Luka 22 - Baibuli Ekibono kya Katonda 2014

Olukwe olw'okwita Yesu

¹ Ekibinuko eky'Emigaati Egitazimbulukusiibwa era ekyetebwa Ekibinuko eky'Okubitizibwa, kyali kiri kumpi okutuuka.

² Bakabona Abakulu n'Abanamateeka baali bali kwagala engeri ey'okuzikiriza Yesu, kuba baali batya abantu.

³ Agho Sitaani yangira mu Yuda ayetebwa Isikarioti eyali omulala ku abo Eikumi n'Ababiri.

⁴ Ono yaaja yeekobaana ni Bakabona Abakulu, n'abaisirukale ab'omu isinzizo nga bw'anaamubagha.

⁵ Baasangaala inho baisania empiiya dhe banaamugha.

⁶ Yuda yaaganha era yaatoolera okwagala akaghagaanhia ak'okumubagha nga ghazira bantu kamaala.

Okwetegekera Ekibinuko eky'Okubitizibwa

⁷ Agho olunaku olw'Ekibinuko eky'Emigaati Egitazimbulukusiibwa lwatuuka, kwe baitiranga entaama ento ey'Ekibinuko eky'Okwidhukiriraku Okubitizibwa.

⁸ Yesu yaatuma Petero ni Yoanne ng'abakoba ati: “Muje mututegekere Ekibinuko eky'Okwidhukiriraku Okubitizibwa.”

⁹ Baamubuuza bati: “Gha ye waalyenze tukitegekere?”

¹⁰ Yaabairamu ati: “Bwe munaaba mwingira mu kibuga mwidha kwagaanana n'omusaadha eyeetwise ensugha ey'amaadhi mumunonereze okutuuka mu ndhu y'anangiramu.

¹¹ Mukobe mwenemu muti, ‘Omwegeresa akobye ati ekisenge ky'anaaliiramu embaga ey'Ekibinuko eky'Okwidhukiriraku Okubitizibwa ghalala n'Abeegeresebwa be kiri gha?’

¹² Aidha kubalaga ekisenge ekinene ghaigulu ekirimu bye twenda, mwe mube mutegekere.”

¹³ Baaja baayagaana nga buli kintu kiri nga Yesu bwe yabakoba era baategekera omwo embaga ey'Ekibinuko eky'Okwidhukiriraku Okubitizibwa.

Ekyeigulo kya Musengwa

¹⁴ Esaawa bwe yatuuka, Yesu n'Abatume baatyama ku kiiwulo.

¹⁵ Yaabakoba ati: “Nhenze inho okulya ku mbaga eno ey'Ekibinuko eky'Okubitizibwa n'imwe, nga nkaali kudaazibwadaazibwa.

¹⁶ Kuba ka mbakobere: Tija kwirayo kugirya okutuusa bw'erituukirizibwa mu Bwakyabazinga bwa Katonda.”

¹⁷ Agho yaagema ekikopo yeeyanza Katonda yaakoba ati: “Mugeme buli muntu anhweku

¹⁸ kuba ka mbakobere: Tiriirayo kunhwa ku mwenge gwa muzabbibu okutuusa Obwakyabazinga bwa Katonda lwe buliidha.”

¹⁹ Olwo yaatoola omugaati yeeyanza Katonda, yaagumegulamegulamu, yaabagha ng'akoba ati: “Guno n'omubiri gwange, [ogugheebwayo ku lwaimwe. Kino mukikolanga okundidhukira.”

²⁰ Mu nsambo n'endala yatoola ekikopo nga bamaze okulya yaakoba ati: “Ekikopo kino n'endagaano ya Katonda empyaka ekolebwa n'omusaayi gwange ogufukibwa ku lwaimwe.]

²¹ Aye kale mubone, oyo ow'okundyamu olukwe ali ninze ghano ku kiiwulo!

²² Kuba Omwana w'Omuntu aja kuva ku nsi nga bwe kyategekebwa, aye akagwireku oyo amulyamu olukwe!”

²³ Agho baatoolera okwebuuzagania naani ku beene aghanga okukola ekyo.

