Mariko 3 - Baibuli Ekibono kya Katonda 2014

Omuntu ow'omukono ogwaniala

¹ Agho kabiri yangira mu sinagoga, era omwo mwalimu omuntu ow'omukono ogwaniala.

² Abaaligho beekalirisa Yesu babone oba nga awonia omuntu oyo ku Sabbato, memale bamuseeghe.

³ Yesu yaakoba ole eyali n'omukono ogwaniala ati:

⁴ “Situka oyemerere ghagati.” Era yaakoba ati: “Kigwaine ku Sabbato okukola obulungi oba okukola obubi? Okuwonia obulamu oba okubuzikiriza?” Aye baasirika busirike.

⁵ Agho Yesu ng'asungughaire, yaabeezunguluza amaiso era nga n'okunakughala anakughaire olw'obukalangufu obw'emyoyo gyaibwe. Yaakoba ow'omukono ogwaniala ati: “Golola omukono.” Yaagugolola era gwawona!

⁶ Olwava agho ng'Abafarisaayo mangu ago bagemagana ni baine ba Herode nga beekobaana ngeri ya kuzikirizaamu Yesu.

Eikuukuubira ku nhandha

⁷ Yesu yaava agho n'Abeegeresebwa be, baaja ku nhandha. Eikuukuubira ery'abantu lyava mu Galilaaya ni mu Buyudaaya lyamunonereza.

⁸ Era n'abaava mu Yerusalemu, ni mu biketezo bya Idumea abaasomoka Yorudani, n'abaava mu biketezo eby'e Tiro n'e Sidoni, boonaboona bwe baawulira bye yali akola, abantu kamaala beesomba okuja y'ali.

⁹ Yesu yaakoba Abeegeresebwa be okutegekayo akaato okumpi, eikuukuubira lirobe okumunhigiriza.

¹⁰ Olw'okuba yawonianga ebirwaire ebya buli nsambo baamwenhigirizangaku baamugemaku.

¹¹ N'emizimu bwe gyamubonanga nga gyeyala agho mu maiso ge gyayasiikana giti: “Niiwe Omwana wa Katonda!”

¹² Aye yaagisikirira inho girobe kumulaalaisa.

Okulonda Eikumi n'Ababiri

¹³ Agho yaaniina mu nsozi yaayeta be yayenda, baaja y'ali.

¹⁴ Yaalondaku eikumi n'ababiri be yayeta Abatume, babenga naye abatume okwegeresa

¹⁵ era babenga n'obukumu okubinga emizimu.

¹⁶ Ati ni bwe yalonda Eikumi n'Ababiri: Simoni ye yatuuma erya Petero,

¹⁷ Yakobo mutabane wa Zebedaayo ni Yoanne muganda we, be yatuuma eriina “Boanerigesi”, ekitegeeza, “Abaana ab'olukuba”,

¹⁸ ni Anderea, Filipo, Barutholomayo, Matayo, Thomasi ni Yakobo mutabane wa Alufaayo, Thaddaayo, Simoni Omukananayo,

¹⁹ ni Yuda Isikarioti eyamulyamu olukwe.

Yesu ni Beelezebulu

²⁰ Agho yaira eka, abantu kamaala kabiri beesoloza, Yesu n'Abeegeresebwa be nga tibakaaghanga waire kukomba ku kamere.

²¹ Ababe bwe baawulira, baaja okumugema baali bakoba bati: “Alalwike!”

²² Abanamateeka abaali baviire e Yerusalemu baakoba bati: “Abandwa Beelezebulu, era emizimu agibinga ku buyinza bwa mukulu waagyo!”

²³ Agho yaabeeta era yaabakoba mu nfumo ati: “Sitaani aghanga atya okubinga Sitaani?

²⁴ Era obwakyabazinga obweyawulamu tibusobola kubaagho.

²⁵ N'abantu ab'endhu endala bwe beeyawulamu, endhu eyo nga tekaaligho.

²⁶ Era, oba nga Sitaani yeeyawiiremu yeerwanisa mwene, taghanga kubaagho, enkomerero ye etuuse!

²⁷ “Ezira aghanga kwingira mu ndhu ya muntu wa maani okumunhaga ebibye, okutoolaku ng'asoose okusiba ow'amaani oyo memale yaanhaga eby'omu ndhu ye.

²⁸ Bwenebwene ka mbakobere: Abantu balisoniyibwa ebibi byonabyona, n'ebivumo bye bavuma Katonda.

²⁹ Aye, alivuma Mwoyo Mutukuvu, oyo talisoniyibwa ebyanda n'ebyanda, aliba n'ekibi ekitawaagho.”

³⁰ Yakoba atyo kuba baali bakoba bati aliku omuzimu omubi.

Baganda ba Yesu n'inhina

³¹ Agho baganda ba Yesu n'inhina baatuuka, baayemerera ku luya baamutumisa.

³² Abantu kamaala abaali batyaime nga bamwetooloire baamukoba bati: “Ng'okaayogera, baganda bo, baanhoko n'inhoko baabano ku luya bali kukwagala.”

³³ Yaabairamu ati: “Mukaire wange ni baganda bange ni baani?”

³⁴ Era yeezunguluza amaiso abaali batyaime okumwezungulula yaabakoba ati: “Bano ni baganda bange, ni mukaire wange!

³⁵ Buli akola Katonda ky'ayenda, oyo ni muganda wange, ni mwanhinaze, ni mukaire wange.”