Mariko 12 - Baibuli Ekibono kya Katonda 2014

Olufumo olw'abalimi ab'omu mizabbibu

¹ Agho Yesu yaatoolera okwogera nabo mu nfumo, ati: “Ghaaligho omuntu, yaasimba eisamba ery'emizabbibu, yaalisitaku olukomera, yaasimamu ekikunhiro eky'omwenge ogw'emizabbibu, yaazimbamu ekituuti ekireeyi, yaataamu abakozi, yaaja mu lugendo olw'eghala.

² “Ekiseera bwe kyatuuka, yaatuma omugheereza we y'abalimi anoneyo ku bibala eby'eisamba ery'emizabbibu.

³ Aye baamugema baamukuba era baamwiririzaayo ngalo ndhereere.

⁴ “Kabiri yaabatumira omugheereza owundi, oyo baamukuba oluguma era baamukola ebiswaza.

⁵ Era yaatuma owundi, oyo baamwita era n'abandi kamaala abandi baabakuba, abandi baabaita.

⁶ “Yali ekaasigaireyo mulala, omwana omugonzi, ye yasembyayo okutuma, mule ng'akoba ati, ‘Omwana wange baidha kumutaamu akanhagansi!’

⁷ Aye abakozi abo, mule baakoba bati, ‘Ono n'omusika, ka tumwite obusika bube bwaife.’

⁸ Agho nga bamugema, bamwita, bamusuula ku luya okw'eisamba ery'emizabbibu.”

⁹ Agho Yesu yaabuuza ati: “Kale mwene isamba alikola ki?” Bale bairamu bati: “Aliidha yaazikiriza abakozi abo, n'eisamba yaaligha abandi.”

¹⁰ Yaakoba ati: “Timusomanga kino ekyaghandiikibwa kiti, ‘Eibaale abazimbi lye baaloba bati lizira mugaso n'eryafuuka empango ey'omusingi mu nsonda.

¹¹ Ekyo Musengwa n'eyakikola era okukibona tukyewuunhia!’ ”

¹² Baali benda okumugema, kuba baali bamanhie ng'olufumo alugereiza ku beene, aye baatya ekiyindi eky'abantu. Kale baamuleka yaaja.

Ebigema ku kugha omusolo

¹³ Baatuma abandi ku Bafarisaayo n'abandi ku baine ba Herode bamutege mu by'akoba.

¹⁴ Bwe baatuuka baamukoba bati: “Mwegeresa, twidhi oli wa mazima era mpaagho ye weeguya. Mu nkola yo tojiira ku mboneka ya muntu, aye oyegeresa mu mazima engira ya Katonda. Kale ni tukobere, kiikirizibwa okugha Kaisari omusolo oba bbe? Tugughenga oba tutagughanga?”

¹⁵ Aye Yesu olw'okumanha obukuusa bwaibwe, yaabakoba ati: “Lwaki mundeba? Mundeetere ghano e dinari mbone!”

¹⁶ Baagimuleetera. Yaabakoba ati: “Ekifaananie kino ni bino ebighandiiko ebiriku by'ani?” Baamukobera bati: “Bya Kaisari.”

¹⁷ Agho Yesu yaabakoba ati: “Ebya Kaisari mubighe Kaisari n'ebya Katonda mubighe Katonda.” Era baamwewuunhia.

Ebigema ku kuzuukira

¹⁸ Abasaddukaayo, abakoba bati ezira kuzuukira, baidha ye Yesu, baamukoba bati:

¹⁹ “Mwegeresa, Musa yaleka ng'atughandiikiire ati, ‘Muganda w'omuntu bw'afanga n'aleka omukazi aye nga talese mwana, muganda w'omufu atwalanga omukazi oyo yaafunira muganda we eizaire.’

²⁰ “Agho olwatuuka, nga ghabaagho aboluganda musanvu omuberi yaafuna omukazi, yaafa nga talese izaire.

²¹ N'owokubiri yaamubayiza, era yaafa nga talese izaire, n'owokusatu atyo.

²² Era batyo omusanvu tibaaleka izaire. Olumaliira omukazi yeena yaafa.

²³ Mperaano mu mazuukira, abo bwe balizuukira aliba muka ani?”

²⁴ Yesu yaabakoba ati: “Ti kyemuva mughaba, olw'obutamanha Byaghandiikibwa waire okumanha amaani ga Katonda!