Okutakana ku asinga mwine

²⁴ Abeegeresebwa be baatoolera okutakana beene na beene bati naani ku beene asinga.

²⁵ Yesu yaabakoba ati: “Bakyabazinga b'abamaghanga agandi bagafuga,

²⁶ aye imwe timugwaine kuba mutyo. Asinga mu imwe agwaine kuba oti n'asembayo, omukulu abe oti mugheereza:

²⁷ kuba naani asinga? Atyama ku kiiwulo oba amugheereza? Ti n'atyama ku kiiwulo? Aye nze ndi mu imwe ng'omugheereza.

²⁸ “Imwe mugumye mwaba ninze mu byonabyona ebituyuguumiiza.

²⁹ Kale ndidha kubagha Obwakyabazinga nga zeena Lata wange bwe yabumpa,

³⁰ musobole okulya n'okunhwa ninze ku kiiwulo kyange mu Bwakyabazinga bwange. Era mulityama ku makonero mwalamula ebika eikumi n'ebibiri ebya Isiraeli.

Yesu akoba nga Petero bw'alimwegaana

³¹ “Simoni, Simoni, oli kuwulira? Sitaani aikiriziibwa okubaleba, ayawule abalungi n'ababi ng'oti n'omuntu asensa engaano mu biwusu.

³² Aye nze nkusabiire okwikiriza kwo kulobe kukendeera, era bw'okyukanga ogumyanga baganda bo.”

³³ Petero yaamwiramu ati: “Musengwa, ndi mwetegefu okusibibwa era n'okufiira aghalala n'iwe.”

³⁴ Yesu yaamukoba ati: “Petero, ka nkukobere olwaleero luno enkoko enaaba ekaali kukolyoka ng'oneegaine emikuzi esatu nga bw'otandhidhi.”

Ebigema ku kwetegekera ebizibu

³⁵ Yesu yaakoba Abeegeresebwa be ati: “Ku olwo lwe nabatuma ni mbakoba obutaja na mpiiya, nsawo oba engaito, ghaligho kye mwayenda ni mutakifuna?” Bairamu bati: “Ghazira.”

³⁶ Yesu yaabakoba ati: “Aye mperaano ali n'empiiya atadhireka mu nsambo n'endala ali n'ensawo atagireka, oyo azira, atunde ekivaalo agule empiima.

³⁷ Ka mbakobere kiri n'okutuukirira ku nze ekyaghandiikibwa kiti, ‘Yabalirwa mu bamenhi ab'amateeka’ kuba ebyo ebingemaku biri n'enkomerero yaabyo.”

³⁸ Baamukoba bati: “Musengwa, bona empiima ibiri dhiidhino.” Yaabakoba ati: “Kimala.”

Yesu asaba ku lusozi olw'emiti emyoliva

³⁹ Yesu yaafuluma, yaaja ku Lusozi olw'Emiti Emyoliva nga bwe yali amanhiriire, Abeegeresebwa be baamunonereza.

⁴⁰ Bwe yatuukayo yaabakoba ati: “Musabe mulobe kulebwa.”

⁴¹ Yaabaleka agho yeeyongerayooku akata nga gh'otuusa okusuula eibaale,

⁴² yaakuba amakiryaivu, yaasaba, ati: “Lata, bwe kuba nga n'okwenda kwo ntoolaaku ekikopo kino, aye ti nga nze bwe nhenda aye nga iwe bw'oyenda.” [

⁴³ Agho yaabonekerwa malaika okuva mu igulu ng'aidha okumugumya.

⁴⁴ Yaawulira enaku mu mwoyo, yaasaba inho, yaagezimula era olugezi lwaba ng'oti matondo ga musaayi n'agali kutoonha ku itaka.]

⁴⁵ Bwe yamala okusaba, yaasituka yaira y'Abeegeresebwa be yaabaagaana nga batendwike olw'enaku eyabali mu mwoyo,

⁴⁶ yaabakoba ati: “Musituke musabe mulobe kulebwa.”

Yesu bamugema

⁴⁷ Yali akaayogera ng'eikuukuubira ery'abantu livaayo nga ni Yuda omulala ku ikumi n'Ababiri akulembeiremu, era yaaseeta aghaali Yesu okumugwa mu kifuba.

