Mariko 7 - Baibuli Ekibono kya Katonda 2014

Okwegeresa ku mpisa edh'Abayudaaya

¹ Agho olwatuuka, ng'Abafarisaayo n'abandi ku Banamateeka okuva e Yerusalemu baidha aghaali Yesu.

² Baabona ng'Abeegeresebwa be abandi balya n'engalo embi, nga tibanaabye.

³ Ate nga Abafarisaayo n'Abayudaaya boonaboona, nga bajiira ku mpisa ya badhaadha baibwe, tibalya nga tibanaabye ngalo okutuusa mu nkokola.

⁴ Era nga bwe bava mu kiya, tibalya nga tibanaabye. Eriyo n'empisa edhindi kyodo dhe baali nga bajiiraku ng'okwamula amabuga, ebibya, ensugha, n'ebintu ebindi eby'ebyuma.

⁵ Kale Abafarisaayo n'Abanamateeka baamubuuza bati: “Lwaki Abeegeresebwa bo tibabisa mu mpisa ya badhaadha, baalya omugaati nga tibanaabye mu ngalo?”

⁶ Yesu yaabakoba ati: “Bakuusa imwe, Isaia yalanga bukalamu ku imwe nga bwe kyaghandiikibwa kiti, ‘Abantu bano bantaamu ekitiisa mu bibono bubono, aye omwoyo gwaibwe gundi ghala.

⁷ Bansinza mu nsinza eziramu, nga beegeresa endhegeresa abantu ye bataagho, yaaba ng'oti n'endhegeresa eyange.’

⁸ “Kale muleka eiteeka lya Katonda mwagema empisa edh'abantu.”

⁹ Era yaayongera yaabakoba ati: “Nga mwidhi bukalamu obutafa ku iteeka lya Katonda musobole okukuuma agaimwe!

¹⁰ Kuba Musa yakoba ati, ‘Lata wo ni inhoko obatangamu ekitiisa’, era ati, ‘Oyo avuma ise oba inhina aitibwenga bwitibwe.’

¹¹ Aye imwe mukoba muti ole bw'akoba ise oba inhina ati kyonakyona kye nandikughaire kiri ‘Korubani’, ekitegeeza kiti nakisengamu Katonda,

¹² ng'omuntu oyo timukaamuganha kuba na kantu k'akolera lata we oba inhina.

¹³ Mu nsambo oti n'eyo mudibya ekibono kya Katonda nga mwegeresa empisa dha badhaadha baimwe. Era n'ebindi kamaala eby'ensambo ng'oti n'eyo bye mukola.”

Ayegeresa ku byonoona omuntu

¹⁴ Agho Yesu kabiri yaayeta abantu gh'ali, yaabakoba ati: “Mumpulirise mwenamwena era mutegeere.

¹⁵ Ghazira kiva ku luya wa muntu ni kimwingiramu ni kimwonoona, aye ebyo ebiva mu muntu n'ebyonoona omuntu. [

¹⁶ Ali n'amatu agawulira, awulire.]”

¹⁷ Bwe yangira mu ndhu ng'aviire mu bantu, Abeegeresebwa be baamubuuza ku lufumo lwe.

¹⁸ Aye yaabakoba ati: “Mwena obwo timutegeire? Timubona nga buli kintu ekiva ku luya okungira mu muntu tikighanga kumwonoona?

¹⁹ Kuba tikingira mu mwoyo gwe, aye kija mu nda, ate era yaakifulumya.” Mu ngeri eno yaakakasa ati emere yoonayoona nungi.

²⁰ Yaakoba ati: “Ekiva mu muntu n'ekyonoona omuntu

²¹ kuba mu mwoyo ogw'omuntu n'omuva ebidhuubo ebibi, obwenzi, obwibi, obutemo,

²² omuluulu, omulyakubi, obugwenhufu, obuguya, ensaalwa, okughaayiriza, olunkulu n'obusirusiru.

²³ Ebibi bino byonabyona biva mu muntu era byayonoona omuntu.”

Okwikiriza kw'omukazi Omusurofenisia

²⁴ Olwava agho yaasituka yaaja mu biketezo eby'e Tiro ni Sidoni, yangira mu ndhu nga tayenda ghabeegho amanha, aye tiyasobola kwegisa.

²⁵ Ghaaligho omukazi eyali ni kaghala ke nga kaliku omuzimu omubi. Oyo olwamuwuliraku yaidha yaakuba amakiryaivu gha bigere bye.

²⁶ Omukazi ono yali Mugureki, nga wa ighanga lya Surofenisia yaasaba Yesu abinge omuzimu ku kaghala ke.

²⁷ Aye Yesu yaamukoba ati: “Linda abaana baigute memale, kuba ti kituufu okutoola omugaati ogw'abaana n'ogusuulira bubwa!”

²⁸ Omukazi yairamu, yaakoba ati: “N'agh'agho, Musengwa aye n'obubwa, bulya ku bukunkumuka abaana bwe bamagaza nga balya.”

²⁹ Yesu yaamukoba ati: “Oba bw'okobye, ja, omwana wo omuzimu gumuviireku.”

³⁰ Era yairayo eka yaayagaana omwana ng'alambaire ku buliri, ng'omuzimu gumulese.

Awonia omusigha era atayogera bukalamu

³¹ Agho kabiri yaava mu kiketezo ky'e Tiro, yaabita mu Sidoni okuja ku nhandha ey'e Galilaaya, ng'abitira irala mu kiketezo eky'e Dekapoli.

³² Baamuleetera omusigha era atayogera bukalamu, baamweghemba amugemeku.

³³ Agho yaamutoola mu bangi, yaamwiza gha mbali, yaamuta engalo mu matu, yaafuudha, yaamugema ku lulimi

³⁴ yaalinga ghaigulu, yaisa omuuka, yaakoba ati: “Effatha!” Ekitegeeza kiti: “Iguka.”

³⁵ Okutemya n'okuzibula ng'amatu gaiguka, n'olulimi lwasibulukuka, yaayogera bukalamu.

³⁶ Yesu yaabasikirira obutakobera muntu yeenayeena aye ye yakoma okubasikirira, beene ye baakoma okubyogera.

³⁷ Era beewuunhia inho baakoba bati: “Byonabyona abikola bukalamu. Abasigha abazibula amatu, ni bakasiru aboogeza!”