Mariko 15 - Baibuli Ekibono kya Katonda 2014

Yesu mu maiso ga Pilato

¹ Olwakya buti, nga Bakabona Abakulu, n'abakulu ab'ebika, n'Abanamateeka n'embuga yoonayoona, bateesa, nga basiba Yesu nga bamutwala, bamughaayo ewa Pilato.

² Agho Pilato yaamubuuza ati: “Niiwe kyabazinga ow'Abayudaaya?” Yesu yaamwiramu ati: “Niiwe okyogeire.”

³ Era Bakabona Abakulu baamughaghabira emisango kamaala.

⁴ Pilato kabiri yaamubuuza, yaakoba ati: “Ozira ky'oiramu? Bona, emisango emeka gye bakughaghabiire!”

⁵ Aye Yesu tiyamwiramu kibono, era Pilato yeewuunhia!

Yesu asalirwa ogw'okufa

⁶ Mperaano buli ku lunaku olukulu Pilato yalinga abalekulirayo omusibe mulala ye baabanga nga basabye.

⁷ Ku mukuzi guno, yaliyo omusibe mulala ng'ayetebwa Barabba, eyasibibwa n'abadheemu, abaali baise abantu mu keegugungo akaaligho.

⁸ Agho ni eikuukuubira ery'abantu bwe baidha, baatoolera okusaba Pilato abakolere nga buliidho.

⁹ Agho Pilato yaabairamu ati: “Mwenda mbalekulire kyabazinga ow'Abayudaaya?”

¹⁰ Kuba mule yamanha nga Bakabona Abakulu baaghaayo Yesu lwa nsaalwa.

¹¹ Aye Bakabona Abakulu baapikiriza ekiyindi bati koodhi abalekulire Barabba.

¹² Pilato yairamu kabiri yaakoba ati: “Memale ono ye mweta kyabazinga ow'Abayudaaya mwenda mmukolere ki?”

¹³ Bairamu nga baasiikana bati: “Mukomerere ku musalaba.”

¹⁴ Pilato yaabakoba ati: “Aye lwaki, yakola kibi ki?” Beeyongera kwasiikana bati: “Mukomerere ku musalaba.”

¹⁵ Agho Pilato olw'okwenda okusiimya ekiyindi, yaabalekulira Barabba, era yaaghaayo Yesu akomererwe ku musalaba ng'amaze okumukuba enkoba.

Abaisirukale badaaza Yesu

¹⁶ Agho abaisirukale baamutwala munda mu kisaagaati, mu Puraetorio, era baasololezaamu banaibwe ab'ekikunsu ekyo.

¹⁷ Baamuvaaza olugoye olwa nakasooma, baazingazinga amawa baakola engule baagimuvaaza.

¹⁸ Agho baatoolera okumusaaka bati: “Ghangaala, kyabazinga ow'Abayudaaya!”

¹⁹ Baamukonta mu mutwe n'olugada, baamufuudhaku, baakuba amakiryaivu baamusinza.

²⁰ Agho nga bamaze okumudaaza, baamutoolamu olugoye olwa nakasooma, baamuvaaza engoye dhe, baamutwala okumukomerera ku musalaba.

Yesu aitibwa

²¹ Ghaabaagho omubise mulala, Simoni Omukurenayo eyali ng'ava mu nimiro, nga ni lata wa Alekisandero ni Rufo, baamukaka okubbeeda omusalaba gwa Yesu.

²² Baatwala Yesu mu kifo Gologotha, ekitegeeza ekifo eky'ekighanga!

²³ Baamugha omwenge ogw'emizabbibu okunhwa gutabwirwamu mirra, aye nga tayenda.

²⁴ Agho nga bamukomerera ku musalaba, nga baira mu kugabana bivaalo bye, baabikubiraku akalulu okubona buli mulala ky'atwala.

²⁵ Esaawa dhaali dhighera isatu, baamukomerera ku musalaba.

²⁶ Omusango gwe baamulanga gwaghandiikibwa guti: “KYABAZINGA OW'ABAYUDAAYA!”

