Mariko 16 - Baibuli Ekibono kya Katonda 2014

Okuzuukira kwa Yesu

¹ Olwa Sabbato bwe lwabita, Maria Magadalene ni Maria inhina wa Yakobo ni Salome, baagula obuwoowo baje basiige ku mulambo gwa Yesu.

² Era mu nkyonkyo, ku lunaku olwo olusooka mu Sabbato, baatuuka ku magombe, ng'endhuba evaayo.

³ Baali beebuuza bati: “Naani anaatugalangulira eibaale okuva mu mulyango ogw'amagombe?”

⁴ Aye baaja okulingayo bati, nga babona ng'eibaale eryali libitiriire obubba, ligalangwirwa lyaizibwa gha mbali.

⁵ Agho bangira mu magombe, baabona omwisuka ng'atyaime ku mukono omusaadha ng'avaire ekivaalo ekyeru baayasaamirira.

⁶ Yaabakoba ati: “Mutatya. Ndidhi nti muli kwagala Yesu ow'e Nazarethi, eyakomererwa ku musalaba azuukiire, muno aziramu. Mubone ekifo ghe yabaire ateereibwa.

⁷ Kale muje, mukobere Abeegeresebwa be ni Petero muti, ‘Abeesoosengayo e Galilaaya eyo ye mulimubonera nga bwe yabakoba.’ ”

⁸ Agho baafuluma mu magombe, baalumuka kuba baali batengera nga batya era ezira ye baakoberaku kintu kyonakyona kuba baali batiire. [

Okubonekera Maria Magadalene

⁹ Yesu bwe yazuukira mu nkyo, ku lunaku olwo olusooka ku Sabbato, yasooka okubonekera Maria Magadalene, ye yabingaku emizimu omusanvu.

¹⁰ Oyo n'eyaja n'akobera abo abaabanga naye, abaali banakughaire era nga balira.

¹¹ Aye abo olwawulira bati mulamu era bati ni Maria Magadalene amuboineku, baaloba kwikiriza.

Abonekera babiri ku Beegeresebwa be

¹² Ebyo bwe byawa, Yesu yaabonekera babiri ku abo, mu nsambo eyindi, nga baja mu kyalo.

¹³ Abo baaja baakobera abandi, aye era boona tibaabaikiriza.

Okutumibwa okw'Abeegeresebwa

¹⁴ Olwasembayo yaabonekera eikumi n'omulala nga batyaime balya, yaabanenia olw'obutaikiriza abo abaamubona ng'azuukiire.

¹⁵ Agho yaabakoba ati: “Muje mu nsi yoonayoona mukobere ebitonde byonabyona Amawulire Amalungi.

¹⁶ Oyo aikiriza era n'abatizibwa alirokolebwa aye ataikiriza omusango gulimusinga.

¹⁷ “Abaikiriza baliba n'obumanhiso buno: mu liina lyange balibinga emizimu, balyogera mu nnimi dhe batayegangaku,

¹⁸ baligema emisota mu ngalo dhaibwe, era ni bwe balinhwa ekiita kyonakyona tibalibaaku kabi, abalwaire balibaisaaku emikono era baawona.”

Okutwalibwa mu igulu

¹⁹ Musengwa Yesu bwe yamala okwogera nabo, yaatwalibwa mu igulu, y'atyaime ku mukono omusaadha ogwa Katonda.

²⁰ Ate Abeegeresebwa baaja baayegeresa buli ghantu Musengwa ng'ali nabo. Ebibono byaibwe ng'abikakasa n'ebyewuunhio bye yabakozanga.] [Mangu ago baakobera Petero ni be yali nabo, byonabyona malaika bye yabalagira. Era ebyo olwawa, Yesu mwene yaabatuma okuja okulangirira Amawulire Amatukuvu agatawaagho ag'obulokozi woonawoona okuva e buvandhuba okutuuka e bugwandhuba.]