Luka 3 - Baibuli Ekibono kya Katonda 2014

Okwegeresa kwa Yoanne Omubatiza

¹ Agho mu mwaka ogweikumi n'etaanu ogw'obufuzi bwa Tiberio Kaisari, Pontio Pilato yali nga n'afuga Buyudaaya, ate Herode nga n'ow'eisaza ly'e Galilaaya, muganda we Filipo nga n'ow'eisaza ly'e Iturea n'ekiketezo eky'e Turakoniti, ate Lisania nga n'ow'eisaza ly'e Abilene,

² era Bakabona Abakulu baali nga ni Anna ni Kayafa. Mu kiseera ekyo ekibono kya Katonda kyatuuka ku Yoanne mutabane wa Zekaria eyo mu irungu.

³ Yoanne yaaja woonawoona mu biketezo ebyetooloire Yorudani, yaalangirira okubatizibwa okw'okwenenia okusoniyibwa ebibi.

⁴ Nga bwe kyaghandiikibwa mu kitabo kya Isaia omulanzi kiti: “Ghaligho eiroboozi ery'oyo aleekaanira mu irungu ati, ‘Mutegeke Musengwa gh'anaabita, era mutereeze obugira bwe.

⁵ Buli kiiko kiriidhuzibwamu eitaka, buli lusozi na buli kasozi byasendebwa. Engira engodegode dhiritereezebwa, n'edh'ebikonko dhaanhirizibwa.

⁶ Olwo abantu boonaboona baabona nga Katonda bw'alokola.’ ”

⁷ Abantu kamaala beesomba okwidha ye Yoanne okubatizibwa. Kyeyava n'abakoba ati: “Imwe eizaire ery'emisota, naani eyabalabula okulumuka ekibonerezo ekiri kwidha?

⁸ Agho ni, mwanie ebibala ebigwaniire okwenenia, era mutatoolera na kukoba mule muti, ‘Tuli ni iseife Aburahamu.’ Kuba ka mbakobere mu mabaale gano, Katonda aghanga okufuniramu Aburahamu abaana!

⁹ Kwo n'okuba empasa eteereibwa ku kikolo eky'emiti kale buli muti ogutaania bibala bikalamu gwa kutemebwa era gusuulibwe mu muliro.”

¹⁰ Abantu baamubuuza bati: “Mperaano tukole ki?”

¹¹ Yaabairamu ati: “Ali n'ebivaalo ebibiri agheeku azira, n'oyo ali n'emere yeena akole n'ekirala.”

¹² Abaghooza ab'omusolo boona baidha okubatizibwa, era baamubuuza bati: “Mwegeresa, ife tukole ki?”

¹³ Yaabakoba ati: “Mutaswisangagho ku ekyo ekibalagirwa.”

¹⁴ Abaisirukale boona baamubuuza bati: “Ate ife twena tukole ki?” Yaabairamu ati: “Mutanhaganga muntu yeenayeena waire okumughaamirizanga, mube bamativu n'ekyo ekibasasulwa.”

¹⁵ Abantu beesumba inho, era boonaboona baadhuuba mu myoyo gyaibwe bati oba Yoanne yandiba Kurisito.

¹⁶ Yoanne yaabakoba ati: “Bwenebwene nze mbabatiza na maadhi, aye ansinga obukumu aidha, ye ntagwaniire waire okusibulula obusibiro obw'engaito dhe. Oyo alibabatiza na Mwoyo Mutukuvu era na muliro.

¹⁷ Wuuyo agemye olugali mu ngalo aja kulongoosa bukalamu ekifo kye aghakubirwa engaano, engaano agisololeze mu kyagi, omusinsi agwokye n'omuliro ogutazikira.”

¹⁸ Kale atyo ni yaakubiriza abantu n'ebintu ebindi kamaala ng'abakobera Amawulire Amalungi.

¹⁹ Aye Herode ow'eisaza, Yoanne ye yanenia olwa Herodia muka muganda we n'olw'ebibi byonabyona bye yali akoze,

²⁰ yaayongeraku ni kino kyona: yaigalira Yoanne mu ikomera.

Yesu abatizibwa

²¹ Agho olwatuuka, abantu boonaboona nga bamaze okubatizibwa, ni Yesu ng'amaze okubatizibwa ng'ali kusaba, eigulu lyabwikuka.

²² Mwoyo Mutukuvu yaika ng'afaanana oti njiibwa yaamwikaku, ate eiroboozi lyaidha okuva mu igulu lyakoba liti: “Niiwe mutabane wange omugonzi, nkwesiimiramu inho.”

Oluzi lwa Yesu

²³ Yesu ghe yatandiikira okwegeresa nga wa myaka nga makumi asatu, era nga kimanhiibwa kiti: Mwana wa Yosefu omwana wa Heli,

²⁴ omwana wa Matthati, omwana wa Levi, omwana wa Meliki, omwana wa Yannai, omwana wa Yosefu,

²⁵ omwana wa Mattathia, omwana wa Amosi, omwana wa Nahumu, omwana wa Esili, omwana wa Naggai,

²⁶ omwana wa Maathi, omwana wa Mattathia, omwana wa Semei, omwana wa Yoseki, omwana wa Yoda,

²⁷ omwana wa Yoanani, omwana wa Reesa, omwana wa Zerubbabeli, omwana wa Shealutieli, omwana wa Neri,

²⁸ omwana wa Meliki, omwana wa Addi, omwana wa Kosamu, omwana wa Elimadamu, omwana wa Eri,

²⁹ omwana wa Yoshua, omwana wa Eliezeri, omwana wa Yorimu, omwana wa Matthati, omwana wa Levi,

³⁰ omwana wa Simeoni, omwana wa Yuda, omwana wa Yosefu, omwana wa Yonamu omwana wa Eliakimu,

³¹ omwana wa Melea, omwana wa Menna, omwana wa Mattatha, omwana wa Nathani, omwana wa Daudi,

³² omwana wa Yesse, omwana wa Obedi, omwana wa Boazi, omwana wa Sala, omwana wa Nahashoni

³³ omwana wa Amminadabu, omwana wa Adimini, omwana wa Arini, omwana wa Hezironi, omwana wa Perezi, omwana wa Yuda

³⁴ omwana wa Yakobo, omwana wa Isaaka, omwana wa Aburahamu, omwana wa Tera, omwana wa Nahori,

³⁵ omwana wa Serugi, omwana wa Reu, omwana wa Pelegi, omwana wa Eberi, omwana wa Shela

³⁶ omwana wa Kainani, omwana wa Arifakisadi, omwana wa Shemu, omwana wa Noa, omwana wa Lameka,

³⁷ omwana wa Methusela, omwana wa Enoka, omwana wa Yaredi, omwana wa Mahalaleeli, omwana wa Kainani,

³⁸ omwana wa Enoshi, omwana wa Sethi, omwana wa Adamu, omwana wa Katonda.