Luka 9 - Baibuli Ekibono kya Katonda 2014

Yesu atuma Eikumi n'Ababiri

¹ Yesu bwe yamala okweta aghalala Eikumi n'Ababiri, yaabagha amaani n'obukumu ku mizimu emibi gyonagyona, n'okuwonianga endwaire.

² Yaabatuma okulangirira Obwakyabazinga bwa Katonda n'okuwonia abalwaire.

³ Era yaabakoba ati: “Bwe muja, timutwala kantu koonakoona, waire omwigo, waire ensawo, waire omugaati, waire empiiya, waire omuntu okuba n'ebivaalo ebibiri.

⁴ Endhu yoonayoona mwe mwingiranga musulanga omwo, era mwe muviiranga okweyongerayo.

⁵ Ate yoonayoona ye batabasangaaliranga, bwe mubanga nga muva mu kibuga ekyo, mukunkumulanga enkungu mu bigere byaimwe nga n'obudhulizi.”

⁶ Agho baasimbuka baabitabita mu buli kyalo nga bakobera abantu Amawulire Amalungi woonawoona, era nga bawonia abalwaire.

Ekyawubania Herode

⁷ Agho Herode ow'eisaza yaawulira byonabyona ebyaligho era byamuwubania, kuba eriyo abaali bakoba bati Yoanne azuukire mu bafu,

⁸ abandi bati Eliya n'aboneike, ate abandi bati mulala ku balanzi ab'eira n'azuukiire.

⁹ Aye Herode yaakoba ati: “Yoanne nze namutemaku omutwe, ate naani ono ye mpuliraku ebyaga agho?” Yaayenda okumubona.

Yesu aliisa abantu enkumi eitaanu

¹⁰ Abatume bwe baira baalomboodhera Yesu bye baakola. Yaabagemaku yaaja nabo bonka mu kibuga ekyetebwa Bethisaida.

¹¹ Abantu kamaala baategeera era baamunonereza yaabasangaalira, yaabakobera ku Bwakyabazinga bwa Katonda era yaawonia abaali benda okuwonezebwa.

¹² Obwire bwe bwatoolera okuziba, Eikumi n'Ababiri baaseeta, baamukoba bati: “Siibula abantu baje mu bibuga ni mu byalo ebyetooloire ghano bafune agh'okusula ni bye benda, kuba ghano tuli mu irungu.”

¹³ Aye Yesu yaabakoba ati: “Imwe mubaghe eky'okulya.” Baakoba bati: “Memale ife tuligho n'emigaati etaanu n'ebyenhandha bibiri, koodhi nga tuja twagula emere ey'abantu bano boonaboona?”

¹⁴ Ghaaligho abasaadha ng'oti nkumi itaanu (5,000). Yesu yaakoba Abeegeresebwa be ati: “Mubatyamye mu bikunsu bya bantu ng'amakumi ataanu ataanu.”

¹⁵ Baakola batyo, baabatyamya boonaboona.

¹⁶ Yaatoola emigaati etaanu n'ebyenhandha ebibiri yalinga ghaigulu mu igulu, yaabigha enkabi yeeyanza, yaabimegulamu yaagha Abeegeresebwa bagabule abantu.

¹⁷ Boonaboona baalya baiguta, era baasoloza ebiibo ikumi na bibiri eby'ebitundu ebyafiikagho.

Petero ayatula ati Yesu ni Kurisito

¹⁸ Agho olwatuuka, Yesu yali ali kusaba yenka aye nga Abeegeresebwa be bali naye, yaababuuza ati: “Abantu bandheta batya?”

¹⁹ Baamwiramu bati: “Yoanne Omubatiza, aye abandi bati Eliya, ate abandi bati mulala ku balanzi ab'eira n'azuukiire.”

²⁰ Yaabakoba ati: “Ate imwe mundheta ani?” Petero yaamwiramu ati: “Niiwe Kurisito wa Katonda.”

