Mariko 10 - Baibuli Ekibono kya Katonda 2014

Yesu ayegeresa ku bufumbo

¹ Yesu yaava agho yaaja mu kiketezo eky'e Buyudaaya ng'osomoike Yorudani abantu kamaala baasombokera gh'ali kabiri era yeena yaabeegeresa, nga bwe yali amanhiriire.

² Agho Abafarisaayo baaseeta baamubuuza nga bamuleba oba nga kiikirizibwa mu Mateeka omusaadha okubinga mukazi we.

³ Yesu yaabakoba ati: “Musa yabalagira ki?”

⁴ Baakoba bati: “Musa yaganha okumughandiikira embaluwa ey'okumubinga, memale yasiibulwa.”

⁵ Agho Yesu yaabakoba ati: “Olw'okuba muli ba nkandya kyova yabaghandiikira eiteeka eryo.

⁶ Aye ng'okuviira irala mu mainhama Katonda ng'atonda, yakola omusaadha n'omukazi.

⁷ Omusaadha kyava aleka ise n'inhina naagumira ku mukazi we, ababiri baafuuka muntu mulala.

⁸ Olwo nga tibakaali bantu babiri aye mulala.

⁹ Ekyo ni Katonda kye yayimba omuntu atakiyimbululanga.”

¹⁰ Nga bali mu ndhu, Abeegeresebwa be baamubuuza kabiri ku nsonga eno.

¹¹ Yaabakoba ati: “Oyo abinga mukazi we n'abayiza owundi aba ayenze ku mukazi oyo.

¹² Era n'omukazi bw'anoba ku iba n'abayira owundi, aba ayenze.”

Yesu agha abaana abato omukisa

¹³ Agho baamuleetera abaana abato abagemeku, aye Abeegeresebwa be baadhuuka abaali babaleeta nga babalobera.

¹⁴ Yesu olwakibona, yaasungughala, yaabakoba ati: “Muleke abaana abato baidhe ye ndi, mutabalobera kuba abali ng'abo n'ababa mu Bwakyabazinga bwa Katonda.

¹⁵ Bwenebwene ka mbakobere, oyo ataikiriza Bwakyabazinga bwa Katonda ng'omwana omuto, taghanga naire kububaamu.”

¹⁶ Agho yaalera abaana yaabagha omukisa ng'abaisaaku emikono.

Omukombe n'obulamu obutawaagho

¹⁷ Yesu olwagwa mu ngira ati, ghaabaagho eyamulumuukirira yaakuba amakiryaivu, yaamubuuza ati: “Mwegeresa omulungi, nkole ki okufuna obulamu obutawaagho?”

¹⁸ Yesu yaamukoba ati: “Ondhetera ki omulungi? Ezira mulungi okutoolaku Katonda yenka.

¹⁹ Ebiragiro obiidhi: ‘Toitanga, toyendanga, toibanga, toghaayirizanga, tokupankupanianga, lata wo n'inhoko obaghanga ekitiisa.’ ”

²⁰ Agho yaakoba Yesu ati: “Mwegeresa, ebyo byonabyona nabigema okuva mu buto.”

²¹ Yesu yaamwekalirisa yaamwesiimisa, era yaamukoba ati: “Kirala ky'okaabulwaku! Ja otunde by'oli nabyo byonabyona, oghe abaavu, eby'obukombe oliba nabyo mu igulu oidhe obitenga ninze.”

²² Ekyo kyamunakughaza yaaja ng'afootookereire, kuba yali n'ebintu kamaala.

²³ Yesu yeezunguluza maiso, yaakoba Abeegeresebwa be ati: “Nga kikalangufu abakombe okutuuka mu Bwakyabazinga bwa Katonda!”

²⁴ Abeegeresebwa be beewuunhia ebibono ebyo. Aye Yesu yaabakoba ati: “Baana bange, nga kikalangufu okutuuka mu Bwakyabazinga bwa Katonda.

²⁵ Kiba kyangu engamiya okubita mu mpami ey'empiso okusinga omukombe okutuuka mu Bwakyabazinga bwa Katonda.”

²⁶ Agho beewuunhia n'okusingagho era mule beebuuza bati: “Memale olwo naani asobola okulokolebwa?”

²⁷ Agho Yesu yaabalingirira, yaakoba ati: “Ku bw'omuntu tikisoboka aye ti ku Katonda kuba mu Katonda byonabyona bisoboka.”

²⁸ Agho Petero yaatoolera okumukoba ati: “Kale ife, twaleka byonabyona twabita ni iwe!”

