Mariko 14 - Baibuli Ekibono kya Katonda 2014

Olukwe olw'okwita Yesu

¹ Agho, yali ng'ekaabulayo enaku ibiri okutuuka ku Kibinuko eky'Okubitizibwa n'Ekibinuko eky'Emigaati Egitazimbulukusiibwa, Bakabona Abakulu n'Abanamateeka baanoonia engeri ey'okumugema mu nkukutu bamwite.

² Aye baakoba bati: “Tutakikola ku lunaku lukulu, tomanha abantu bwe bataagho keegugungo.”

Asiigibwa omuzigo e Bethania

³ Agho Yesu bwe yali ng'ali ku kiiwulo alya e Bethania mu ndhu ya Simoni eyali omulwaire ow'ebigenge, omukazi yaidha ng'ali n'akadoome k'alabasituro nga kalimu omuzigo omulungi, ogw'omughendo, ogw'akawoowo ka narudo. Yaamenha akadoome ako, yaafuka omuzigo ku mutwe gwa Yesu.

⁴ Ghabaagho abaavuuvuuma mule bati: “Lwaki omuzigo ogwo gwonooneibwa?

⁵ Omuzigo ogwo gubaire gusobola okutanibwa dinari edhiswika mu bikumi ebisatu, dhaagabirwa abaavu! Baamusungughalira inho.”

⁶ Aye Yesu yaabakoba ati: “Omukazi mumuleke lwaki mumutabula? Ekikolwa ky'ankoleire kirungi.

⁷ Abaavu muba nabo buliidho, era mughanga okubakolera obulungi buli lwe mwenze aye nze timwidha kuba ninze buliidho.

⁸ Akoze ky'asobola, ansiize omuzigo nga bukaali.

⁹ Bwenebwene ka mbakobere nti mu nsi yoonayoona buli Amawulire Amalungi ye galikoberwa, omukazi ono ky'akoze kyona kinaayogerwangaku, okumwidhukira.”

Yuda aganha okulya mu Yesu olukwe

¹⁰ Agho Yuda Isikarioti, omulala ku Eikumi n'Ababiri, yaaja eri Bakabona Abakulu, aghange okumughaayo ye bali.

¹¹ Bwe baakiwulira, baasangaala era baamusuubiza okumugha empiiya. Era Yuda yaanoonia bwa mukisa gwa kumubagemya.

Yesu alya embaga n'Abeegeresebwa be

¹² Ku lunaku olusooka mu dh'emigaati egitazimbulukusiibwa, lwe baitirangaku entaama ento ey'Ekibinuko eky'Okwidhukiriraku Okubitizibwa, Abeegeresebwa be baamukoba bati: “Oyenda tuje tukutegekere gha y'onaaliira Ekibinuko eky'Okubitizibwa?”

¹³ Agho yaatuma babiri ku Beegeresebwa be, yaabakoba ati: “Muje mu kibuga, mwidha kwagaana omusaadha eyeetwise ensugha ey'amaadhi, mumunonereze.

¹⁴ Woonawoona gh'anangira mukobe mwene ndhu muti, ‘Omwegeresa akobye ati ekisenge kye kiri gha, ky'anaaliiramu Ekibinuko eky'Okwidhukiriraku Okubitizibwa n'Abeegeresebwa be?’

¹⁵ Aidha kubalaga ekisenge ekinene ghaigulu nga kirimu bye twenda mututegekere omwo.”

¹⁶ Abeegeresebwa baasimbula baatuuka mu kibuga, baayagaana nga bwe yabakoba, baategeka Ekibinuko eky'Okwidhukiriraku Okubitizibwa ekyo.

¹⁷ Eiguloigulo yaatuuka n'Eikumi n'Ababiri.

¹⁸ Agho bwe baali bali ku kiiwulo nga balya, Yesu yaakoba ati: “Bwenebwene ka mbakobere nti mulala ku imwe, bwe tuli ghano ku kiiwulo aidha kumpaayo.”

¹⁹ Abeegeresebwa baanakughala era baamubuuza mulala mulala bati: “Ni nze?”

²⁰ Yesu yaabakoba ati: “Mulala ku imwe Eikumi n'Ababiri ali kukoza ninze mu kibya.

²¹ Kale Omwana w'Omuntu aja kufa nga bwe kyamughandiikibwaku aye ng'akagwireku anaaghaayo Omwana w'Omuntu! Kyandibaire kikalamu nguli omuntu oyo tiyazaalibwa!”

