Mariko 4 - Baibuli Ekibono kya Katonda 2014

Olufumo olw'omusizi

¹ Agho kabiri yainhama okwegeresa eyo ku nhandha. Abantu lukunkumuli beesololeza gh'ali, era yaaniina bwa mu lyato eryali mu nhandha yaatyama omwo, abantu boonaboona baasigala ku bukalu.

² Yaabeegeresa ebintu kamaala mu nfumo era mu kubeegeresa yaabakoba ati:

³ “Muwulirise! Olwatuuka, omusizi yaafuluma okuja okusiga ensigo.

⁴ Bwe yali asiga, ensigo edhindi dhaagwa mu ngira, era enhonhi dhaidha dhaadhirya.

⁵ “Edhindi dhaagwa ku lubaalebaale aghaali eitaka eitonioli, era tidhaalwa dhaamera. Aye olw'eitaka okuba eitono,

⁶ tidhaaba na mizi, era endhuba olwavaayo ng'obusimbe buniala, nga bukala.

⁷ “Edhindi dhaagwa mu mawa, amawa gaaduuma gaadhifundekeza era edho tidhaabala.

⁸ “Edhindi dhaagwa ku itaka eirungi, dhaamera dhaakula, dheeyongera okwama ndala yaavaamu asatu, eyindi nkaaga n'eyindi kikumi!”

⁹ Agho yaakoba ati: “Ali n'amatu agawulira awulire.”

Ekigendererwa eky'enfumo

¹⁰ Agho Yesu bwe yali embali yenka, abaali agho, n'Eikumi n'Ababiri baamubuuza ku nfumo.

¹¹ Yaabakoba ati: “Imwe mwagheebwa okumanha ebyama eby'Obwakyabazinga bwa Katonda, aye abandi ab'endha, buli kintu kibakoberwa mu nfumo:

¹² olwo babe, ng'okumoga bamoga aye nga tibabona, n'okuwulira baawulira aye nga tibategeera; kuba bandibaire bakyuka baasoniyibwa ebibi byaibwe.”

Okwinhonhola okw'olufumo olw'omusizi

¹³ Era yaabakoba ati: “Olufumo luno timulutegeire! Memale enfumo edhindi dhoonadhoona mulidhitegeera mutya?

¹⁴ “Omusizi asiga kibono.

¹⁵ Agho ni, abali ku ngira okusigibwa ekibono n'abo oluwulira ekibono, mangu ago Sitaani ng'aidha aswankula ekibasigiibwamu.

¹⁶ Era edho edhisigibwa mu itaka ery'oku lubaalebaale, n'abo abawulira ekibono baakitwala n'eisanhu.

¹⁷ Aye olw'okuba bazira mizi, ekibono bakisanhukira akaseera katono era ebizibu oba okukirigibwa bwe kwidha olw'ekibono, bawaamu mangu amaani.

¹⁸ “Edhindi edhaasigibwa mu mawa, n'abo abawulira ekibono

¹⁹ aye olw'okweraliikirira eby'obulamu obw'oku nsi, okuguyibwa eby'obukombe, n'okwegomba kwonakwona okundi, bwe bibangiramu, bifundekeza ekibono, kyaloba kubala naire.

²⁰ Ate edho edhaasigibwa mu itaka eirungi, n'abo abawulira ekibono baakiikiriza n'omwoyo mulala era kyayama, okundi asatu, okundi nkaaga, n'okundi kikumi.”

Olufumo olw'eitaala

²¹ Agho Yesu era yaakoba ati: “Eitaala balireeta kulifundikira mu kiibo, oba kulita mu kunkuliisi? Ti kulighanika ku kikondo kyalyo?

²² Ghazira kikwekeibwa kitalikwekulwa, era ghazira kyama kitalimanhika mu lwatu!

²³ Ali n'amatu agawulira, awulire.”

²⁴ Ekindi, yaabakoba ati: “Mwegendereze bye muwulira, ekigero ky'ogerera abandi weena ky'oligererwa, ate n'okwongerwa kiryongerwaku;

²⁵ kuba ali nakyo aligheebwa ate ole azira, n'ako k'ali nako kalimutoolebwaku.”

Olufumo olw'ensigo

²⁶ Era yaakoba ati: “Obwakyabazinga bwa Katonda bufaanana ng'oti n'omuntu asiga ensigo mu itaka,

²⁷ yaatenduka era yaazuuka, omusana n'obwire ensigo eyo yaamera yaakula nga taidhi.

²⁸ Eitaka lyene n'erikuza ekimera ekyo okutuusa ku kwama ebibala. Ekimera ekyo kisooka kuleeta makaba, kyabeeka ebifaaganda ebito. Ate ebifaaganda ebyo byakula byabaamu empeke edhikuze obukalamu.

²⁹ Era empeke edho olwenga dhiti ng'omuntu aja na muwolo kuwoobya, kuba okukungula kutuuse.”

Olufumo olw'akamuuma

³⁰ Agho yaakoba ati: “Obwakyabazinga bwa Katonda tunaabufaanania ki?

³¹ Oba tunaabugeza ku ki? Buli ng'akamuuma ka kaladaali bwe kasimbibwa mu itaka, katonioli okusinga emuuma dhoonadhoona edhiri mu nsi.

³² Aye bwe kasimbibwa mu itaka kakula kaaleegha okusinga ebisimbe byonabyona, era kaleeta ensaga enene nga n'enhonhi edh'omu ibbanga dhisobola okuzimba ebisu mu kinsense kyako.”

Okukozesa enfumo

³³ Era yaabakobera ekibono mu nfumo kamaala edhifaananaku n'edho, nga bwebaaghanganga okutegeera.

³⁴ Tiyayogeranga nabo nga takozeisa lufumo aye bwe baasigalanga bonka ng'Abeegeresebwa be abainhonhola byonabyona.

Okulekeza kiwunga

³⁵ Ku lunaku lwene olwo nga buli kuziba, Yesu yaabakoba ati: “Tusomoke tuje eruuyi ere.”

³⁶ Baaleka ekiyindi eky'abantu, baamutwala nga bwe yali mu lyato, n'amaato agandi gaaja naye.

³⁷ Agho kiwunga ow'amaani yaatoolera era amayengo gaafukika mu lyato, kumpi kwidhula bwidhule.

³⁸ Yesu yali atendwike mu kalumba ak'eryato nga yeeziziike akaito, baamuzuusa baamukoba bati: “Mwegeresa, tofaayo ng'obona tufa!”

³⁹ Yesu yaasituka yaakaabukira kiwunga, n'enhandha yaagikoba ati: “Sirika, laala!” Era kiwunga yaalekera, n'enhandha yaalaala inho.

⁴⁰ Agho yaabakoba ati: “Lwaki mutiire mutyo? Muzira kwikiriza?”

⁴¹ Baatya n'okutya kunene era buli muntu yaakoba mwine ati: “Ono oba muntu wa nsambo ki? Kiwunga n'enhandha bimuwulira!”