Mariko 2 - Baibuli Ekibono kya Katonda 2014

Yesu awonia eyagogoma

¹ Nga ghabiseegho enaku, Yesu yangira mu Kaperinaumu, era kyawulikika ng'aize eka.

² Abantu kamaala beesoloza baidhula ni ku mulyango era Yesu ng'abakobera ekibono.

³ Agho ghaidhagho abaaleeta omugogomu nga bamusitwire bana.

⁴ Aye tibaaghanga kumutuusa aghaali Yesu olw'eikuukuubira ery'abantu. Baaghenha ekituli mu kasulya, gheene Yesu ghe yali, baisiza agho endiri omugogomu kwe yali alambaire.

⁵ Yesu bwe yabona okwikiriza kwaibwe, yaakoba omugogomu ati: “Mwana wange ebibi byo bisoniyiibwa.”

⁶ Aye agho ghaali ghatyaimegho abandi ku Banamateeka, nga bali kwebuuza mule munda bati:

⁷ “Ono lwaki ayogera atyo? Avuma Katonda! Ani aghanga okusonigha ebibi okutoolaku Katonda yenka!”

⁸ Mangu ago nga Yesu mule munda amaze okutegeera bye balowooza, yaabakoba ati: “Lwaki mulowooza mutyo mu myoyo gyaimwe?

⁹ Kiki ekisinga bwangu, okukoba omugogomu ono nti, ‘Ebibi byo bisoniyiibwa’, oba nti, ‘Situka ogeme endiri yo otambule’?

¹⁰ Aye leka mumanhe muti, Omwana w'Omuntu ali n'obuyinza ku nsi obw'okusonigha ebibi!” Agho yaakoba omugogomu ati:

¹¹ “Iwe, situka, gema endiri yo oje eka!”

¹² Mangu ago yaasituka, yaagema endiri ye yaaja nga boonaboona balingiriire era boonaboona baayasaamirira era baagha Katonda ekitiisa nga bakoba bati: “Kino titukibonanga!”

Yesu ayeta Levi

¹³ Agho Yesu kabiri yaaja ku nhandha, n'eikuukuubira ery'abantu lyonalyona lyaidha y'ali, era yaabeegeresa.

¹⁴ Era bwe yali ng'atambula yaabona Levi mutabane wa Alufaayo ng'atyaime agho ghe baawoolezanga omusolo yaamukoba ati: “Nnonereza!” Agho yeena yaasituka yaamunonereza.

¹⁵ Mperaano, Yesu bwe yali ng'atyaime mu nhumba ya Levi okulya, abaghooza b'omusolo kamaala n'aboonooni, boona baatyama okulya ni Yesu n'Abeegeresebwa be, kuba kamaala ku baghooza ni ku boonooni baali batandiise okumunonereza.

¹⁶ Agho Abanamateeka ab'omu Bafarisaayo bwe baabona ng'alya n'aboonooni n'abaghooza, baakoba Abeegeresebwa be bati: “Lwaki alya n'abaghooza n'aboonooni, n'okunhwa n'anhwa nabo?”

¹⁷ Yesu olwawulira ebyo, yaabakoba ati: “Abalamu ti n'abenda omuyigha, aye abalwaire kuba abatuufu ti be naidha okweta, aye aboonooni.”

Ebigema ku kusiiba

¹⁸ Mu kiseera ekyo abeegeresebwa ba Yoanne n'Abafarisaayo baali basiiba agho ni abantu n'okwidha eri Yesu baamukoba bati: “Abeegeresebwa ba Yoanne n'abeegeresebwa b'Abafarisaayo basiiba, aye lwaki ababo tibasiiba?”

¹⁹ Yesu yaabakoba ati: “Abali ku mbaga basobola okusiiba ng'omugole akaali nabo? Entangama yoonayoona y'amala nabo tibasiiba.

²⁰ Aye enaku dhiidha kutuuka omugole abatoolebweku, ng'olwo ni basiiba.

²¹ “Ezira atunga kighero kya lugoye luyaaka mu lugoye lukaire, kuba oluyaaka lukanula olukaire ekituli kyeyongera obunene.

²² Era ezira afuka mwenge ogw'emizabbibu musu mu nsawo dha luwu nkaire kuba ensawo dhikanuka n'omwenge ogw'emizabbibu gwafukika. Omwenge omusu guli na kufukibwa mu nsawo dha luwu mpyaka.”

Ebigema ku Sabbato

²³ Olundi Yesu yaabita mu musiri ogw'engaano ku lwa Sabbato, era Abeegeresebwa be baatoolera okuja bwe banoga ku ngaano.

²⁴ Agho Abafarisaayo n'okukoba Yesu bati: “Abeegeresebwa bo lwaki bakola ku Sabbato ekiroberwa mu Mateeka?”

²⁵ Yesu yaabakoba ati: “Timusomangaku ku Daudi kye yakola bwe yali mu kizibu ng'endhala emuluma, ye mwene ni be yali nabo,

²⁶ bwe yangira mu nhumba ya Katonda, mu byanda bya Abiathari eyali Omukulu wa bakabona n'alya emigaati egigheereibwayo eri Katonda, egyali nga tigiriibwa bantu bandi, okutoolaku bakabona bonka ate era n'aghaaku n'abo be yali nabo?”

²⁷ Yesu n'okukoba ati: “Sabbato yateebwagho lwa bulungi bwa muntu aye ti omuntu ku lw'obulungi bwa Sabbato.

²⁸ Kyova ni, Sabbato eri mu buyinza bw'Omwana w'Omuntu.”