²⁵ Ekituufu kiri nti bwe bazuukira mu bafu, baba nga tibakaabayiza waire okubayira baba ng'oti bamalaika mu igulu.

²⁶ “Ate ebigema ku bafu okuzuukira, timusomangaku mu kitabo kya Musa, ku ebyo ebigema ku kisaka, nga Katonda bwe yamukoba ati, ‘Ninze Katonda wa Aburahamu, Katonda wa Isaaka, era Katonda wa Yakobo?’

²⁷ Katonda taba wa bafu, aye wa balamu! Mughaba inho.”

Ekiragiro ekiwula

²⁸ Ghaaligho mulala ku Banamateeka yaatuuka yaabawulira bwe baabuuza, era bwe yabona ng'abaizeemu bukalamu yaamubuuza ati: “Kiragiro ki ekisooka mu biragiro byonabyona?”

²⁹ Yesu yaamwiramu ati: “Ekisooka ni kino, ‘Wulira iwe Isiraeli. Musengwa Katonda waife ni Musengwa yenka.

³⁰ Era ogonzanga ni Musengwa Katonda wo n'omutima gwo gwonagwona, n'omwoyo gwo gwonagwona, n'amagezi go goonagoona era n'amaani go goonagoona.’

³¹ Ekyokubiri ni kino, ‘Ogonzanga mwino nga iwe mwene bwe weegonza.’ Ezira kiragiro kindi kiwula bino.”

³² Omunamateeka yaamukoba ati: “Mwegeresa, oli mutuufu mu ky'okobye bwenebwene Musengwa Katonda ali mulala, ghazira wundi okutoolaku oyo

³³ era nti okumugonza n'omwoyo gwonagwona, n'okutegeera kwonakwona, n'amaani goonagoona, era n'okugonza mwino nga iwe bwe weegonza, kisinga ebigheebwayo byonabyona ebyokebwa ni biweekereragho, n'emisengo gyonagyona egigheebwayo ye Katonda.”

³⁴ Yesu bwe yabona ng'aizeemu bukalamu, yaamukoba ati: “Obwakyabazinga bwa Katonda tobuli ghala.” Era okuva ku olwo ng'ezira akanaghala kumubuuza kibuuzo.

Kurisito mwidhukulu wa Daudi

³⁵ Yesu bwe yali ng'ayegeresa mu isinzizo, yaakoba ati: “Abanamateeka bakoba batya bati Kurisito mwidhukulu wa Daudi!

³⁶ Daudi mwene, ku bwa Mwoyo Mutukuvu yakoba ati, ‘Musengwa yakoba Musengwa wange ati: Tyama ku mukono gwange omusaadha okutuusa bwe ndita abazigu bo ghansi gh'ebigere byo.’

³⁷ “Daudi mwene amweta ‘Musengwa’ memale obwo aba atya mwidhukulu we!” Olukunkumuli olw'abantu abaali agho baamuwulirisa n'eisanhu.

Mwekuume Abanamateeka

³⁸ Era mu kwegeresa kwe yaabakoba ati: “Mwekuume Abanamateeka abenda okubonebwa nga bali kukaadha mu bivaalo ebireeyi, n'okulamusibwa mu biya,

³⁹ n'okutyama mu bifo eby'emberi mu sinagoga, n'okuba mu bifo eby'ekitiisa ku mbaga, era

⁴⁰ n'okukaavuula eby'omu ndhu dha banamwandu nga basoma esaala edh'okweraga edhitakutuka. Abo ekibonerezo balifuna kinene.”

Ekigheebwayo kya namwandu

⁴¹ Agho yaatyama emberi w'ekifo ekiteebwamu ebiwongebwa, yaalingirira abantu boonaboona nga bwe basuulamu empiiya abakombe kamaala nga basuulamu buvangata.

⁴² Yaidhayo namwandu nga mwavu, yaasuulamu obusente bubiri nga bugheza kwadaranti ndala eti.

⁴³ Agho yaayeta Abeegeresebwa be yaabakoba ati: “Bwenebwene mbakobera nti namwandu ono omwavu atairemu kinene omuteebwa ebiwongebwa okusinga boonaboona

⁴⁴ kuba abandi boonaboona baghaireyo ku bingi bye bali nabyo. Aye ono omukazi, mu bwetaavu bwe, aswiremu byonabyona by'abaire nabyo, nga n'obulamu bwe bwonabwona.”