Ekyeigulo kya Musengwa

²² Bwe baali bali kulya Yesu yaatoola omugaati, yaagugha enkabi nga yeebaza, yaagumegulamegulamu, yaabagha, yaakoba ati: “Mulye, guno n'omubiri gwange.”

²³ Era yaatoola ekikopo, yeeyanza, yaakibagha, baakinhwaku boonaboona.

²⁴ Era yaabakoba ati: “Guno n'omusaayi gwange ogw'endagaano empyaka ogunaayuyika ku lw'abantu kamaala.

²⁵ Bwenebwene ka mbakobere: Tiriirayo kunhwa ku kibala kya muzabbibu okutuusa olunaku olwo lwe ndinhwa ekibala ekiyaaka mu Bwakyabazinga bwa Katonda.”

²⁶ Era bwe baamala okwemba olwembo baasituka, baaja ku Lusozi olw'Emiti Emyoliva.

Yesu akoba nga Petero bw'aidha okumwegaana

²⁷ Agho Yesu yaabakoba ati: “Imwe mwenamwena mwidha kuneegaana kuba kyaghandiikibwa kiti, ‘Ndiita omwayi, n'entaama dhaasansaana.’

²⁸ Aye bwe ndimala okuzuukira ndibasookayo e Galilaaya.”

²⁹ Petero yaamukoba ati: “Abandi boonaboona ni bwe balikwegaana, nze bbe!”

³⁰ Yesu yaamukoba ati: “Bwenebwene ka nkukobere, mwene iwe olwaleero obwire, enkoko enaaba ekaali kukolyoka mikuzi ebiri, ng'oneegaine emikuzi esatu.”

³¹ Petero yaasinzaagho okukakasa, yaakoba ati: “Ni bwe kiba nga kyetaagisa nze okufa n'iwe, tiikwegaane.” N'abandi boonaboona baakoba batyo.

Yesu asaba e Gethisemane

³² Agho baatuuka mu kifo ekyetebwa Gethisemane era Yesu yaakoba Abeegeresebwa be ati: “Mutyame ghano, nze nga nsaba.”

³³ Yaatoola Petero, Yakobo ni Yoanne yaaja nabo. Yaatabulwa era yeeraliikirira.

³⁴ Era yaabakoba ati: “Ndi n'enaku ku mwoyo eyenda na kundhita. Imwe musigale ghano mukuume.”

³⁵ Bwe yeeyongerayooku katono, yaakuba amakiryaivu yaasaba ati oba kisoboka ekiseera ekyo kimubiteku.

³⁶ Era yaakoba ati: “Abba, Lata, byonabyona obisobola. Ntoolaaku ekikopo kino aye ti nga nze bwe nhenda, aye nga iwe bw'oyenda.”

³⁷ Okuja okwira, yaayagaana nga batendwike. Yaakoba Petero ati: “Simoni, otendwike? Toghanze kumoga waire saawa ndala eti?

³⁸ Mumoge era musabe, mulobe kukemebwa kuba omwoyo mumalirivu aye omubiri munafu.”

³⁹ Kabiri yaaja yaasaba ng'ayogera ebibono birala ebyo.

⁴⁰ Era kabiri okuja okwira yaabaagaana nga batendwike ng'amaiso gabazitoighe olw'endoolo. Baabulwa kye bamwiramu.

⁴¹ Yaira omukuzi ogwokusatu yaabakoba ati: “Mukaatenduka era mukaawuumula? Mulekere agho! Biwoire! Saawa etuuse, Omwana w'Omuntu aja kugheebwayo mu mikono egy'aboonooni.

⁴² Musituke tuje, anampaayo ali kumpi.”

Yesu agemwa

⁴³ Mangu ago, Yesu bwe yali ng'akaayogera, Yuda, omulala ku Ikumi n'Ababiri, n'eikuukuubira ery'abantu baatuuka nga bava ye Bakabona Abakulu, n'Abanamateeka, n'abakulu ab'ebika, nga bagemye empiima n'emiigo.

⁴⁴ Mperaano eyamulyamu olukwe yali amaze okubatemyaku ng'akobye ati: “Ye nnaalamusa nga mmugwa mu kifuba nga n'oyo mumugeme mumutwale nga mumukalangwire.”

⁴⁵ Era Yuda olwatuuka ati, ng'aja busimbalaala ye Yesu, ng'amukoba ati: “Mwegeresa”, era ng'amugwa mu kifuba.

⁴⁶ Agho baagema Yesu era baamukalangula.

⁴⁷ Aye owundi ku baali beemereire agho yaasowolayo empiima yaatema omwiru w'Omukulu wa Bakabona, era yaamukutulaku kutu.

