Mariko 5 - Baibuli Ekibono kya Katonda 2014

Omuntu eyaliku emizimu e Gerasa

¹ Agho Yesu n'Abeegeresebwa be baasomoka enhandha baaja eruuyi ere mu kiketezo eky'e Gerasa.

² Bwe yali ava mu lyato ati, mangu ago omuntu aliku omuzimu omubi yaidha gh'ali ng'ava mu lwambiidhi omwaziikibwanga abantu.

³ Yali asula mu lwambiidhi omwo, nga ghazira aghanga kumusiba waire na ndhegere.

⁴ Emikuzi kamaala yali asibibwa endhegere aye nga adhikutula bukutule, era nga ghazira amughanga.

⁵ Omusana n'obwire yabanga eyo mu lwambiidhi ni mu nsozi ng'ayasiikana bwe yeekulubula n'amabaale.

⁶ Olwalengera Yesu yaalumuka yaidha yaamusinza,

⁷ era yaayasiikana ati: “Yesu Omwana wa Katonda Ali Ghaigulu Yeene onhendeza ki? Mu ga Katonda otandaazadaaza!”

⁸ Kuba Yesu yali akobye ati: “Iwe omuzimu omubi, va ku muntu ono!”

⁹ Agho Yesu yaamubuuza ati: “Eriina lyo niiwe ani?” Yaamukoba ati: “Ninze Igye, kuba tuli kamaala.”

¹⁰ Era yeeghemba inho Yesu alobe kubabinga mu nsi eyo.

¹¹ Okumpi agho ku lusozi ghaaligho embiidhi edhaali dhiri kulya.

¹² Agho emizimu n'okusaba Yesu giti:

¹³ “Tusindike mu mbiidhi omwo, tube omwo.” Yaagiganha, gyamuvaamu gyangira mu mbiidhi era ekighaso kyonakyona eky'embiidhi edhaali dhighera ng'enkumi eibiri (2,000) dhaalindimukira ku kiyiriro, dhaagwa mu nhandha dhaadimira.

¹⁴ Abaali bali kudhaaya baalumuka baaja baakobera ab'omu kibuga n'ab'omu byalo, era abantu baidha okubona ebibairegho.

¹⁵ Era baatuuka aghaali Yesu baalingirira omuntu eyaliku eigye eiramba ery'emizimu, ng'atyaime, avaire, era ng'ategeera bukalamu, baatya!

¹⁶ Abo abaali baboine ebyaligho ku muntu eyaliku emizimu, ni ku mbiidhi, babaghayira nga bwe byali.

¹⁷ Agho ni baatoolera okweghemba Yesu ave mu kiketezo kyaibwe.

¹⁸ Yesu bwe yali ng'aniina mu lyato, ole eyaliku emizimu yaamusaba baje boona.

¹⁹ Yesu tiyaganha, aye yaamukoba ati: “Ja eka ye ab'ewaimwe obakobere Musengwa by'akukoleire n'ekisa ky'akulaze.”

²⁰ Yaaja era yaatoolera okukobera ab'omu kiketezo eky'e Dekapoli Yesu kye yamukolera, era boonaboona baayasaamirira.

Mughala wa Yairo n'omukazi ow'ekikulukuto

²¹ Kabiri Yesu bwe yasomoka eruuyi ere, abantu kamaala inho beesololeza gh'ali, era ng'ali kumpi n'enhandha.

²² Agho mulala ku bakulu ba sinagoga, eriina lye nga ni Yairo, yaidha. Bwe yabona Yesu, yaakuba amakiryaivu gha bigere bye,

²³ yaamweghemba inho ati: “Mughala wange ali kumpi kufa, idha omugemeku awone, abe mulamu.”

²⁴ Agho Yesu yaaja naye, n'eikuukuubira ery'abantu lyamunonereza era baaja nga bamwenhigirizaaku.

²⁵ Ghaaligho omukazi eyali alwaire ekikulukuto okumala emyaka ikumi n'ebiri.

²⁶ Yaadaagira mu bayigha kamaala yaaghaayo ebibye byonabyona, aye yaabulayo amuwonia, yeeyongeranga bweyongere okuba obubi.

²⁷ Bwe yawulira ku Yesu, yaidhira emugongo mu ikuukuubira yaagema ku kivaalo kye.

²⁸ Kuba yakoba mule ati: “Nguli ngema kasinga ku kivaalo kye ndidha kuwona.”

²⁹ Tibwalwa ng'omusaayi gulekera era ni mwene mule yaawulira ng'awonie ekirwaire.

³⁰ Mu kiseera kyene ekyo Yesu yaamanha nga ghaligho amaani agamuviiremu, era n'okugaluka n'abuuza eikuukuubira ery'abantu ati: “Naani agemye ku bivaalo byange?”

³¹ Abeegeresebwa be baamukoba bati: “Weena obona abantu bwe bali kukwenhigirizaaku aye era waabuuza akugemyeku?”

³² Aye Yesu yaamagamaga abone eyali akikoze.

³³ Omukazi yaatya era yaadhugumira, ng'ategeire ekimukoleirwa. Yaidha yaakuba amakiryaivu agho mu maiso ga Yesu yaamukobera byonabyona nga bwe byali.

³⁴ Agho Yesu yaamukoba ati: “Mwana wange, okwikiriza kwo kukughaire obwibuka, ja bwera era sagaalukira irala.”

³⁵ Yali akaayogera, abaava ew'omukulu wa sinagoga baidha baakoba bati: “Mughala wo afiire! Omwegeresa okaamudaagiza ki?”

³⁶ Ekyo Yesu yaaba oti takiwuliire, yaakoba omukulu wa sinagoga ati: “Otatya, ikiriza bwikirize.”

³⁷ Tiyaganha muntu yeenayeena kumunonereza okutoolaku Petero ni Yakobo ni Yoanne muganda wa Yakobo.

³⁸ Baatuuka mu ndhu ey'omukulu wa sinagoga baabona okuwowoigana okw'amaani, abali kugegenga n'abali kukuba empungu.

³⁹ Yesu bwe yangira yaabakoba ati: “Lwaki muwowoigana era mwagegenga mutyo? Omwana tafiire, atendwike butenduke.”

⁴⁰ Baamusekerera, aye yaabafulumya ku luya yaasigaza ise w'omwana n'inhina ni bale abaali naye bangira aghaali omwana.

⁴¹ Agho yaagema omughala ku mukono yaamukoba ati: “Talitha Kumi”, ekitegeeza kiti: “Iwe omughala nkukoba situka.”

⁴² Mangu ago omughala yaasituka yaatambula, kuba yali wa myaka ikumi n'ebiri. Era kino kyabeewuunhisa ekibitiriire.

⁴³ Yesu yaabasikirira obutakobera muntu yeenayeena, era yaabakoba okufunira omughala eky'okulya.