Luka 7 - Baibuli Ekibono kya Katonda 2014

Yesu awonia omwiru w'omukulu ow'ekikunsu eky'abaisirukale

¹ Yesu bwe yamala okwogera ebibono bye byonabyona eri abaamuwulirisa, yangira mu Kaperinaumu.

² Yaabaayo omukulu ow'ekikunsu eky'abaisirukale eyali n'omwiru we ye yali agonza einho nga mulwaire era ng'ali kumpi na kufa.

³ Bwe yawulira ebifa ku Yesu yaamutumira abakulu b'Abayudaaya ng'amusaba aidhe awonie omwiru we.

⁴ Bwe baatuuka ye Yesu baamweghemba inho, baakoba bati: “Ogwaine okumukolera ekyo,

⁵ kuba agonza eighanga lyaife, era yatuzimbira ni sinagoga.”

⁶ Yesu yaaja nabo. Aye bwe yali ali kumpi okutuuka ku ndhu, omukulu ow'ekikunsu eky'abaisirukale yaatuma bakagwa be yaamukoba ati: “Musengwa otadaaga, kuba nze tigwaniire iwe ongire mu ndhu yange.

⁷ Kyova nadhuubye nga nze mwene tigwaine kwidha y'oli. Aye koba bukobe kibono, omwiru wange aidha kuwona

⁸ kuba ndi musaadha mutwalibwa, ate era ndi n'abaisirukale be ntwala. Era nkoba ono nti, ‘Ja,’ era yaaja. Ate owundi nti, ‘Idha,’ era yaidha ate omwiru wange nti, ‘Kola kino,’ era yaakikola.”

⁹ Yesu bwe yawulira ebyo yaamwewuunhia era yaakyuka yaakoba eikuukuubira ery'abantu abaali bamunonereza ati: “Ka mbakobere, nighemwakaba mu Isiraeli tyagaananga kwikiriza kwaga agho.”

¹⁰ Abaatumibwa bwe baira eka, baayagaana ng'omwiru ali bukalamu.

Yesu azuukiza omwana wa namwandu e Naini

¹¹ Olwatuuka, ku lunaku olwairirira, Yesu yaaja mu kibuga ekyetebwa Naini. Abeegeresebwa be baaja naye n'eikuukuubira ery'abantu kamaala.

¹² Bwe yali ng'ali kumpi okutuuka ku mulyango ogw'ekibuga, ghaabaagho omulambo gwe baali bafulumya. Omufu yali nga yazaalibwa mulala ati ku inhina, ate ng'ono yali namwandu era abantu ab'ekibuga abaaligho baali kamaala.

¹³ Musengwa bwe yamubona yaamusaasira, yaamukoba ati: “Otalira.”

¹⁴ Yaaseeta yaagema ku miruumo, abaali basitwire omulambo baayemerera. Yaakoba ati: “Mwisuka, nkukoba situka!”

¹⁵ Eyali omufu yaatyama, yaatoolera okwogera, era Yesu yaamugemya inhina.

¹⁶ Boonaboona ensisi yaabagema era baagha Katonda ekitiisa nga bakoba bati: “Mu ife mulimu omulanzi ow'amaani, era ni Katonda akyaliire abantu be!”

¹⁷ Ekibono kino ekigema ku Yesu kyabuna mu Buyudaaya mwonamwona ni mu biketezo byonabyona ebiriinaine wo.

Yoanne Omubatiza atuma abakwenda

¹⁸ Abeegeresebwa ba Yoanne baamukobera ku bintu bino byonabyona.

¹⁹ Agho Yoanne yaayeta babiri ku beegeresebwa be, yaabatuma ye Musengwa okubuuza bati: “Niiwe ow'okwidha oba tusuubireyo owundi?”

²⁰ Era abasaadha bwe baatuuka ye Yesu baamukoba bati: “Yoanne Omubatiza atutumye y'oli ng'akoba ati, ‘Niiwe ow'okwidha, oba tusuubireyo owundi?’ ”

²¹ Mu kiseera kyene ekyo, Yesu yaawonia abantu kamaala endwaire, ni kawumpuli, n'emizimu emibi, n'abatulu kamaala yaabagha okubona.

²² Agho yaabairamu yaabakoba ati: “Muje mukobere Yoanne bye muboine ni bye muwuliire: abatulu bairamu kubona, abalema batambula, ab'endwaire ey'ebigenge balongooka, abaasemba amatu bawulira, abafu bazuukizibwa, n'abaavu bakoberwa Amawulire Amalungi

²³ Era wa nkabi atambona nga ekitimuguunha.”

²⁴ Abakwenda ba Yoanne bwe baagolola, Yesu yaatoolera okwogera ku Yoanne eri abantu ati: “Kiki ekyabatwala mu irungu okubona? Lugada empewo lw'etengeesa?

