwa be baaja mu kiketezo eky'e Dalumanutha.

Abafarisaayo basaba akamanhiso

¹¹ Agho ghaidhagho Abafarisaayo, okutakana ni Yesu, baamuleba, nga bamwendaku akamanhiso okuva mu igulu.

¹² Yesu yaisa ekikoowu, yaakoba ati: “Lwaki abantu ab'enaku dhino benda akamanhiso? Bwenebwene ka mbakobere, ghazira kamanhiso kaidha kugheebwa bantu ba nnaku dhino!”

¹³ Yaabaleka yaaniina mu lyato kabiri, yaasomoka.

Ekizimbulukusa eky'Abafarisaayo n'ekya Herode

¹⁴ Bwe bwatuuka, ng'Abeegeresebwa be beerabira okuja n'emigaati okutoolaku omulala gwe baali nagwo mu lyato.

¹⁵ Yaabalabula yaabakoba ati: “Mwekuume, mwegendereze ekizimbulukusa eky'Abafarisaayo n'ekya Herode.”

¹⁶ Baakubagania ebidhuubo beene na beene ku kino nga mule bakoba bati: “Oba lwa butaba na migaati!”

¹⁷ Yesu olwakimanha, yaabakoba ati: “Lwaki mudhuuba ku ky'okubula emigaati? Mukaali kumanha waire kutegeera?

¹⁸ Emyoyo gyaimwe mikalangufu? Muli n'amaiso aye timubona? Era muli n'amatu aye timuwulira? Timwidhukira,

¹⁹ emigaati etaanu bwe nagimeguliramu abantu enkumi eitaanu? Biibo bimeka ebyaidhula ebitundu bye mwasoloza?” Baamukoba bati: “Ikumi na bibiri.”

²⁰ “Ate emigaati omusanvu bwe nagimeguliramu abantu enkumi eina, mwasoloza ebiibo ebiidhuvu eby'ebitundu bimeka?” Baakoba bati: “Musanvu.”

²¹ Agho yaabakoba ati: “Era mukaali kutegeera?”

Omutulu ow'e Bethisaida awonezebwa

²² Agho baatuuka e Bethisaida, ghaabaagho abaaleetera Yesu omutulu era baamweghemba amugemeku.

²³ Yaagema omutulu ku mukono, yaamutoola mu kibuga. Era ng'amaze okumufuudha ku maiso n'okumugemaku, yaamubuuza oba ng'aliku ni ky'abona.

²⁴ Agho yaalinga ghaigulu yaakoba ati: “Mbona abantu bali ng'oti miti gitambula.”

²⁵ Agho kabiri yaamugema ku maiso, omusaadha yaabona era yaabonera irala bukalamu byonabyona.

²⁶ Agho yaamusindika eka ng'akoba ati: “Otangira na mu kibuga.”

Okwatula kwa Petero

²⁷ Yesu n'Abeegeresebwa be baava agho baaja mu byalo bya Kaisaria Filippi mu ngira yaabuuza Abeegeresebwa be ati: “Abantu nze bandheta batya?”

²⁸ Baamukoba bati: “Yoanne Omubatiza, abandi bati Eliya, ate abandi bati mulala ku balanzi.”

²⁹ Agho era yaababuuza ati: “Kale imwe mundheta mutya?” Petero yaamukoba ati: “Niiwe Kurisito.”

³⁰ Yesu yaabasikirira balobe kubaaku ye bakobera ku bimufaaku.

Yesu ayogera ku kudaazibwadaazibwa kwe n'okufa kwe

³¹ Yaatoolera okubeegeresa ng'Omwana w'Omuntu bwateekwa okudaazibwadaazibwa einho, okwegaanibwa abakulu ab'ebika, Bakabona Abakulu, n'Abanamateeka, n'okwitibwa, era nga ghabise enaku isatu azuukire.

³² Ekibono kino yakyogerera irala mu lwatu. Agho Petero yaamwiza gha mbali yaamugaya.

³³ Yesu yaakyuka yaalingirira Abeegeresebwa be, yaadhuuka Petero ati: “Nva mu maiso, Sitaani! Kuba tofa ku bya Katonda, ofa ku bya bantu!”

³⁴ Agho yaayeta ekiyindi eky'abantu n'Abeegeresebwa be baaseeta gh'ali, yaabakoba ati: “Ole ayenda okuunonereza, alobe kwefaaku naire, abbeede omusalaba gwe, annonereze

³⁵ kuba ayenda okuwonia obulamu bwe, oyo abubuza bubuze aye abuza obulamu bwe ku lwange n'olw'Amawulire Amalungi, oyo abuzaawula.

³⁶ “Omuntu aganhulwamu ki okufuna ensi yoonayoona aye n'afiirwa obulamu bwe?

³⁷ Kintu ki omuntu ky'asobola okugha olw'obulamu bwe?

³⁸ Omuntu nze ye ngemya ensoni, n'ebibono byange ye bigemya ensoni mu nnaku dhino edh'abatatya Katonda n'aboonooni, yeena Omwana w'Omuntu alimugemerwa ensoni lw'aliira mu kitiisa kya Ise ni bamalaika abatukuvu.”