Luka 23 - Baibuli Ekibono kya Katonda 2014

Yesu mu maiso ga Pilato

¹ Agho ni embuga yoonayoona yaasalagho era yaagheereza Yesu ewa Pilato.

² Baatoolera okumughaghabira bati: “Ono twamwagaana ng'akiidhamya abantu b'eighanga lyaife ng'abakoba obutaghanga Kaisari musolo, era nga yeeyeta Kurisito, ekitegeeza kiti Kyabazinga.”

³ Pilato yaamubuuza ati: “Niiwe kyabazinga wa Bayudaaya?” Yaamwiramu ati: “Oyogeire.”

⁴ Pilato yaakoba Bakabona Abakulu n'eikuukuubira ery'abantu ati: “Nze tibona musango ku muntu ono.”

⁵ Aye beekalangula bati: “Endhegeresa ye yasiikuula ebidhuubo eby'abantu mu Buyudaaya mwonamwona, okuviira irala mu Galilaaya okutuusa bw'atuuse ni ghano.”

Yesu atwalibwa ewa Herode

⁶ Pilato bwe yawulira ebyo, yaabuuza oba ng'omuntu oyo Mugalilaaya.

⁷ Bwe yakitegeera ng'ava mu kiketezo ekifugibwa Herode yaamugheereza ye Herode, kuba yeena yali ali mu Yerusalemu mu biseera ebyo.

⁸ Herode bwe yabona Yesu yaasangaala inho kuba yali yamuwuliraku, era nga yayenda ira okumubonaku era ni ghano yali asuubira nga anaamubona ng'akola ekyewuunhio.

⁹ Kale yaamubuuza ebibuuzo kamaala inho aye yaaloba kwiramu.

¹⁰ Bakabona Abakulu n'Abanamateeka baayemerera beekalangula n'amaani okughaghabira Yesu.

¹¹ Era Herode n'abaisirukale be, baamukola ebikolwa eby'obudhoozi baamusekerera, agho baamuvaaza ekivaalo eky'ekitiisa memale yaamwiriza Pilato.

¹² Era ku lunaku olwo Herode ni Pilato buli muntu yafuuka mukagwa wa mwine, kuba einhuma ere buli muntu yali muzigu wa mwine.

Yesu asalirwa ogw'okufa

¹³ Agho Pilato yaayeta ghalala Bakabona Abakulu, abafuzi, n'abantu.

¹⁴ Yaabakoba ati: “Mundeeteire omuntu ono nga mukoba muti akiidhamya abantu era bwe mmuwozeisa mu maiso gaimwe, mwena muboine nga ghazira musango gumusinze mu egyo gye mumughaghabiire.

¹⁵ Ni bw'aba Herode yeena ghazira musango gwamwagaineku, kuba era wuuyo amutwiriiza. Bwenebwene ghazira kye yakola kimugwaniza kufa.

¹⁶ Kale ndidha kumukangaivula memale mmulekule.” [

¹⁷ Ku buli lunaku lukulu yali n'okubalekulirayo omusibe mulala.]

¹⁸ Boonaboona baaleekaanira ghalala bati: “Oyo mutoolegho, tusibulire Barabba.”

¹⁹ Barabba n'omusaadha ye baasiba olw'akadhagalalo akaaligho mu kibuga n'olw'okwita omuntu.

²⁰ Pilato yairamu okwogera nabo ng'ali kwenda okulekula Yesu,

²¹ aye baaleekaana bati: “Mukomerere! Mukomerere!”

²² Omukuzi ogwokusatu yaabakoba ati: “Kibi ki kye yakola? Nze tiboine musango gumugwaniza kufa ndidha kumukangaivula memale mmulekule.”

²³ Aye beekalangula n'amamiro amakaalaamu abakolere kye baali bali kumukoba, bati Yesu akomererwe. Era baaghangula.

²⁴ Kale Pilato yaasalagho ati kye basabye kibakolerwe.

²⁵ Yaasibula eyasibwa olw'akadhagalalo n'olw'okwita omuntu, ye baasaba, aye yaaghaayo Yesu okumukola nga bwe benda.

Yesu akomererwa

²⁶ Abaisirukale bwe baali batwala Yesu baagema omusaadha ayetebwa Simoni Omukurenayo eyali ava mu kyalo ng'aja mu kibuga, baamusituza omusalaba yaatambula nagwo ng'anonereza Yesu.

²⁷ Eikuukuubira ery'abantu lyaja nga limunonereza omwali n'abakazi abaajanga nga balira bwe bagegenga.

