Luka 24 - Baibuli Ekibono kya Katonda 2014

Okuzuukira kwa Yesu

¹ Ku lusooka mu Sabbato, baawuuna be pwi pwi pwi, baaja ku magombe n'obuwoowo bwe baategeka ku lule.

² Baayagaana ng'eibaale ligalangwirwa okuva ku magombe,

³ aye bwe bangira baaloba kwagaanamu mulambo gwa Musengwa Yesu.

⁴ Baali bakaali agho, nga basobeirwa, baabona abasaadha babiri abavaire ebimesunkana nga beemereire agho.

⁵ Baatya inho baakoteka emitwe, abasaadha baabakoba bati: “Lwaki muli kwagalira omulamu mu bafu?

⁶ Tali ghano, azuukiire. Mwidhukire bwe yabakoba ng'akaali e Galilaaya,

⁷ bwe yakoba ati, ‘Omwana w'Omuntu ali n'okugheebwayo mu mikono gy'ababi, akomererwe era olunaku olwokusatu azuukire.’ ”

⁸ Era baidhukira ebibono bye ebyo.

⁹ Baava ku magombe baira, baakoberaku eikumi n'omulala n'abandi boonaboona ebintu ebyo byonabyona.

¹⁰ Abakazi abaakobera Abatume ebintu bino baali Maria Magadalene, Yoanna, ni Maria inhinha owa Yakobo n'abandi be baali nabo.

¹¹ Aye ebibono ebyo byabawulikanira ng'oti bya kudhondha era baaloba kubiikiriza.

¹² Petero yaasituka, yaalumuka okuja ku magombe era bwe yatuuka yaakutama, yaalengeza mu magombe, yaabona bwa ngoye dhe baamuziikamu dhonka, yairayo eka nga yeewuunhia mu mwoyo gwe ebyo ebyaligho.

Yesu abonekera abaali baja Emmao

¹³ Ku lunaku lwene olwo ghaabaagho ku Beegeresebwa babiri abaali batambula nga baja mu kyalo ekyetebwa Emmao. Okuva e Yerusalemu okutuuka Emmao ghaligho kilomita ikumi na ndala.

¹⁴ Baajanga nga baghaya ku bintu bino ebyali byakamala okubaagho.

¹⁵ Baali bakaaghaya bwe beebuuzagania, Yesu mwene yaabatuukaku yaatoolera okutambula nabo

¹⁶ aye amaiso gaibwe gaaliku ekintu baaloba kumutegeera.

¹⁷ Yaababuuza ati: “Bibono ki ebyo bye muli kwogeraku nga mutambula?” Baayemerera nga badhuunie.

¹⁸ Owundi ye baayetanga Kileopa yaamubuuza ati: “Niiwe wenka omugeni mu Yerusalemu ataidhi bintu bikibairemu mu nnaku dhino?”

¹⁹ Yaakoba ati: “Bintu ki?” Baakoba bati: “Ebigema ku Yesu ow'e Nazarethi eyali omulanzi ow'amaani mu bikolwa ni mu bibono mu maiso ga Katonda n'abantu boonaboona

²⁰ era nga Bakabona Abakulu n'abafuzi bwe baamughaayo okusalirwa ogw'okufa era n'akomererwa?

²¹ Ate ife ni twali tumwesunga tuti n'ow'okununula Isiraeli, aye wuuno luno lwakusatu kasookanga bino bibaagho.

²² Ebyo nga bikaali agho ghaligho abakazi mu kikunsu kyaife abatuwugulaiza bwe bajiire ku magombe ku nkyo.

²³ Tibaagaineeyo mulambo gwe, baira era baatukobera bati bamalaika bababonekeire baabakoba bati mulamu.

²⁴ Era abandi ku ife boona bajiire ku magombe era baayagaana nga biri bwenebwene ng'abakazi bwe bakobye, aye Yesu tibamuboine.”

²⁵ Agho yaabakoba ati: “Ye bano abasirusiru, ab'emyoyo egirwa okwikiriza abalanzi bye boogera!

²⁶ Tikyali nti bino byali biri n'okutuuka ku Kurisito memale atuuke mu kitiisa kye?”