⁴⁸ Yesu yaabakoba ati: “Mwidhie okungema ng'abaja okugema omunhazi, mwaidha n'empiima n'emiigo?

⁴⁹ Buli lunaku nabanga n'imwe mu isinzizo nga ndhegeresa aye timwangema. Kale Ebyaghandiikibwa biri n'okutuukirizibwa.”

⁵⁰ Agho Abeegeresebwa be boonaboona baalumuka, baamuleka.

Omwisuka eyalumuka

⁵¹ Ghaabaagho omwisuka eyali ali kumunonereza nga tavaire, okutoolaku eisuuka lye yali yeeswireku, baamugema

⁵² aye yaabalekera eisuuka yaalumuka madu.

Yesu mu mbuga

⁵³ Agho baatwala Yesu ew'Omukulu wa Bakabona. Agho Bakabona Abakulu, n'abakulu ab'ebika, n'Abanamateeka boonaboona beesoloza.

⁵⁴ Petero yaavanga einhuma aye ng'aliku ghala, okutuukira irala mu luya lw'Omukulu wa Bakabona, era yaatyama n'abakuumi yaayota omuliro.

⁵⁵ Agho Bakabona Abakulu n'embuga yoonayoona, baanoonia obudhulizi ku Yesu kwe banaasinziira okumwita, aye nga tibabufuna.

⁵⁶ Abantu kamaala baamughaaku obudhulizi nga basubagha, era ng'obudhulizi tibugemagana.

⁵⁷ Era yaabaayo n'abandi abaasituka baagha obudhulizi obw'okusubagha nga bakoba bati:

⁵⁸ “Twamuwulira ng'akoba ati, ‘Ndimenhagho eisinzizo lino eryazimbibwa abantu, ate mu nnaku isatu ndizimba erindi, nga tirizimbibwa bantu.’ ”

⁵⁹ Aye ng'era obudhulizi bwaibwe tibugemagana.

⁶⁰ Agho Omukulu wa Bakabona yaayemerera ghagati yaabuuza Yesu ati: “Ozira ky'oiramu? Kiki bano kye bakulumirizaamu?”

⁶¹ Aye yaasirika, era azira kye yairamu. Kabiri Omukulu wa Bakabona n'okumubuuza yaamukoba ati: “Niiwe Kurisito Omwana w'oyo Katonda asaakibwa?”

⁶² Agho Yesu yaakoba ati: “Ninze. Era mulibona Omwana w'Omuntu ng'atyaime ku mukono omusaadha ogw'ow'obukumu, era ng'aidhira mu bire eby'eigulu.”

⁶³ Agho Omukulu wa Bakabona yaakendebula ebivaalo bye, yaakoba ati: “Tukaayendera ki abadhulizi abandi?

⁶⁴ Muwulire bw'avuma Katonda, imwe ekyo mukibona mutya?” Agho boonaboona baagumusalira bati agwaine afe.

⁶⁵ Ng'olwo abandi batoolera kumufuudhaku, baamughemba mu maiso, baamukuba, eno nga bwe bamukoba bati: “Teeba akukubye.” N'abakuumi baamusangaaza na gafunsi.

Petero yeegaana Yesu

⁶⁶ Petero bwe yali ng'akaali agho ghansi mu luya, omughala mulala ku bagheereza b'Omukulu wa Bakabona, yaidha.

⁶⁷ Bwe yabona Petero ng'ayota omuliro, yaamulingirira, yaakoba ati: “Iwe weena wali n'Omunazarethi oyo Yesu.”

⁶⁸ Aye Petero yeegaana ng'akoba ati: “Tiidhi era titegeera ky'okoba.” Yaaja ng'afuluma ku luya, era enkoko yaakolyoka.

⁶⁹ Kabiri omughala olwamubona ng'atoolera kukobera abaali bemereire agho ati: “Ono n'omulala ku bale.”

⁷⁰ Aye kabiri yeegaana. Ate nga ghabiseegho akaseera katono, abaali beemereire agho baakoba Petero bati: “Bwenebwene oli mulala ku bale, kuba, n'okuba oli Mugalilaaya.”

⁷¹ Agho yaatoolera n'okwefuugha era n'okulayira ati: “Nze tiidhi muntu ono ye muli kukoba.”

⁷² Mangu ago enkoko yaakolyoka omukuzi ogwokubiri. Era Petero yaidhukira ekyo Yesu kye yamukoba ati: “Enkoko enaaba ng'ekaali kukolyoka mikuzi ebiri, oidha kuba ng'oneegaine emikuzi esatu.” Agho yaagwa mu maziga yaalira.