Yesu ayogera ku kufa kwe n'okuzuukira kwe

²¹ Aye yaabasikirira ekyo balobe kukikoberaku muntu yeenayeena.

²² Era yaabakobera ati: “Omwana w'Omuntu taliroba kudaazibwadaazibwa inho. Abakulu ab'ebika, Bakabona Abakulu, n'Abanamateeka, balimwegaana era aliitibwa, ate ku lunaku olwokusatu alizuukira.”

²³ Agho ni yaabakoba boonaboona ati: “Oba nga ghaligho ayenda okuba Omwegeresebwa wange, alobe kwefaaku naire, abbeede omusalaba gwe buli lunaku annonereze

²⁴ kuba buli ayenda okuwonia obulamu bwe, oyo abuza bubuze aye abuza obulamu bwe ku lwange, oyo abuzaawula.

²⁵ Kigasa ki omuntu okufuna ensi yoonayoona aye yaazaagha oba yaazikirira?

²⁶ Era buli ye ngemya ensoni, n'ebibono byange ye bigemya ensoni, oyo yeena aligemya Omwana w'Omuntu ensoni lw'aliidha mu kitiisa kye, n'ekya Ise, n'ekya bamalaika abatukuvu.

²⁷ “Aye bwenebwene, ka mbakobere: Ghaligho abandi ku bemereire ghano abatalirega ku kufa okutuusa nga baboine Obwakyabazinga bwa Katonda.”

Okufuuka obundi okwa Yesu

²⁸ Agho olwatuuka, nga ghabiseegho enaku oti munaana ng'amaze okwogera ebibono ebyo, yaatwala Petero ni Yoanne ni Yakobo, baaniina ku lusozi okusaba.

²⁹ Bwe yali asaba, emboneka ye mu maiso yaafuuka bundi n'ebivaalo bye byafuuka byeru, byamesunkana.

³⁰ Okuja okubona nga ghaligho abasaadha babiri Musa ni Eliya, be yali ali kwogera nabo.

³¹ Baabonekera mu kitiisa baayogera ku kuja kwe, kwe yali aja okumalira mu Yerusalemu.

³² Petero ni be yali nabo baali batenduka, aye bwe baazuuka baabona ekitiisa kya Yesu, n'abasaadha ababiri nga bemereire naye.

³³ Agho abasaadha bwe baava aghali Yesu, Petero yaamukoba ati: “Musengwa, tulongoire twaba ghano, era ka tuseemente entindi isatu: eyiyo, eya Musa, n'eya Eliya.” Yali taidhi ky'ali kukoba.

³⁴ Yali akaayogera ekire kyaidha kyabakingiriza era baawulira okutya bwe baali bali kwingira mu kire.

³⁵ Agho eiroboozi lyava mu kire nga likoba liti: “Ono ni Mutabane wange, omulonde, mumuwulirenga!”

³⁶ Eiroboozi bwe lyasirika, baabona Yesu ng'ali yenka. Baasirika, ghaabulagho ye bakoberaku mu nnaku edho, ekintu kyonakyona ku bye baabona.

Yesu awonia eyaliku omuzimu omubi

³⁷ Olunaku olwairirira, bwe baikirira okuva ku lusozi, baayagaanana n'eikuukuubira ery'abantu.

³⁸ Ghaabaagho omusaadha mu ikuukuubira yaayetera ghaigulu ati: “Mwegeresa, nkweghembye bona omwana wange. Ono n'omwana ye ndi naye yenka,

³⁹ aye bona omuzimu gumugema, talwa ng'ayasiikana, era nga gumutandigira, ng'afuukeera. Era tigumuvaaku nga tigumumenhiemenhie.

⁴⁰ Neeghembye Abeegeresebwa bo bagumubingeku, aye tibaghanze.”

⁴¹ Yesu yaamwiramu ati: “Yii, oluse luno olw'abantu abazira kwikiriza era abadankaanu! Ndituusa gha okuba n'imwe n'okubaguminkiriza? Leeta ghano mutabane wo.”