²⁷ Agho yaatoolera okubainhonhola Ebyaghandiikibwa, ebyo byonabyona ebimugemaku, eby'abalanzi boonaboona okuviira irala ku Musa.

²⁸ Bwe baatuuka okumpi n'ekyalo mwe baali baja yaaboneka oti yeeyongerayo

²⁹ aye baamughaliriza asigale agho nabo nga bamukoba bati: “Eigulo lituuse, obwire buzibye.” Kale yaaja nabo nga wa kusula.

³⁰ Olwatyama ku kiiwulo yaatoola omugaati, yaagugha enkabi yeeyanza, yaagumegulamegulamu, yaabagha.

³¹ Olwo baazibuka amaiso baamutegeera, aye yaababuliraku agho.

³² Agho baakoba bati: “Titusuuyirirenga mule bw'abaire ng'ayogera n'ife mu ngira! Ng'atwinhonhola amakulu ag'Ebyaghandiikibwa?”

³³ Saawa eyo yeene baasituka bairayo e Yerusalemu baayagaana eikumi n'omulala, n'abandi bwe baabitanga, nga beesoloiza ghalala,

³⁴ baabakobera bati: “Bwenebwene Musengwa azuukiire, era abonekeire Simoni.”

³⁵ Boona baabaghayiraku nga bwe byali mu ngira ni bwe baamutegeerera ku kumegulamegula mu mugaati.

Yesu abonekera Abeegeresebwa be

³⁶ Baali bakaabaghayiraku, Yesu mwene yaabeemereramu ghagati yaabakoba ati: “Emiraala gibe n'imwe.”

³⁷ Baatya baadhugumira nga badhuubiriza bati bali kubona muzimu.

³⁸ Yaabakoba ati: “Kiki ekibatabwire, lwaki muba n'ebidhuubo bityo mu myoyo gyaimwe?

³⁹ Mulinge ku ngalo dhange, n'ebigere byange, ninze mwenemwene mungemeku mubone kuba omuzimu tiguba na mubiri waire magumba nga bwe mubona bwendi nabyo.”

⁴⁰ Bwe yamala okukoba atyo, yaabalaga engalo dhe n'ebigere bye.

⁴¹ Aye bwe baali nga bakaali kwikiriza olw'eisanhu n'okwewuunhia, yaabakoba ati: “Muligho ghano n'ekintu kyonakyona ekiriibwa?”

⁴² Baamugha ekimega eky'ekyenhandha ekitalike,

⁴³ yaakitoola yaakirya nga babona.

⁴⁴ Olumaliira yaabakoba ati: “Bino n'ebibono byange bye nabakoberanga nga nkaali n'imwe, nti buli kintu kyonakyona ekyampandiikibwaku mu Mateeka ga Musa n'abalanzi, ni mu Zabbuli kiri n'okutuukirizibwa.”

⁴⁵ Agho yaigula emyoyo gyaibwe okutegeera Ebyaghandiikibwa,

⁴⁶ yaabakoba ati: “Kiti bwe kyaghandiikibwa nti Kurisito ali n'okudaagadaaga era ku lunaku olwokusatu azuukire okuva mu bafu,

⁴⁷ era nti okwenenia n'okusoniyibwa ebibi, biri n'okukoberwa amaghanga goonagoona mu liina lye, okuviira irala ni mu Yerusalemu.

⁴⁸ Niimwe abadhulizi ab'ebintu ebyo.

⁴⁹ Era nze mwene ndidha kubagheereza oyo Lata wange ye yabasuubiza aye musigale mu kibuga okutuusa nga muvaaziibwa amaani okuva mu igulu.”

Yesu aniina mu igulu

⁵⁰ Yesu yaabakulemberamu baafuluma, baatambula okuja e Bethania. Agho yaagolola amakono ge yaabagha omukisa.

⁵¹ Era bwe yali abagha omukisa yaabavaaku yaatwalibwa mu igulu.

⁵² Baamusinza, baira mu Yerusalemu n'eisanhu lingi inho,

⁵³ era baabanga mu isinzizo ebiseera byonabyona nga basaaka Katonda.