Luka 6 - Baibuli Ekibono kya Katonda 2014

Ebigema ku Sabbato

¹ Olwatuuka Yesu yaabita mu musiri ogw'engaano ku lwa Sabbato. Abeegeresebwa be baanoga ku ngaano baagikunhira mu ngalo dhaibwe baalya.

² Abandi ku Bafarisaayo baakoba bati: “Lwaki mukola ekitaikirizibwa ku Sabbato?”

³ Yesu yaabairamu ati: “Timusomangaku ku Daudi kye yakola, mwene endhala bwe yamuluma ni be yali nabo,

⁴ bwe yangira mu ndhu ya Katonda n'atoola emigaati egigheereibwayo eri Katonda n'alya, n'aghaaku ni be yali nabo egitaikirizibwa kuliibwa bandi, okutoolaku bakabona bonka?”

⁵ Yaabakoba ati: “Omwana w'Omuntu n'afuga Sabbato.”

Omuntu ow'omukono ogwaniala

⁶ Ku lwa Sabbato olundi, Yesu yangira mu sinagoga okwegeresa. Omwo mwalimu omuntu ng'omukono gwe omusaadha gwaniala.

⁷ Abanamateeka n'Abafarisaayo beekalirisa Yesu babone oba ng'awonia ku Sabbato, bafune ensonga ey'okumuvunaana.

⁸ Aye Yesu yaategeera ebidhuubo byaibwe, yaakoba omusaadha ow'omukono ogwaniala ati: “Situka oyemerere ghagati.” Yaasituka yaayemerera.

⁹ Yesu yaabakoba ati: “Leka mbabuuze: Kiikirizibwa ku Sabbato okukola obulungi oba okukola obubi? Okuwonia obulamu oba okubuzikiriza?”

¹⁰ Yaabeezunguluza amaiso boonaboona, yaakoba omusaadha ati: “Funhulula omukono gwo.” Yaagufunhulula era gwawona.

¹¹ Aye bale baidhula obusungu, era beekobaana ku kye babe bakole Yesu.

Yesu alonda Eikumi n'Ababiri

¹² Olwatuuka mu nnaku edho, Yesu yaaja ku lusozi okusaba, era yaakyesa obwire ng'asaba Katonda.

¹³ Bwe bwakya yaayeta Abeegeresebwa be, yaalondaku eikumi na babiri be yayeta Abatume:

¹⁴ Simoni era ye yatuuma erya Petero, ni muganda we Anderea, ni Yakobo, ni Yoanne, ni Filipo, ni Barutholomayo,

¹⁵ ni Matayo, ni Thomasi, ni Yakobo mutabane wa Alufaayo, ni Simoni ayetebwa Omuzeloti,

¹⁶ ni Yuda mutabane wa Yakobo ni Yuda Isikarioti, eyamulyamu olukwe.

Abantu kamaala baidha ye Yesu

¹⁷ Agho yaikirira nabo, yaayemerera ku museetwe ghalala n'eikuukuubira ery'Abeegeresebwa be, n'olukunkumuli olw'abantu abaava mu Buyudaaya bwonabwona, ni mu Yerusalemu, ni mu biketezo eby'oku nhandha ebiriinaine Tiro ni Sidoni,

¹⁸ abaidha okumuwulira n'okuwonezebwa ebirwaire byaibwe. N'abaali badaazibwadaazibwa emizimu emibi boona baawonezebwa.

¹⁹ Abantu boonaboona baagezaaku okumugemaku, kuba amaani gaamuvangamu gaaja gaabawonia boonaboona.

Enkabi n'enaku

²⁰ Yesu yaalingirira Abeegeresebwa be yaakoba ati: “Muli ba nkabi abaavu, kuba Obwakyabazinga bwa Katonda bwaimwe.

²¹ Muli ba nkabi abayala buti, kuba muliigusibwa. Muli ba nkabi abagegenga buti, kuba mulisangaala.

²² “Muli ba nkabi abantu bwe banaabakyaghanga, bwe banaabeeyawulangaku, bwe banaabavumanga, bwe baneenhinhalanga eriina lyaimwe bati ibi, nga babalanga Omwana ow'Omuntu.

²³ Musagambanga ku lunaku olwo era mwedhaganga, kuba empeera yaimwe mu igulu nnene kuba era ni badhaadha baibwe batyo bwe baabisa abalanzi.

²⁴ Aye mukagwireku imwe abakombe, kuba muli n'ebibasanhusa.

²⁵ Mukagwireku imwe buti abaigwite, kuba endhala eribaluma. Mukagwireku imwe abaseka mperaano, kuba muligegenga, mwalira.