⁴² Bwe yali aseeta, omuzimu gwamusuula ghansi era gwamusikasika inho. Aye Yesu yaakaabukira omuzimu omubi, yaawonia omulenzi era yaamugemya lata we.

⁴³ Boonaboona baayasaamirira olw'obukumu bwa Katonda. Boonaboona baali bakeewuunhia bye yakola, Yesu yaakoba Abeegeresebwa be ati:

Yesu airamu okwogera ku kufa kwe

⁴⁴ “Muwulirise bukalamu bino bye nja okubakoba: Omwana w'Omuntu aja kugheebwayo mu mikono egy'abantu.”

⁴⁵ Aye kino tibaakitegeera kuba kyabakwekebwa baaloba kukimanha, ate baatya okumubuuza ku kibono ekyo.

Naani asinga obubbede

⁴⁶ Agho baatoolera okutakana beene na beene nga beebuuzagania naani mu beene asinga obubbede.

⁴⁷ Yesu yaategeera ebidhuubo eby'omu myoyo gyaibwe, yaatoola omwana yaamwemereza agho okuliiraana ghe yali,

⁴⁸ era yaabakoba ati: “Buli asangaalira omwana ono mu liina lyange aba asangaaliire nze; asangaalira nze aba asangaaliire oyo eyantuma; kuba asembayo mu imwe mwenamwena, oyo n'omubbede.”

Omuntu atabatakania aba munaimwe

⁴⁹ Agho Yoanne yaamwiramu ati: “Mwegeresa, twabona omuntu ng'ali kubinga emizimu emibi mu liina lyo era twamulobera, kuba ti mwegeresebwa wo ng'oti niife.”

⁵⁰ Yesu yaamukoba ati: “Mutamuloberanga, kuba oyo atabatakania aba munaimwe.”

Ekyalo eky'Abasamaria kiroba okusangaalira Yesu

⁵¹ Agho enaku dha Yesu edh'okutwalibwa mu igulu bwe dhaatuuka, Yesu yaamalirira okuja e Yerusalemu.

⁵² Yaatuma abakwenda bamwesookengayo. Era bwe baaja bangira mu kyalo eky'Abasamaria basobole okumwetegekera,

⁵³ aye tibaamusangaalira kuba yabonekera irala ng'aja Yerusalemu.

⁵⁴ Abeegeresebwa be, Yakobo ni Yoanne bwe baabona ekyo, baakoba bati: “Musengwa, wandyenze tulagire omuliro guve mu igulu gubazikirize?”

⁵⁵ Aye Yesu yaabakyukira yaabanenia.

⁵⁶ Era baavaagho baaja mu kyalo ekindi.

Abaayenda okuba Abeegeresebwa ba Yesu

⁵⁷ Agho bwe baali batambula mu ngira ghaabaagho eyamukoba ati: “Ndidha kukunonerezanga buli gh'onaajanga.”

⁵⁸ Yesu yaamukoba ati: “Ebibe biri n'ebiina, n'enhonhi edh'omu ibbanga dhiri n'ebisu, aye Omwana w'Omuntu azira gh'aisa mutwe.”

⁵⁹ Yesu yaakoba owundi ati: “Nnonereza.” Aye ole yaakoba ati: “Musengwa, nganha nsooke nje nziike lata wange.”

⁶⁰ Agho yaamukoba ati: “Leka abafu baziike abafu baibwe, aye iwe ja olangirire Obwakyabazinga bwa Katonda.”

⁶¹ Kabiri owundi yaamukoba ati: “Musengwa, nze ndidha kukunonereza, aye nganha nsooke nje nsiibule ab'eka.”

⁶² Oyo Yesu yaamukoba ati: “Ezira agema mbago kulima ate n'alingirira ebimuli einhuma, oyo tawoomera mu Bwakyabazinga bwa Katonda.”