²⁸ Yesu yaakyuka yaabakoba ati: “Bakazi imwe ab'e Yerusalemu mutalira nze, aye mwerire beene n'abaana baimwe

²⁹ kuba mumanhe kino. Enaku dhiri kwidha abantu mwe balikobera bati: beesiimye abagumba, n'enda edhitazaalangaku, n'amabeere agataayonsaaku!

³⁰ Agho balitoolera okukoba ensozi bati, ‘Mutugweku’ n'okukoba obusozi bati, ‘mutusandikire!’

³¹ Kuba, oba nga bakola bino ku muti omubisi, kiriba kitya ku mukalu?”

³² Ghaaligho abantu babiri abaiza emisango be baatwalira aghalala naye okwitibwa.

³³ Bwe baatuuka mu kifo ekyetebwa eky'Ekighanga baamukomerera agho n'abaizi ab'emisango bale, owundi ku luuyi lw'omukono gwe omusaadha ate owundi ku luuyi olw'omugooda.

³⁴ Yesu yaakoba ati: “Lata basonighe kuba tibaidhi kye bali kukola.” Baagabana ebivaalo bye nga bakuba akalulu.

³⁵ Abantu baayemerera agho beerolera, ate abafuzi baamusekerera bati: “Yalokolanga abandi, yeerokole mwene, oba nga ni Kurisito wa Katonda omulonde!”

³⁶ Abaisirukale boona baatuuka baamudherega baamugha omwenge ogw'emizabbibu endoota.

³⁷ Baakoba bati: “Oba nga niiwe kyabazinga ow'Abayudaaya weerokole!”

³⁸ Ghaigulu we baataagho ekighandiiko ekikoba kiti: “ONO NI KYABAZINGA OW'ABAYUDAAYA.”

³⁹ Owundi ku baizi ab'emisango ye baali bakomereire agho yaamuvuma ati: “Ti niiwe Kurisito? Weerokole twena otulokole!”

⁴⁰ Aye mwine yaamukaabukira ati: “Obwo iwe totya Katonda? Olw'okuba tuli ku kibonerezo n'ekirala!

⁴¹ Ife tuli kusasulwa olw'ebyo bye twakola, aye mwene azira kibi kye yaali akoze.”

⁴² Yaakoba Yesu ati: “Ondidhukiranga ng'otuuse mu Bwakyabazinga bwo.”

⁴³ Yesu yaamukoba ati: “Bwenebwene ka nkukobere: Olwa leero oidha kuba ninze mu kifo eky'okwesiima.”

Okufa kwa Yesu

⁴⁴ Olwo agho dhaali esaawa nga mukaaga, ensi yairugala be zigizigi okutuusa esaawa mwenda,

⁴⁵ endhuba ng'erekeire okwaka. Olusuubo olw'omu isinzizo lwakanukamu ghabiri.

⁴⁶ Yesu yaaleekaana ati: “Lata, nta omwoyo gwange mu ngalo dho!” Bwe yamala okwogera atyo yaisa omuuka ogusembayo.

⁴⁷ Omukulu ow'ekikunsu eky'abaisirukale bwe yabona ebibairegho, yaasaaka Katonda era yaakoba ati: “Bwenebwene omuntu ono tabaire na musango!”

⁴⁸ Era n'ebiyindi eby'abantu abaidha okwerolera bwe baabona ebibairegho bairayo eka nga beewumbye.

⁴⁹ Boonaboona be yali aidhigaine nabo nga n'omuli n'abakazi abaatambula naye okuva e Galilaaya, baayemerera ghalaku baalingirira ebintu bino.

Okuziikibwa kwa Yesu

⁵⁰ Mperaano ghaaligho omusaadha ng'ayetebwa Yosefu ow'omu kibuga Arimathea eky'e Buyudaaya. Ono yali atyama ku lwekobaano olw'embuga nga musaadha mulungi era ng'akola bituufu.

⁵¹ Ono yali ng'anuyirira Obwakyabazinga bwa Katonda era tiyaisania ni baine mu ntegeka yaibwe yoonayoona.

⁵² Yosefu ono yaja ye Pilato yaasaba omulambo gwa Yesu.

⁵³ Yaagughanulayo, yaaguzinga mu lugoye olweru yaaguta mu magombe agaabaadhibwa mu lubaale era agaali tigateebwangamuuku mufu yeenayeena.

⁵⁴ Luno lwali lunaku lwa kwetegeka nga Sabbato eri kwinhama.

⁵⁵ Abakazi abaidha ni Yesu okuva e Galilaaya, baanonereza, baabona amagombe n'ensambo omulambo gwe ye gwateebwamu

⁵⁶ baira baategeka obuwoowo n'omuzigo. Ku lwa Sabbato baawuumula, ng'ebiragiro bwe bikoba.