⁴⁸ Aye Yesu yaamukoba ati: “Yuda oli kughaayo Omwana w'Omuntu ng'omugwa mu kifuba?”

⁴⁹ Abaali ni Yesu bwe baabona ebirigho baamukoba bati: “Musengwa tutandiike okulwanisa empiima?”

⁵⁰ Era Omwegeresebwa owundi yaasala omugheereza w'Omukulu wa Bakabona yaamutoolaku kutu ow'oku luuyi olw'omukono omusaadha.

⁵¹ Yesu yaabakoba ati: “Muleke!” Era yaagema ku kutu ow'omwiru yaamuwonia.

⁵² Agho Yesu yaakoba Bakabona Abakulu, n'abaisirukale ab'omu isinzizo, n'abakulu ab'ebika abaidha okumugema ati: “Mwidhie okungema n'empiima n'emiigo oti muja kugema munhazi?

⁵³ Nabanga n'imwe mu isinzizo buli lunaku, timwangema. Aye eno n'esaawa yaimwe era amaani ag'enzikiiza gali kukola.”

Petero yeegaana Yesu

⁵⁴ Agho baamugema baamutwala mu ndhu y'Omukulu wa Bakabona. Era Petero yaabanonereza, aye ng'aliku ghala.

⁵⁵ Ghaaligho omuliro ogwali gukumiibwa mu luya ghagati era nga ghaligho abantu ku muliro agho, Petero yeena yaaja yaabatyamamu.

⁵⁶ Omugheereza omughala yaamubona ng'atyaime gha muliro yaamulingirira era yaakoba ati: “Omusaadha ono yeena yalinga n'ole.”

⁵⁷ Aye Petero yeegaana ati: “Mukazi iwe, nze timwidhi.”

⁵⁸ Ghaabitagho akaseera katono omuntu owundi yaamukoba ati: “Iwe weena oli mulala ku bale.” Aye Petero yeegaana ati: “Musaadha iwe nze tiri.”

⁵⁹ Bwe ghaabitagho entangama ya saawa nga ndala, kabiri ghaabaagho omuntu eyamwekalangulaku ati: “Bwenebwene omusaadha ono yeena yalinga n'ole kuba, n'okuba Mugalilaaya.”

⁶⁰ Aye Petero yairamu ati: “Musaadha iwe, ni by'oyogera tibiidhi!” Mu kaseera keene ako yali akaayogera, enkoko yaakolyoka.

⁶¹ Musengwa yaakyuka yaalinga ku Petero, era Petero yaidhukira ebibono bya Musengwa bye yamukoba ati: “Olwaleero luno enkoko enaaba ng'ekaali kukolyoka ng'oneegaine emikuzi esatu.”

⁶² Petero yaafuluma yaalira inho.

⁶³ Abasaadha abaali bali kukuuma Yesu baamukiina era baamukuba

⁶⁴ baamughemba ku maiso memale baamukoba bati: “Teeba, naani akukubye?”

⁶⁵ Era baamwogeraku ebibono eby'okuvuma kamaala inho.

Yesu mu mbuga

⁶⁶ Bwe bwakya, abakulu ab'ebika, Bakabona Abakulu n'Abanamateeka beesoloza baatyama mu lwekobaano olwo.

⁶⁷ Baamukoba bati: “Oba niiwe Kurisito tukobere.” Aye yaabairamu ati: “Bwe nnaabakobera timwidha kwikiriza

⁶⁸ ate bwe nnaababuuza timwidha kwiramu.

⁶⁹ Aye okuva ni mperaano Omwana w'Omuntu aidha kuba ng'atyaime ku mukono omusaadha ogw'amaani ogwa Katonda.”

⁷⁰ Boonaboona baamukoba bati: “Ekikoba niiwe Omwana wa Katonda?” Yaabakoba ati: “Niimwe abakyogeire.”

⁷¹ Agho baakoba bati: “Kabiri tukaayenderaki obudhulizi obundi? Tubyewuliriire beene ng'abyogera.”