Mariko 6 - Baibuli Ekibono kya Katonda 2014

Yesu atuuka e Nazarethi

¹ Yesu yaava agho, yaaja ewaibwe, n'Abeegeresebwa be baamunonereza.

² Olwa Sabbato bwe lwatuuka, yaatoolera okwegeresa, mu sinagoga. Abantu kamaala abaamuwulira beewuunhia baakoba bati: “Ono bino abitoola gha? Magezi ga kika ki agaamugheebwa, n'ebyewuunhio ebyaga agho n'asobola okubikola!

³ Ono ti n'omubaadhi mutabane wa Maria? Ti muganda wa Yakobo, ni Yose, ni Yuda, ni Simoni? Baanhina tituli nabo kuno?” Kale baamuboola.

⁴ Yesu yaabakoba ati: “Omulanzi azira ye batamutaamu kitiisa okutoolaku mu kyalo ky'ewaibwe, mu b'enda ye, ni mu b'endhu ye.”

⁵ Eyo tiyaghanga kukolerayo kyewuunhio naire, okutoolaku yawonia abalwaire batonotono ng'abagemaku.

⁶ Era yeewuunhia inho obutaikiriza bwaibwe. Yaabitabita mu byalo ebiriinaine agho ng'ayegeresa.

Okutuma Eikumi n'Ababiri

⁷ Agho yaayeta Eikumi n'Ababiri era yatoolera okubatuma babiri babiri, yaabagha n'obuyinza ku mizimu emibi.

⁸ Yaabalagira obutatwala kintu kyonakyona mu lugendo lwaibwe, okutoolaku mwigo gwonka, aye tiikutwala mugaati, waire ndyanga, waire mpiiya mu nsibiro dhaibwe.

⁹ Yaabakoba bateemu engaito, aye batavaala bivaalo bibiri.

¹⁰ Era yaabakoba ati: “Buli ndhu ye mungirangamu, mubanga omwo okutuusa lwe muvaayo.

¹¹ Ate mu kifo kyonakyona mwe batabasangaalira waire okubawulira, bwe mubanga mukivaamu mukunkumulanga enkungu eri mu bigere byaimwe, kabe akamanhiso okubalaga nti musango gwaibwe.”

¹² Kale baaja nga balangirira okwenenia.

¹³ Baabinga emizimu kamaala era baawonia abalwaire kamaala nga babasiiga omuzigo.

Okufa kwa Yoanne Omubatiza

¹⁴ Agho Herode kyabazinga yaawulira ku Yesu, kuba eriina lye lyali limanhikaine inho era abandi nga bakoba bati: “Yoanne Omubatiza n'azuukiire mu bafu era kyava akola ebyewuunhio”.

¹⁵ Abandi baakoba bati: “Oyo Eliya.” Abandi baakoba bati: “Oyo mulanzi, ng'abalanzi abandi.”

¹⁶ Herode olwakiwulira yaakoba ati: “Yoanne ye natemaku omutwe n'oyo azuukiire!”

¹⁷ Herode mwene oyo n'eyatuma bageme Yoanne, era yaamuta mu ikomera olwa Herodia ye yali asigwire ku muganda we Filipo

¹⁸ kuba Yoanne yakobanga Herode ati: “Tikiikirizibwa iwe okusigula muka muganda wo.”

¹⁹ Olw'ekyo Herodia yeegemerera Yoanne nga yeeguguna na kumwita, aye yaaloba kusobola.

²⁰ Herode yali atya Yoanne, ng'amwidhi bw'ali omuntu omutuufu era omutuukirivu n'okumukuumanga obukalamu. Yayagaananga obuzibu mu bye yayogeranga, aye ng'amuwulirisa bukalamu.

²¹ Aye olunaku lwatuuka, Herodia yaafuna akakisa. Lwali lunaku lwa mazaalibwa ga Herode. Era Herode oyo yaagabula abaami, n'abakulu ab'abaisirukale, n'abataka abakulu mu Galilaaya.

²² Ku mbaga eyo mughala wa Herodia bwe yangira n'akina, Herode n'abageni be basiima. Agho Herode yaakoba omughala ati: “Nsaba kyonakyona ky'oyenda ndidha kukikugha.”

²³ N'okwefuugha yeefuugha ati: “Kyonakyona ky'onansaba ndidha kukikugha, waire kukwawuliraku ku bwakyabazinga bwange.”

²⁴ Omughala yaafuluma yaakoba inhina ati: “Nsabe ki?” Mukaire we yaakoba ati: “Omutwe gwa Yoanne Omubatiza.”

²⁵ Omughala yaayangughaku okwira eri Herode yaamukoba ati: “Nhenda butibuti, ompe ku lusowaani omutwe gwa Yoanne Omubatiza.”

²⁶ Kino Herode kyamukosa inho, aye olw'okuba yali yeefuuye ate n'olw'abageni be, yali tasobola kuloba.