²⁹ Yesu yaakoba ati: “Bwenebwene mbakobera nti ghazira oyo aleka maka ge, oba baganda be, oba baanhina, oba inhina, oba ise, oba baana, oba kibandha kye, ku lwange ni ku lw'Amawulire Amalungi

³⁰ n'atafuna maka ni baganda be ni baanhina ni ba inhina n'abaana n'ebibandha, emikuzi kikumi mu nsi muno, taaku okudaazibwadaazibwa, ate mu biseera ebiidha, obulamu obutawaagho.

³¹ Aye abantu ab'emberi kamaala abaliba ab'ensembo n'ab'ensembo abaliba ab'emberi.”

Ayogera ku kufa kwe omukuzi ogwokusatu

³² Agho Abeegeresebwa baaba mu ngira nga baja e Yerusalemu, Yesu nga n'abembereiremu; beewuunhia inho era baamunonereza nga batya. Kabiri yaatoola Eikumi n'Ababiri yaatoolera okubakobera ebija okumugwira, ng'akoba ati:

³³ “Mwetegereze, buti tuli kuja e Yerusalemu, Omwana w'Omuntu aidha kugheebwayo ye Bakabona Abakulu ni y'Abanamateeka. Abo baidha kumughaayo eri abamaghanga agandi,

³⁴ bamukiine, baamufuudheku amatanta, baamudaazedaaze era bamwite. Aye nga ghabise enaku isatu alizuukira.”

Okusaba kwa Yakobo ni Yoanne

³⁵ Agho Yakobo ni Yoanne, abaana ba Zebedaayo baaseeta aghaali Yesu baamukoba bati: “Mwegeresa, twenda otukolere kyonakyona kye tunaakusaba.”

³⁶ Yaabakoba ati: “Kiki kye mwenda mbakolere?”

³⁷ Baamukoba bati: “Tuganhe, omulala atyame ku mukono gwo omusaadha, ate owundi ku mugooda mu kitiisa kyo.”

³⁸ Yesu yaabakoba ati: “Kye musaba timukiidhi! Musobola okunhwa ekikopo kye nhwaku, oba okubatizibwa n'okubatizibwa kwe mbatizibwa?”

³⁹ Baamukoba bati: “Tusobola.” Agho Yesu yaabakoba ati: “Ekikopo kye nhwa mulikinhwa, n'okubatizibwa kwe mbatizibwa mwena mulikubatizibwa.

⁴⁰ Aye eky'okutyama ku mukono gwange omusaadha oba ku mugooda ti ninze nkibagha, era ky'abo be kyategekerwa.”

⁴¹ Bale Eikumi bwe baawulira, baasungughalira Yakobo ni Yoanne.

⁴² Yesu yaabeeta yaabakoba ati: “Mwidhi muti abo ababalibwa nga bafuzi ba maghanga, bagafuga, era n'abakulu mu abo, baba n'obuyinza ku banaibwe.

⁴³ Aye mu imwe tikiri kityo! Buli ayenda okuba omukulu mu imwe, abe mugheereza waimwe.

⁴⁴ Era buli ayenda okuba asooka mu imwe, abe mwiru wa boonaboona

⁴⁵ kuba n'Omwana w'Omuntu tiyaidha kugheerezebwa aye kugheereza n'okughaayo obulamu bwe, olw'okununula abantu kamaala.”

Barutimao awonezebwa

⁴⁶ Agho baatuuka e Yeriko era yaava mu Yeriko ng'ali n'Abeegeresebwa be n'eikuukuubira ery'abantu. Barutimao omutulu, omwana wa Timao, eyali ng'asabiriza yali atyaime agho ku mbali ku ngira.

⁴⁷ Bwe yawulira ati Yesu Omunazarethi n'ali kubita yaatoolera okwasiikana ng'akoba ati: “Yesu, mwidhukulu wa Daudi, nsaasira.”

⁴⁸ Abantu kamaala baamukaabukira asirike, aye yayongera bwongere kwasiikana ati: “Mwidhukulu wa Daudi, nsaasira.”

⁴⁹ Yesu yaayemerera, yaakoba ati: “Mumwete.” Agho baayeta omutulu nga bamukoba bati: “Guma omwoyo, situka, ali kukweta.”

⁵⁰ Agho yaasuula ere ekidhuuba, yaasituka mangu yaaja aghaali Yesu.

⁵¹ Yesu yaamukoba ati: “Oyenda nkukolere ki?” Omutulu yaamukoba ati: “Rabboni”, ekitegeeza “Mwegeresa”, “Nhenda kwiramu kubona.”

⁵² Agho Yesu yaamukoba ati: “Ja, okwikiriza kwo kukuwoniiza.” Era nga mangu ago airamu okubona, era yaamunonereza mu ngira.