Malaki 2 - Baibuli Ekibono kya Katonda 2014

¹ Musengwa Katonda Afuga Amagye akoba ati: “Imwe bakabona, kino ekiragiro kyaimwe:

² Muli n'okuntaamu ekitiisa. Aye ekyo bwe munaaloba okukitaaku omwoyo, ndibasindikira ekikolimo, n'edhandibaire enkabi dhoona naadhireetera okufuuka ebikolimo. Mu butuufu ekyo namala ira n'okukikola, kuba ekiragiro kyange timukitaaku mwoyo.

³ Ndibonereza abaana baimwe, n'imwe beene naababbaaka obusa bw'ensolo dhe mughaayo ng'emisengo. Era ndibabinga ghe ndi.

⁴ Agho mulimanha nga nze Musengwa Katonda Afuga Amagye ninze mbaghaire ekiragiro ekyo. Olwo endagaano yange ye nakola ni bakabona, baidhukulu ba Levi, erobe kumenhebwa.

⁵ “Mu ndagaano yange nabasuubiza okubagha obulamu n'emiraala. Naamala naabibagha, basobole okuntangamu ekitiisa. Era mu biseera ebyo bantangamu ekitiisa era bantyanga.

⁶ Baasomesanga bituufu byereere nga muzira kisobu. Baabanga ghalala ninze mu miraala ni mu bwesimbu. Era baaleeteranga abantu kamaala okulekera okukola ebibi,

⁷ kuba bakabona omulimo gwaibwe gwa kwegeresa magezi amatuufu agava ye nze Musengwa Katonda Afuga Amagye. Era abantu bandibairenga nga baja ye bakabona abo okugalagirwa bye nhenda bakole.

⁸ “Aye ate kabiri imwe bakabona mwava ku ngira entuufu, mwadaaliima. Mwaleetera abantu kamaala okukola ebibi, olw'ebyo bye mwegeresa, era mwamenha endagaano ye nakola n'imwe, baidhukulu ba Levi.

⁹ Kale zeena kyenviire ni mbaleetera okufuuka abanhoomebwa era abatakaalimu kanhagansi mu bantu boonaboona, kuba timukola bye mbalagira, era muboola mu bantu bange nga muli kubeegeresa.”

Abantu ti beesigwa eri Katonda

¹⁰ Twenatwena tuli n'iseife mulala, Katonda omulala oyo eyatutonda. Memale lwaki tuloba okwesigagana? Era lwaki tunhooma endagaano Katonda ye yakola ni badhaadha baife?

¹¹ Abantu b'omu Buyudaaya tibabaire beesigwa ye Katonda naire. Bakoze ebyenhinhalwa mu Yerusalemu, ni mu nsi Isiraeli yoonayoona. Bafumbiirwa abakazi abasinza bakatonda ab'amaghanga agandi. Mu nsambo eyo baayonoona obutukuvu bw'eisinzizo lya Musengwa Katonda ly'agonza.

¹² Musengwa Katonda agwananga yaatoola mu Baisiraeli omuntu yeenayeena eyakola ekyo, era yaaloba kwirayo kumuganha kweyimba na bantu ba ighanga lyaife nga baleeta ebigheebwayo eri Musengwa Katonda Afuga Amagye.

¹³ Ekindi kye mukola ni kino: Muboza alutaari ya Musengwa Katonda n'amaziga ge mulira nga muwowoola, olw'okuba ebigheebwayo bye mumuleetera takaabisiima waire okubiringaku.

¹⁴ Era mwebuuza muti: “Lwaki takaabisiima?” Ekituufu kiri nti takaabisiima, lwa kuba Musengwa Katonda oyo yali mudhulizi wa ndagaano ey'obufumbo ye mwakola ni bakazi baimwe be mwafumbirwa mu buvubuka bwaimwe. Aye buti timukaali beesigwa ye bali, ate nga ni banaimwe beene era bakazi baimwe ab'endagaano.

¹⁵ Katonda imwe tiyabatonda nga muli omwoyo mulala n'omubiri mulala ni bakazi baimwe? Yali na kigendererwa ki? Yayenda muzaale abaana abamutya. Kale mwegenderezenga ghalobe kubaagho atali mwesigwa eri mukazi we ow'omu buvubuka bwe.

¹⁶ Musengwa Katonda wa Isiraeli akoba ati: “Nkyagha ekikolwa eky'abafumbo okwawukana.” Era Musengwa Katonda oyo Afuga Amagye akoba ati: “Nkyagha ekikolwa ekyo eky'obukambwe eky'omusaadha okubinga mukazi we. Kale mwegenderezenga mulobe kubanga batali beesigwa.”

Olunaku olw'okusaliraku omusango luli kumpi

¹⁷ Mukooya Musengwa Katonda n'ebyo bye mwogera. Aye ate mwamala mwabuuza muti: “Tumukooya tutya?” Ate nga mumukooya bwe mukoba muti: “Kiisi muntu akola kibi aba mulungi mu maiso ga Musengwa Katonda, era Musengwa Katonda amusangaalira.” Oba bwe mubuuza muti: “Katonda oyo akola ebituufu nga tasaliriza ali gha?”