Luka 5 - Baibuli Ekibono kya Katonda 2014

Yesu ayeta Abeegeresebwa abaasooka

¹ Agho olwatuuka, bwe yali ng'ayemereire ku mbali kw'enhandha Gennesareti, abantu nga bali kumwenhigirizaaku abaali benda okuwulira ekibono kya Katonda,

² yaabona amaato abiri ku bukalu aye ng'abavubi bagaviiremu nga bali kwamula obutimba bwaibwe.

³ Yaaniina mu lyato irala, erya Simoni, yaamukoba aliseeseeyooku katono okuva ku bukalu, yaatyama yaayegeresa abantu ng'ali mu lyato.

⁴ Bwe yamala okwogera, yaakoba Simoni ati: “Twala eryato ere mu maadhi amangi, mutege obutimba bwaimwe mugemye ebyenhandha.”

⁵ Simoni yaamwiramu ati: “Musengwa twafaabiikaine obwire bwonabwona ghazira kye twagemiisa. Aye olw'ekibono kyo ndidha kutega obutimba.”

⁶ Bwe baakola ekyo baagemya ebyenhandha kamaala n'obutimba bwayenda kukanuka.

⁷ Baaghemya bavubi banaibwe ab'eryato erindi baidhe bababeereku. Baidha baidhuza amaato gombi gaayenda na kudimira.

⁸ Simoni Petero bwe yabona atyo yaagwa ku bikiryaivu bya Yesu yaamukoba ati: “Musengwa ndeka kuba nze ndi mwonooni!”

⁹ Kuba Petero ni boonaboona be yali nabo baali mu kwewuunhia kungi olw'ebyenhandha kamaala bityo bye baagemya.

¹⁰ Era mu nsambo n'endala Yakobo ni Yoanne abaana ba Zebedaayo baine ba Simoni boona baayasaamirira. Yesu yaakoba Simoni ati: “Otatya, okuva ni mperaano oidha kuba muvubi wa bantu.”

¹¹ Era olwatuusa amaato ku bukalu baaleka byonabyona baamunonereza.

Yesu awonia omuntu ow'endwaire ey'ebigenge

¹² Olwatuuka Yesu bwe yali ali mu kibuga kirala, ghaabaagho omusaadha nga alwaire endwaire ey'ebigenge. Bwe yabona Yesu, yeeyala ku itaka, yaamweghemba ng'akoba ati: “Musengwa, bw'oyenda, oghanga okumponia.”

¹³ Yesu yaagolola omukono yaamugemaku yaakoba ati: “Nhenda, wona!” Era mangu ago ng'endwaire ey'ebigenge emuleka.

¹⁴ Yaamusikirira obutakoberaku muntu yeenayeena, aye aje yeeyandhule ye kabona, agheeyo ekirabo olw'okuwona kwe, nga Musa bwe yalagira, ng'okwo kwe bali n'okukakalisa.

¹⁵ Aye ebimufaaku byayongera kusansaana, era abantu kamaala beesoloza okumuwulirisa n'okuwonezebwa ebibaluma.

¹⁶ Aye Yesu yaabavangaku yaaja eyo ezira bantu yaasaba.

Yesu awonia omusaadha eyagogoma

¹⁷ Lwali lulala, Yesu yali ayegeresa, era ng'ali n'amaani ga Musengwa ag'okuwonia. Abafarisaayo n'Abanamateeka abaali baviire mu buli kyalo: abaava e Galilaaya, mu Buyudaaya, ni mu Yerusalemu nga batyaime agho.

¹⁸ Ghaidhagho abasaadha nga basitwire omuntu ku ndiri, nga yagogoma. Baayenda bamusitule bamungize bamumute mu maiso.

¹⁹ Aye bwe baalemwa okufuna engeri ey'okumusitula okumwingiza olw'eikuukuubira ery'abantu, baaniina ghaigulu ku ndhu, baatoolaghooku obutegula, baamwisiza agho n'endiri ye, baamuta ghagati mu maiso ga Yesu.

²⁰ Yesu bwe yabona okwikiriza kwaibwe yaakoba ati: “Musaadha iwe, osoniyiibwa ebibi byo.”

²¹ Abanamateeka n'Abafarisaayo baatoolera okwebuuza nga bakoba bati: “Ono naani ayogera ebivuma Katonda? Naani aghanga okusonigha ebibi okutoolaku Katonda yenka?”

²² Aye Yesu yaamanha ebidhuubo byaibwe, yaakoba ati: “Lwaki mudhuuba mutyo mu myoyo gyaimwe.

²³ Kiki ekisinga obwangu, okukoba nti, ‘Ebibi byo bikusoniyiibwa,’ oba nti, ‘Situka otambule’?

²⁴ Aye ka mumanhe muti Omwana w'Omuntu ali n'obukumu ku nsi okusonigha ebibi.” Agho yaakoba omugogomu ati: “Nkoba iwe, situka ogeme endiri yo oje ewaimwe.”

²⁵ Era ng'asitukiramu omulundi mulala nga balingiriire, ng'agema ndiri kwe yali alambaire, ng'agolola ewuwe nga bw'asaaka Katonda.

²⁶ Boonaboona baayasaamirira, baasaaka Katonda, era nga baidhwire okutya baakoba bati: “Olwaleero tuboine ebinene!”

Yesu ayeta Levi

²⁷ Ebyo olwawa, yaavaagho yaaja, yaabona omughooza ow'omusolo ng'eriina lye ni Levi, ng'atyaime agho ghe bawooleza, yaamukoba ati: “Nnonereza.”

²⁸ Yaaleka byonabyona yaasituka yaamunonereza.

²⁹ Levi oyo yaamukolera embaga ey'amaani mu ndhu ye. Era abaghooza kamaala n'abantu abandi abaaligho yaalya nabo.

³⁰ Aye Abafarisaayo n'Abanamateeka baibwe beemuluguunhia, baakoba Abeegeresebwa be bati: “Lwaki mulya era ni munhwa n'abaghooza n'aboonooni?”

³¹ Yesu yaabakoba ati: “Abalamu ti n'abenda omuyigha, aye abalwaire.

³² Abatuufu ti be naidha okweta, aye aboonooni.”

Ebigema ku kusiiba

³³ Kabiri baamukoba bati: “Abeegeresebwa ba Yoanne basiiba emikuzi kamaala eno bwe basaba, n'abeegeresebwa ab'Abafarisaayo boona bakola batyo, aye ababo balya era baanhwa.”

³⁴ Yesu yaabakoba ati: “Abageni b'oyo abayiiza musobola mutya okubasiibya ng'abayiiza akaali nabo?

³⁵ Aye ekiseera kiidha, era abayiiza bw'alibatoolebwaku olwo ni mu kiseera ekyo balisiiba.”

³⁶ Ate yaabakobera n'olufumo luno: “Ezira akanula kighero ku lugoye luyaaka n'akitunga ku lugoye lukaire. Bw'akikola, oluyaaka alukanula ate n'ekighero eky'oluyaaka kyaloba kutuukana na lukaire.

³⁷ Era ezira afuka mwenge gwa mizabbibu mu nsawo dha luwu nkaire bw'akikola omwenge ogwo omusu gutulisa ensawo gwafukika, n'ensawo dhaadhagalika.

³⁸ Aye omwenge gw'emizabbibu omusu guteekwa kuteebwa mu nsawo dha luwu mpyaka.

³⁹ Era ghazira anhwa mwenge gwa mizabbibu muwolu ni yeegomba musu kuba akoba ati omuwolu n'ogusinga.”