²⁷ Era baamukomerera n'abanhazi babiri omulala ku mukono omusaadha, ate owundi ku mugooda. [

²⁸ Ekighandiiko ekitukuvu kyatuukirira ekikoba kiti: “Yabalirwa mu babi.”]

²⁹ Ababise baamuvuma, baatengeesa emitwe gyaibwe nga bakoba bati: “Ha! Iwe amenha eisinzizo era waalizimba mu nnaku isatu!

³⁰ Weewonie, va ku musalaba oike!”

³¹ Era ni Bakabona Abakulu n'Abanamateeka boona baamuduula nga bakoba bati: “Yawonianga abandi, mwene tasobola kwewonia!

³² Ti ni Kurisito kyabazinga wa Isiraeli, mperaano aike ave ku musalaba tubone era twikirize.” Bale be baamukomerera nabo boona baamuvuma!

Okufa kwa Yesu

³³ Esaawa bwe dhaaghera omukaaga, enzikiiza yaagema ensi yoonayoona okutuuka esaawa omwenda.

³⁴ Ku saawa eyomwenda, Yesu yaayasiikana ati: “Eloi, Eloi, lama sabakitani?” Ekitegeeza kiti: “Katonda wange, Katonda wange lwaki ondekuliire agho?”

³⁵ Abandi ku baali beemereire agho olwakiwulira, nga bakoba bati: “Wulira ali kweta Eliya.”

³⁶ Ghaabaagho omuntu mulala, yaalumuka yainhika ekyangu mu mwenge ogw'emizabbibu ogw'endoota, yaakita ku lugada, yaamugha anhwe nga bw'akoba ati: “Muleke tubone oba nga Eliya anaidha yaamughanula ku musalaba!”

³⁷ Aye Yesu yaayasiikana mu iroboozi ery'amaani era yaisa omuuka ogusembayo.

³⁸ Agho olusuubo olw'omu isinzizo lwakanukamu ghabiri okuva ghaigulu okutuuka ghansi.

³⁹ Agho omukulu ow'ekikunsu eky'abaisirukale eyali ayemereire agho mu maiso bwe yabona nga bw'aisiiza omuuka ogusembayo, yaakoba ati: “Bwenebwene omuntu ono abaire Mwana wa Katonda!”

⁴⁰ Agho era ghaaligho n'abakazi abaali bali kumulengera nga baliku ghala; mu abo mwalimu Maria Magadalene, ni Maria mukaire wa Yakobo omuto, ni Yose, ni Salome.

⁴¹ Abakazi abo baabitanga naye ng'ali e Galilaaya era baamugheerezanga ghalala n'abandi kamaala abaaniinaniina naye e Yerusalemu.

Okuziikibwa kwa Yesu

⁴² Bwe bwali buziba ku lunaku olw'okwetegeka olukulembera Sabbato,

⁴³ Yosefu ow'e Arimathea yaidha. Yali musaadha wa kitiisa ku lwekobaano olw'embuga ate ng'era yali ateegerera Obwakyabazinga bwa Katonda. Oyo, nga tatya, yaaja ye Pilato yaamusaba omulambo gwa Yesu.

⁴⁴ Pilato yeewuunhia oba nga Yesu yali amaze okufa, era yaayeta omukulu ow'ekikunsu eky'abaisirukale yaamubuuza oba nga Yesu yali afiire.

⁴⁵ Era, ekyo omukulu ow'ekikunsu eky'abaisirukale bwe yamala okukimukakasa, yaikiriza Yosefu, atwale omulambo.

⁴⁶ Yosefu yaagula olugoye olweru, yaamughanula ku musalaba, yaamuzinga mu lugoye, yaamuta mu magombe, agaali gasimiibwa mu lubaale yaagalangula eibaale yaalita mu mulyango ogw'amagombe.

⁴⁷ Era Maria Magadalene ni Maria inhina wa Yose, beekalirisa ghe yateebwa.