Luka 4 - Baibuli Ekibono kya Katonda 2014

Yesu akemebwa

¹ Yesu yaira okuva ku Yorudani, ng'aidhwire Mwoyo Mutukuvu, era Mwoyo yaamutwala mu irungu,

² yaamala enaku amakumi ana (40) Sitaani ng'amukema. Mu nnaku edho tiyalya ku kantu koonakoona, era bwe dhaawaaku endhala yaamuluma.

³ Sitaani yaamukoba ati: “Oba nga oli Mwana wa Katonda, koba eibaale lino lifuuke omugaati.”

⁴ Yesu yaamwiramu ati: “Kyaghandiikibwa kiti, ‘Omuntu taba mulamu lwa mugaati gwonka.’ ”

⁵ Agho Sitaani yaamutwala ku lusozi era mu kaseera akazira ghe kaaga yaamulaga obwakyabazinga bwonabwona.

⁶ Yaamukoba ati: “Ndidha kukugha obukumu ku bwakyabazinga obwo bwonabwona n'ebitiibwa byabwo, kuba byampeebwa era ye mba nhenze ye mbigha.

⁷ Kale bw'okuba amakiryaivu n'onsinza, byonabyona biidha kuba bibyo.”

⁸ Yesu yairamu ati: “Kyaghandiikibwa kiti, ‘Osinzanga Musengwa Katonda wo, era ni yenka y'ogheerezanga.’ ”

⁹ Baava agho Sitaani yaamutwala e Yerusalemu yaamuta ku kasolya ak'eisinzizo, yaamukoba ati: “Oba oli Mwana wa Katonda va ghano weesuule ghansi

¹⁰ kuba kyaghandiikibwa kiti, ‘Aliragira bamalaika be baakulabirira, baakukuuma’

¹¹ era kiti, ‘Balikulera mu ngalo dhaibwe olobe kwekonta kigere ku ibaale.’ ”

¹² Yesu yaamukoba ati: “Kyaghandiikibwa kiti, ‘Tokemanga Musengwa Katonda wo.’ ”

¹³ Sitaani ng'amaze okumukema mu ngeri yoonayoona, yaamuviira okutuusa ng'ebiseera bituuse.

Yesu atoolera omulimo gwe mu Galilaaya

¹⁴ Agho Yesu mu maani ga Mwoyo Mutukuvu yairayo e Galilaaya, era kyawulikika mu biketezo byonabyona ebyetooloire agho.

¹⁵ Yaayegeresa mu sinagoga dhaibwe nga boonaboona bamutaamu ekitiisa.

Yesu bamuboola e Nazarethi

¹⁶ Yaatuuka e Nazarethi ye yakulira, ku Sabbato yangira mu sinagoga nga bwe yali amanhiriire, yaasituka okusoma.

¹⁷ Baamugha ekitabo. Bwe yakiwumbulula yaatuuka aghaaghandiikibwa bino:

¹⁸ “Omwoyo gwa Musengwa gundiku, kuba yansiiga omuzigo okukobera abaavu Amawulire Amalungi. Yantuma okukobera abasibe nti baidha kulekulwa, n'abatulu nti baidha kubona. Era yantuma okuwonia abo abatuntuzibwa,

¹⁹ n'okulangirira omwaka gwa Musengwa ogw'okulokolwa.”

²⁰ Yaawumbaku ekitabo yaakiiriza omugheereza, yaatyama. Boonaboona abaali mu sinagoga baamutaaku amaiso.

²¹ Agho yaatoolera okubakoba ati: “Ebyaghandiikibwa bino bye muwuliire n'amatu gaimwe, olwaleero bituukiriire.”

²² Boonaboona baasiima era beewuunhia inho ebibono ebiwoomu ebyali bimuvaamu, era baakoba bati: “Ono ti n'omwana wa Yosefu?”