²⁷ Kale mangu ago, yaalagira omwisirukale aje aleete omutwe gwa Yoanne. Era omwisirukale yaaja mu ikomera yaatema ku Yoanne omutwe.

²⁸ Yaaleeta omutwe nga guli ku lusowaani yaagugha omughala, ate omughala yaagugha inhina.

²⁹ Abeegeresebwa be bwe baawulira baaja, baatwala omulambo baaguziika mu magombe.

Yesu aliisa enkumi eitaanu

³⁰ Abatume bwe baira aghaali Yesu baamukobera byonabyona bye baakola ni bye baayegeresa.

³¹ Yaabakoba ati: “Mwidheku embali ezira bantu, ye munaaghanga okuba mwenka mughegheereku katono.” Kuba abantu kamaala baidhanga bwe baja, baabula obugheereso nga tibaghanga na kulya.

³² Agho baaniina mu lyato baaja bonka mu kifo omuzira bantu.

³³ Abantu kamaala baababona nga baja era baabamanha. Kale abantu okuva mu bibuga byonabyona baalumuka ku bigere baabeesookayo.

³⁴ Yesu bwe yali atuuka ku bukalu ati yaabona eikuukuubira ery'abantu, yaabasaasira, kuba baali oti n'entaama edhiziraku mwayi. Agho yaatoolera okubeegeresa ebintu kamaala.

³⁵ Ebiseera bwebyaja nga biseenena, Abeegeresebwa be baidha baamutuukirira baamukoba bati: “Kino ekifo timuba bantu ate n'obwire bujiire

³⁶ siibula abantu baje mu biya okumpimpi ni mu byalo beegulireyo kye banaalya.”

³⁷ Yesu yaabakoba ati: “Imwe mubaghe balye.” Baamukoba bati: “Tuje tugule emigaati egy'edinari ebikumi ebibiri (200) tubaghe balye!”

³⁸ Yesu yaabakoba ati: “Muligho n'emigaati emeka? Muje mubone.” Olwamanha baamukoba bati: “Etaanu n'ebyenhandha bibiri.”

³⁹ Agho yaalagira babatyamye mu bikunsu ku busubi.

⁴⁰ Baabatyamya mu bikunsu bya kikumi kikumi n'ataanu ataanu.

⁴¹ Agho yaatoola emigaati etaanu n'ebyenhandha ebibiri, yaalinga ghaigulu, yaabigha enkabi nga yeebaza yaamegulamegulamu emigaati yaagha Abeegeresebwa be bagabule abantu. N'ebyenhandha ebibiri yaabigabania mu boonaboona.

⁴² Boonaboona baalya baiguta.

⁴³ Abeegeresebwa baasoloza ebiibo ikumi na bibiri ebiidhuvu eby'ebitundu ebyasigala ku migaati n'ebyenhandha.

⁴⁴ Ku baalya emigaati, abasaadha baali enkumi itaanu (5,000).

Yesu atambulira ku maadhi

⁴⁵ Tibwalwa, Yesu yaalagira Abeegeresebwa be baniine eryato basomoke enhandha, beesookengayo e Bethisaida, mwene ng'asiibula abantu.

⁴⁶ Bwe yamala okubasiibula, yaaja ku lusozi okusaba.

⁴⁷ Agho obwire bwaziba, ng'ab'omu lyato bali mu nhandha ghagati, ate nga mwene ali yenka ku bukalu.

⁴⁸ Yaabalengera nga bali kufaabiina n'enkasi kuba empewo yali ebava mberi, era agho nga buli kumpi okukya yaabatuukaku ng'ali kutambulira ku maadhi. Yaayenda okubabitaku,

⁴⁹ aye bale olwamubona ng'ali kutambulira ku maadhi baadhuuba bati musambwa era baayana.

⁵⁰ Kuba boonaboona baamubona, baatya inho. Aye mangu ago yaayogera nabo, yaabakoba ati: “Mugume emyoyo, ninze mutatya.”

⁵¹ Agho yaaniina mu lyato mwe baali empewo yaalekera agho, baayasaamirira inho,

⁵² kuba n'eky'emigaati baali tibakitegeire olw'obukalangufu obw'emyoyo gyaibwe.

Awonia abalwaire e Gennesareti

⁵³ Bwe baasomoka, baatuuka mu kiketezo eky'e Gennesareti, baatuuka ku bukalu.

⁵⁴ Olwava mu lyato bati, Yesu baamutegeera mangu ago.

⁵⁵ Baabitabita mu kiketezo kyonakyona, era baatoolera okutwalira abalwaire ku ndiri buli ghe baawuliranga bati Yesu gh'ali.

⁵⁶ Era kiisi ghe yajanga, mu byalo, oba mu bibuga, oba mu buduuka, abalwaire nga babata mu biya era baamweghemba abaganhe kasinga bagemeku bugeme ku lusa olw'ekivaalo kye era boonaboona abaakigemaku, baawona.