Luka 8 - Baibuli Ekibono kya Katonda 2014

Abakazi abaabitanga ni Yesu

¹ Olwatuuka, nga ghabiseegho entangama, Yesu yaaja ng'abita mu bibuga ni mu byalo bw'alangirira era bw'akobera abantu Amawulire Amalungi ag'Obwakyabazinga bwa Katonda, nga n'Eikumi n'Ababiri bali naye.

² Era ghaaligho n'abakazi, be yali nabo abaali bawonezeibwa emizimu emibi n'ebirwaire ebindi: Maria ayetebwa Magadalene eyavaaku emizimu omusanvu,

³ ni Yoanna muka Kuza omughanika wa Herode, ni Susanna, n'abandi kamaala abaatoolanga ku byaibwe okuyamba Yesu n'Abeegeresebwa be.

Olufumo olw'omusizi

⁴ Agho abantu kamaala beesololeza aghaali Yesu okuva mu buli kibuga. Yaabakobera olufumo luno:

⁵ “Ghaabaagho omuntu eyaja okusiga ensigo bwe yali asiga, eyindi yaagwa ku ngira yaaniinirirwa era n'enhonhi edh'omu ibbanga dhaidha dhaagirya.

⁶ Eyindi yaagwa ku lubaale yaamera, aye yaavuuluka kuba tiyali na maadhi.

⁷ Eyindi yaagwa mu mawa, era olw'okukulira mu mawa gaagifundekeza.

⁸ Eyindi yaagwa mu itaka eirungi, yaakula yaayama, yaataaku kikumi.” Bwe yasirisa ebyo yaayogerera ghaigulu ati: “Ali n'amatu agawulira awulire!”

Ekifumya enfumo

⁹ Abeegeresebwa be baamubuuza olufumo olwo kye lutegeeza.

¹⁰ Yaakoba ati: “Imwe mwagheebwa okumanha ebyama eby'Obwakyabazinga bwa Katonda aye eri abandi biri mu nfumo, baabona nga tibabona, baawulira nga tibategeera.”

Okwinhonhola olufumo olw'omusizi

¹¹ “Mperaano olufumo lutegeeza kino: Ensigo, n'ekibono kya Katonda.

¹² Eyagwa ku ngira, n'abantu abawulira ekibono kya Katonda, memale Sitaani n'aidha n'akiswankula mu myoyo gyaibwe balobe kwikiriza na kulokolebwa.

¹³ Ate eyagwa ku lubaale, n'abantu abawulira ekibono kya Katonda ni bakisangaalira n'eisanhu aye nga bazira mizi baikirizaaku kaseera buseera, aye akaseera ak'okulebwa bwe katuuka nga babivaaku.

¹⁴ Ate eyo eyagwa mu mawa n'abantu abawulira ekibono kya Katonda, aye bwe baja, okweraliikirira, obukombe, n'amasanhu ag'obulamu buno bibafundekeza, era tibaleeta bibala.

¹⁵ Eyo eyagwa mu itaka eirungi, n'abo abawulira ekibono kya Katonda n'omwoyo ogugwaine era omulungi, baakikalangula baabala ebibala nga baguminkiriza.

Eitaala mu kiibo

¹⁶ “Ezira muntu akunaania itaala kabiri n'alifundikaku kiibo, oba n'alita mu kunkuliisi aye alita ku kikondo kyalyo memale abangira baabona okumulika kwalyo.

¹⁷ “Kuba ezira kigise kitalikwekulwa, waire kyama ekitalimanhibwa mu lwatu.

¹⁸ “Mwegendereze niini ensambo ye muwuliramu, kuba oyo ali ni kyali nakyo aligheebwa, ate oyo azira, ni ky'adhuuba okuba nakyo kirimutoolebwaku.”

Baganda ba Yesu n'inhina

¹⁹ Agho inhina ni baganda be baidha y'ali, aye tibaaghanga kumutuukaku olw'abantu okuba kamaala.

²⁰ Baamukobera bati: “Inhoko ni baganda bo beemereire ku luya benda okukubona.”

²¹ Yesu yaabairamu ati: “Mukaire wange ni baganda bange n'abo abawulira ekibono kya Katonda era ni bakikoleraku.”

Yesu alekeza kiwunga

²² Lwali lulala Yesu yaaniina mu lyato n'Abeegeresebwa be, yaabakoba ati: “Tusomoke enhandha tuje kule.” Baasimbuka baaseeyeeya.

²³ Bwe baali nga bali kuseeyeeya yaatenduka. Agho kiwunga yaidha ku nhandha, eryato nga lyenda kwidhula era nga bali bwa ku mutawaana.

²⁴ Baaseeta ghe yali baamuzuusa baamukoba bati: “Mwegeresa, Mwegeresa, tuli kusaanagho!” Aye bwe yazuuka, yaakaabukira kiwunga n'amaadhi agaali gatabwike byalekera era kyaba mulaala.

²⁵ Yaabakoba ati: “Okwikiriza kwaimwe kuli gha?” Baatya era beewuunhia nga bwebabuuzagania bati: “Aye naani ono, alagira n'empewo n'amaadhi era ni bimuwulira!”

Yesu awonia eyaliku emizimu e Gerasa

²⁶ Agho baaseeyeeya baikirira mu nsi ey'ab'e Gerasa eringiriire Galilaaya.