²³ Yesu yaabakoba ati: “Nkakasa nga mwidha kunkoba ng'olugero luno bwe lukoba luti, ‘Omuyigha, weeyighe mwene,’ era muti, ‘Ebyo bye twawuliranga bye wakolera e Kaperinaumu, bikolereku ni ghano ku kyalo eky'ewaimwe woona.’ ”

²⁴ Yaakoba ati: “Bwenebwene ka mbakobere ezira mulanzi aikirizibwa ku kyalo kya waibwe.

²⁵ “Aye mbakobera mu butuufu bwene: Mu byanda bya Eliya, banamwandu baali kamaala mu Isiraeli eigulu bwe lyesiba emyaka esatu n'emyezi omukaaga, endhala ey'amaani n'egwa mu nsi woonawoona.

²⁶ Aye Eliya tiyatumwa eri waire omulala ati ku abo, okutoolaku ew'omukazi namwandu ow'omu Zarefathi eky'omu Sidoni.

²⁷ Ate era ab'endwaire ey'ebigenge baali kamaala mu Isiraeli mu byanda bya Elisha omulanzi. Aye era ku abo ghazira naire mulala eyawonezebwa okutoolaku Naamani Omusiria.”

²⁸ Boonaboona abaali mu sinagoga bwe baawulira ebyo baidhula obusungu.

²⁹ Baasituka baamubingira ku luya okw'ekibuga, baamutwala ku mpumi ey'olusozi ekibuga kyaibwe kwe kyazimbibwa, nga benda bamusuule ghansi.

³⁰ Aye yaababitamu ghagati yaaja.

Omuntu eyaliku omuzimu omubi

³¹ Agho yaaserengeta e Kaperinaumu, ekibuga eky'omu Galilaaya era yaabeegeresa ku lwa Sabbato.

³² Beewuunhia endhegeresa ye, kuba ebibono bye nga bya buyinza.

³³ Mu sinagoga mwalimu omuntu eyaliku omuzimu omubi, yaayasiikanira ghaigulu ati:

³⁴ “Tuleke, otwendeza ki, Yesu Omunazarethi? Oidhie kutuzikiriza? Nze nkwidhi, niiwe omutukuvu wa Katonda.”

³⁵ Aye Yesu yaagukaabukira ati: “Sirika era muveeku.” Omuzimu gwamusuula ghansi mu bantu, gwamuvaaku nga tigumukosiisa.

³⁶ Boonaboona baayasaamirira, era buli muntu yaakoba mwine ati: “Kiki kino? Emizimu emibi agiragira n'obukumu n'amaani gyavaagho!”

³⁷ Agho ebibono ebimufaaku byatuuka mu buli kifo ekyetooloire agho.

Yesu awonia abantu kamaala

³⁸ Agho Yesu yaasituka yaava mu sinagoga, yangira mu ndhu ya Simoni. Yaayagaana mukoirume wa Simoni ng'ali n'omusuudha omungi, era baamusaba amuwonie.

³⁹ Yaayemerera ghe yali yaalagira omusuudha gwa muleka, era mangu ago yaasitukiramu yaabagheereza.

⁴⁰ Agho endhuba bwe yali ng'egwa, boonaboona abaali n'abagodhe ab'ebirwaire ebya buli nsambo, baabaleeta gh'ali, era yaabagemaku mulala mulala yaabawonia.

⁴¹ Era n'emizimu emibi gyona gyava ku bantu kamaala nga gyasiikana giti: “Iwe oli Mwana wa Katonda!” Yaagikaabukira nga tagiganha kwogera, kuba gyali gimwidhi nga ni Kurisito.

Okwegeresa mu Buyudaaya

⁴² Bwe bwakya enkyo yaavaagho yaaja mu kifo omuzira bantu. Aye abantu baamwagala era baamutuukaku, baamusigaza nga tibenda abaveeku.

⁴³ Aye yaabakoba ati: “Nteekwa okwegeresa ab'omu bibuga ebindi boona eby'Obwakyabazinga bwa Katonda, kuba natumibwa lwa kino.”

⁴⁴ Era yaayegeresa mu sinagoga edh'omu Buyudaaya mwonamwona.