²⁵ Bwenebwene kiki ekyabatwala okubona? Muntu avaire amadholobera? Abavaala amadholobera era nga bali mu kwedhalabya baba mu bisaagaati bya bakyabazinga.

²⁶ Aye imwe kiki ekyabatwala okubona? Mulanzi? N'agh'agho. Ate ka mbakobere oyo asinga n'omulanzi.

²⁷ N'oyo ye kyaghandiikibwaku kiti, ‘Bona ndi kutuma omukwenda wange akwembereremu, aidha okukutegekera engira yo mw'olibita.’

²⁸ Ka mbakobere ezira muntu yeenayeena azaalibwa mukazi asinga Yoanne aye asembayo mu Bwakyabazinga bwa Katonda amusinga.”

²⁹ Abantu boonaboona baamuwulira, era abaghooza ab'omusolo baamanha obutuufu bwa Katonda, Yoanne yaababatiza.

³⁰ Aye Abafarisaayo n'Abanamateeka baaloba amagezi ga Katonda, era tiyababatiza.

³¹ Yesu yaayongera okubakoba ati: “Kale abantu ab'oluse luno nnaabageza ku ki? Bafaanana ki?

³² Bafaanana ng'oti n'abaana abatyaime mu kiya abayetagana nga bakoba bati, ‘Twabafuuyira endere timwakina, twakuba empungu timwagegenga!’

³³ Yoanne Omubatiza yaidha nga talya mugaati era nga tanhwa mwenge, mwakoba muti, ‘Aliku omuzimu omubi!’

³⁴ Ate Omwana w'Omuntu yaidha ng'alya era ng'anhwa, mwakoba muti, ‘Mubone omusaadha, omulyalya, mukagwa w'abaghooza n'aboonooni!’

³⁵ Aye abaana ab'amagezi n'abakakasa obutuufu bwago.”

Omukazi omwonooni asoniyibwa

³⁶ Agho ghaabaagho Omufarisaayo yaayeta Yesu okulya. Yesu yaaja yangira mu ndhu ey'Omufarisaayo yaatyama ku kiiwulo.

³⁷ Mu kibuga omwo, mwalimu omukazi omwonooni, era bwe yamanha nga Yesu ali ku kiiwulo mu ndhu ey'Omufarisaayo, yaidha n'akadoome ak'obuwoowo.

³⁸ Yaayemerera einhuma gh'ebigere bye yaalira. Era yaaboza ebigere bya Yesu n'amaziga ge, yaabisiimuuza enviiri dhe, yaabinhwegera, yaabisiiga obuwoowo.

³⁹ Aye Omufarisaayo ole eyayeta Yesu bwe yabona, yaakoba mule ati: “Nguli ono abaire mulanzi yaalibaire ng'aidhi omukazi amugemaku ki ky'ali, kuba mwonooni!”

⁴⁰ Agho Yesu yaamukoba ati: “Simoni, ndi ni kye nkukoba.” Simoni yaakoba ati: “Mwegeresa, yogera.”

⁴¹ Yesu yatoolera ati: “Ghaaligho eyali ni b'abandha babiri mulala ng'amubandha dinari ebikumi bitaanu, ate owundi makumi ataanu.

⁴² Bwe baabulwa ghe badhitoola okumusasula, yaabasonigha bombi. Kale naani ku bombi asinga okumusiima?”

⁴³ Simoni yairamu ati: “Ndhuuba ole ye yasonigha ekinene.” Yesu yaamukoba ati: “Osaze mu mazima.”

⁴⁴ Yaakyuka yaalingirira omukazi, yaakoba Simoni ati: “Obona omukazi ono? Nhingiire mu ndhu yo, tompaire maadhi ga kunaaba bigere. Aye ono aboziiza ebigere byange n'amaziga ge era yaabisiimuula n'enviiri dhe.

⁴⁵ Tonnhwegeire naku, aye ono okuviira irala bwe nhingiire talekeire kunhwegera bigere byange.

⁴⁶ Tonsiize muzigo ku mutwe, aye ono ebigere byange abisiize obuwoowo.

⁴⁷ Kale ka nkukobere, ebibi bye kamaala bisoniyiibwa kuba alaze okugonza kunene. Ole asoniyibwa ebitono aba n'okugonza kutono.”

⁴⁸ Agho yaakoba omukazi ati: “Ebibi byo bisoniyiibwa.”

⁴⁹ Be yali nabo ku kiiwulo baatoolera okwebuuza mule bati: “Naani ono asobola n'okusonigha ebibi?”

⁵⁰ Aye Yesu yaakoba omukazi ati: “Okwikiriza kwo kukuwoniiza, ja miraala.”