²⁷ Bwe yatuuka ku bukalu yaayagaanana n'omusaadha eyali ava mu kibuga ng'aliku emizimu emibi, era yali amaze entangama nga tavaala, nga tasula mu ndhu, ng'asula eyo mu lwambiidhi omwaziikibwanga abantu.

²⁸ Bwe yabona Yesu, yaagwa agho mu maiso ge era yaaleekaanira ghaigulu ati: “Yesu Omwana wa Katonda Ali Ghaigulu Yeene, onhendeza ki? Nkweghembye otandaazadaaza.”

²⁹ Kuba yalagira omuzimu omubi okumuvaaku. Emikuzi kamaala gwamugemanga, baamukuuma era baamusiba n'endhegere aye ng'edho adhikutula, omuzimu gwamutwala mu irungu.

³⁰ Yesu yaamubuuza ati: “Eriina lyo niiwe ani?” Yaakoba ati: “Ninze ‘Igye,’” kuba emizimu emibi kamaala egyamuliku.

³¹ Era gyamweghemba alobe kugisindiikiriza mu lwina olutakoma.

³² Mperaano, agho ku lusozi ghaaligho ekighaso eky'embiidhi kamaala kale gyamusaba agiganhe gije mu mbiidhi edho, era yaagiganha.

³³ Agho ni gyava ku musaadha gyangira mu mbiidhi era ekighaso eky'embiidhi kyalindimukira ku kiyiriro dhaagwa mu nhandha dhaadimira.

³⁴ Abaali bali kudhaaya bwe baabona ebibairegho baalumuka baaja baakobera ab'omu kibuga ni mu byalo.

³⁵ Abantu baaja okubona ebibairegho, era bwe baatuuka aghali Yesu, baayagaana omusaadha eyavaaku emizimu ng'atyaime agho gha bigere bya Yesu ng'avaire era ng'ategeera bukalamu, baatya.

³⁶ Abo abaabona ebyabaagho baabakobera eyaliku emizimu emibi bwe yawonezebwa.

³⁷ Abantu boonaboona ab'omu nsi ey'ab'e Gerasa baamusaba abaviire kuba baali batiire inho. Kale yaaniina mu lyato yairayo.

³⁸ Omusaadha eyavaaku emizimu emibi yaamusaba abitenga naye aye Yesu yaamusiibula ng'akoba ati:

³⁹ “Irayo eka obakobere ebikulu Katonda by'akukoleire.” Era yaaja mu kibuga mwonamwona ng'alangirira ebyo Yesu bye yamukolera.

Mughala wa Yairo n'omukazi eyagema ku kivaalo kya Yesu

⁴⁰ Agho Yesu bwe yairayo, abantu kamaala baamusangaalira kuba boonaboona baali bamutegeire.

⁴¹ Olwo ni ghaidhagho omusaadha ayetebwa Yairo, eyali nga mukulu wa sinagoga. Yaakuba amakiryaivu gha bigere bya Yesu yaamusaba ajeeku mu ndhu ye.

⁴² Kuba mughala we omulala bedengedenge, eyali ow'emyaka eikumi n'ebiri yali ali kufa. Bwe yali aja abantu kamaala baamwenhigirizaaku.

⁴³ Ghaabaagho omukazi eyali alwaire ekikulukuto okumala emyaka ikumi n'ebiri, aye ghaabulagho asobola okumuwonia.

⁴⁴ Ono yaaseeta ng'ava emugongo yaagema ku lusa olw'ekivaalo kya Yesu, era mangu ago ng'omusaayi gulekera agho.

⁴⁵ Yesu yaabuuza ati: “Naani angemyeku?” Boonaboona bwe beegaana, Petero yaamukoba ati: “Mwegeresa, eikuukuubira ery'abantu likwetooloire era bali kukwenhigirizaaku.”

⁴⁶ Aye Yesu yaakoba ati: “Ghaligho angemyeku, kuba ntegeire amaani bwe ganviiremu.”

⁴⁷ Omukazi bwe yabona nga takaaghanga kwegisa, yaidha ng'adhugumira yeeyala agho mu maiso ga Yesu, yaayogera ekimumugemeisaaku ng'abantu boonaboona bamuwulira, era yaakoba nga bw'awoneiregho.

⁴⁸ Yesu yaamukoba ati: “Omughala, okwikiriza kwo kukuwoniiza ja miraala.”

⁴⁹ Yali akaayogera ghaabaagho eyaidha ng'ava ew'omukulu wa sinagoga yaakoba ati: “Mughala wo afiire, otayongera kudaaza Mwegeresa.”

⁵⁰ Aye Yesu bwe yawulira ekyo yaakoba Yairo ati: “Otatya, ikiriza bwikirize, aidha kuwona.”

⁵¹ Bwe yatuuka ku ndhu, tiyaganha muntu wundi yeenayeena kungira naye okutoolaku Petero ni Yoanne ni Yakobo ni lata w'omughala n'inhina.

⁵² Boonaboona abaaligho, baali mu kulira na kugegenga. Aye yaabakoba ati: “Mutalira, tafiire aye atendwike!”

⁵³ Baamusekerera, nga bakiidhi ng'afiire.

⁵⁴ Yesu yaamugema ku mukono yaamweta ati: “Omughala, situka.”

⁵⁵ Omughala yairibwa, yaasitukiramu era Yesu yaalagira bamughe emere alye.

⁵⁶ Abazaire be beewuunhia aye yaabasikirira obutakoberaku muntu yeenayeena ebibairegho.