Mariko 13 - Baibuli Ekibono kya Katonda 2014

Okwonoonebwa okw'eisinzizo

¹ Agho bwe yali ng'ava mu isinzizo, mulala ku Beegeresebwa be yaamukoba ati: “Mwegeresa bona amabaale amalungi n'ebizimbe ebirungi!”

² Yesu yaamwiramu ati: “Tobona gazimbe ago? Tighaliba ibaale lirisigala ku liinaalyo nga tirisuuliibwa ghansi.”

Okwinhama okw'ebibonoobono

³ Bwe yali ng'atyaime ku Lusozi olw'Emiti Emyoliva, ng'olingiriire eisinzizo, Petero ni Yakobo ni Yoanne n'Anderea baamubuuza nga bali bonka, bati:

⁴ “Tukobere, ebyo biribaagho li, ate era kamanhiso ki akalitumanhisa nga bino byonabyona biri kumpi okutuukirira?”

⁵ Agho Yesu yainhama okubakoba ati: “Mwekuume ghalobe kubaagho abaghabya.

⁶ Abantu kamaala baliidha mu liina lyange nga bakoba bati, ‘Ni nze’, era balighabya abantu kamaala.

⁷ Aye bwe muwuliranga ku ntalo ghano ni ghale, mutatyanga ebyo biri n'okubaagho, aye ng'enkomerero ekaali.

⁸ Eighanga lirirumba liinaalyo n'obwakyabazinga bulirumba bwinaabwo. Ghalibaagho musisi mu biketezo kamaala, ghaabaagho n'endhala; okwo n'okwinhama okw'ebibonoobono.

⁹ “Imwe beene mwekuume baidha kubatwala mu mbuga, baidha kubakubira mu sinagoga era balibasimba mu maiso ag'abafuzi ni bakyabazinga nga babalanga nze, mube abadhulizi mu abo.

¹⁰ Kuba Amawulire Amalungi gali n'okukoberwa amaghanga goonagoona.

¹¹ “Ate bwe babagemanga ni babaghaayo muteraliikiriranga kya kwogera, aye ekinaabagheebwanga mu saawa yeene eyo kye munaakobanga. Kuba ti niimwe aboogera aye Mwoyo Mutukuvu.

¹² Omuntu alighaayo muganda we okwitibwa, lata w'omwana alighaayo omwana, era abaana balidheemera ababazaala, baabaita.

¹³ Abantu boonaboona balibakyagha olw'eriina lyange. Aye aliguma okutuuka ku nkomerero n'alirokolebwa.

Ekyenhinhalwa Ekizikiriza

¹⁴ “Aye bwe mulibona Ekyenhinhalwa Ekizikiriza nga kiri ghe kitagwaine kuba, olwo oyo asoma bino ategeeranga, era abali mu Buyudaaya balumukiranga mu nsozi.

¹⁵ Oyo ali ghaigulu ku ndhu ataikanga, waire okungira mu ndhu okutoolamu ekintu kyonakyona.

¹⁶ Era oyo aliba mu nimiro atairanga ka kunona kivaalo kye.

¹⁷ Abalinda n'abayonsa, mu nnaku edho, nga bakagwireku!

¹⁸ Musabe Katonda bino birobe kubaagho mu biseera bya kiinhogogo.

¹⁹ “Kuba mu nnaku edho mulibaamu ebibonoobono ebitabangaghooku okuva Katonda lwe yatonda ebitonde n'okutuusa mperaano, era ebitalibaagho.

²⁰ Era nguli Musengwa tiyakendeeza ku nnaku edho, ghazira muntu yandiwonie. Aye ku lw'abalonde, be yalonda, yakendeeza ku nnaku edho.

²¹ “Agho ni, bweghabaagho abakoba ati, ‘Bona, Kurisito wuuno’, oba ati, ‘Wuule’, mutaikirizanga

²² kuba ghaliidhagho abeeyeta Kurisito n'abeeyeta abalanzi, baakola obumanhiso n'ebyewuunhio nga benda kuwubania abalondemu bwe kiba kisoboka.

²³ Aye imwe mwekuume, mbakobeire byonabyona nga bukaali.

Okutuuka kw'Omwana w'Omuntu

²⁴ “Mu nnaku edho ng'okudaagadaaga kuwoire, endhuba erizikira n'omwezi gwaloba kwaka,

²⁵ emuunienie dhirimagalika okuva mu igulu n'amaani ag'omu igulu galitengeesebwa;

²⁶ ng'olwo ni babona Omwana ow'Omuntu ng'aidhira mu bire n'amaani amangi n'ekitiisa.

²⁷ Agho ng'atuma bamalaika nga basoloza abalonde be okuva mu mpewo eina, okuva ensi y'ekoma okutuuka eigulu ye likoma.

Ekyegerwa ku muti omutiini

²⁸ “Mwegere ku lufumo olw'omuti omutiini. Ensaga bwe dhiira obuto n'amakaba ni gatoolera okwidha, mumanha muti endoboozi eri kumpi.

²⁹ Kale imwe bwe mubonanga ebintu bino nga bibaagho, mumanhanga muti ali kumpi ku lwigi kwene.

³⁰ Bwenebwene mbakobera nti ebintu bino byonabyona biribaagho nga n'abantu ab'oluse luno bakaali kuwaagho.

³¹ Eigulu n'ensi biriwaagho aye ebibono byange tibiriwaagho.

Olunaku ni saawa tibimanhiibwa

³² “Aye ghazira aidhi lunaku olwo oba saawa ni bwebaakaba bamalaika mu igulu, waire Omwana, okutoolaku Lata.

³³ Mwekuume, mumoge kuba timwidhi kaseera!

³⁴ “Kiri ng'omuntu avaagho n'aja eghala, n'aleka amaka ge ng'aghaire abagheereza be obuyinza ate n'emirimo emyawufu buli mugheereza. Era oyo ali ku mulyango n'amulagira okukuumanga.

³⁵ Kale mumoge, kuba timwidhi mwene ghaka gh'atuukira, oba igulo, oba mu bwire ghagati, oba mu nkoko nga dhikolyoka, oba nga bukya!

³⁶ Kale bw'abagwaku alobe kubaagaana nga mutendwike.

³⁷ Kye nkoba imwe, kye nkoba boonaboona nti mwekuume!”