²⁶ “Mukagwireku imwe, abantu boonaboona bwe banaaboogerangaku ebikalamu, kuba ni badhaadha baibwe batyo bwe baakola ku balanzi abasubayi.

Okugonza abazigu

²⁷ “Aye ka mbakobere imwe abampulirisa: Mugonzenga abazigu baimwe, ababakyagha mubakoleranga birungi,

²⁸ ababakolimira mubendezanga nkabi, era musabiranga ababavuma.

²⁹ Ole bw'akukubanga ku itama omugaluliranga n'erindi, ole bw'akutoolangaku ky'ovaala tomuloberanga kutwala ni kye weebwika.

³⁰ Buli akusaba omughanga, ate ole akutoolangaku ebibyo otabimusabanga.

³¹ Era nga bwe mwandyenze abantu babakolere, mwena bwe mube mubakolere.

³² “Oba nga mugonza ababagonza kiri gha agho ekibasiimisa? Kuba n'aboonooni bagonza ababagonza.

³³ Oba nga mukolera bukalamu abo ababakolera obukalamu, kiki agho ekibasiimisa? Kuba n'aboonooni bakola n'ekirala.

³⁴ Era oba nga muwola abo be musuubira okufunaku, kiki agho ekibasiimisa? N'aboonooni boona bawola boonooni, baghange okufuna ekyagayaga.

³⁵ “Aye imwe, mugonzenga abazigu baimwe, mubakolenga bukalamu, era muwolenga nga ghazira kye musuubirayo olwo empeera yaimwe eriba nnene. Muliba baana b'oyo Ali Ghaigulu Yeene kuba oyo alaga abatasiima n'aboonooni ekisa.

³⁶ Mubenga ba kisa nga Lata waimwe bw'ali ow'ekisa.

Okusalira abandi omusango

³⁷ “Mutasalanga musango era mwena tigulibasalirwa, mutasaliranga muntu musango kumusinga mwena tigulibasalirwa kubasinga. Musonighenga mwena mulisoniyibwa.

³⁸ Mugabenga, era mwena muligheebwa. Ekipimo ekituufu ekitengeeseibwa ni kisiinhirwa, ni kiidhula era n'okuyuyika ni kiyuyika, kye balibagemya; kuba ekipimo kye mupimiramu abandi mwena kye mulipimirwamu.”

³⁹ Era yaabakobera n'olufumo luno ati: “Omutulu asobola okwembereramu mutulu mwine? Bombi tibagwa mu kiina?

⁴⁰ Ayegeresebwa tasinga amwegeresa, aye kiisi ayegeresebwa bw'aba amaze okwegeresebwa mu bwidhuvu, aba ng'oyo amwegereisa.

⁴¹ “Lwaki obona akakaba akali mu liiso lya muganda wo aye n'oloba kufaayo ku kisiki ekiri mu liiso lyo lyene?

⁴² Oba, okoba otya muganda wo oti, ‘Muganda wange, ka nkutoole akakaba mu liiso,’ nga iwe mwene tobona kisiki kiri mu liryo? Muguya iwe, sooka otoole ekisiki mu liiso lyo memale oghange okubona obukalamu akakaba akali mu liiso lya muganda wo, n'okukatoolamu.

Omuti n'ebibala byagwo

⁴³ “Ezira muti mukalamu gutaaku bibala bibi, waire omuti omubi okutaaku ebibala ebikalamu.

⁴⁴ Kuba buli muti ogumanhira ku bibala bye gutaaku. Kyova tonooneza mitiini ku miwa, oba emizabbibu ku namukodolya.

⁴⁵ Omuntu omulungi atoola ku birungi ebiri mu mwoyo gwe yaakola ebirungi, ate omuntu omubi atoola ku bibi ebiri mu mwoyo gwe yaakola ebibi kuba ku biidhwire mu mwoyo omunwa gwe kwe gutoola bye gwogera.

Endhu eibiri edhaazimbibwa

⁴⁶ “Lwaki mundheta Musengwa, Musengwa, ng'ate timukola bye nkoba?

⁴⁷ Buli muntu aidha ye ndi n'awulira ebibono byange era n'abijiiraku, ka mbakobere bw'afaanana:

⁴⁸ Ali ng'oti n'omuntu eyazimba endhu, nga yasooka yaasima ghansi, yaakuba omusingi ku lubaale, omwidhuzo gwabaagho, omwiga gwayalaala gwabanda endhu eyo, aye tigwaghanga kugitengeesa, kuba yali ezimbiibwa bukalamu.

⁴⁹ Aye oyo awulira ebibono byange n'atabijiiraku afaanana ng'oti n'omuntu eyazimba endhu ku itaka nga tatairegho musingi, era omwiga bwe gwayalaala ni gugibanda, mangu ago ng'egwa era yaasaanagho.”