Luka 21 - Baibuli Ekibono kya Katonda 2014

Ekirabo kya namwandu

¹ Yesu yeetegereza yaabona abakombe nga bata ebirabo byaibwe mu kifo omuteebwa ebirabo.

² Yaabona namwandu omwavu ng'ataamu budhegedhege bubiri.

³ Yaabakoba ati: “Bwenebwene ka mbakobere namwandu ono omwavu atairemu okusinga boonaboona.

⁴ Kuba bale batoirenga ku bingi bye bali nabyo, aye ono mu bwavu bwe aghaireyo kyonakyona ky'ali nakyo mu bulamu bwe.”

Okwonoonebwa okw'eisinzizo

⁵ Abantu bwe baali boogera ku isinzizo engeri ye lyazimbibwamu n'amabaale ag'omughendo agaboneka obulungi, n'ebirabo abantu bye baagha, yaabakoba ati:

⁶ “Ebiseera biidha, ebyo bye mubona ghalobe kubaagho ibaale lisigala ku liinaalyo nga tirisuuliibwa ghansi.”

Obumanhiso n'okudaazibwadaazibwa

⁷ Baamubuuza bati: “Mwegeresa, bino biribaagho li, era kamanhiso ki akalibaagho nga biri kumpi kubaagho?”

⁸ Yesu yaabairamu ati: “Mwekuume, ti kulwa nga babaghabya kuba ghalibonekagho abantu kamaala abalyeyeta eriina lyange nga bakoba bati, ‘Ninze oyo,’ era bati, ‘Ekiseera kituuse!’ Aye timubanonerezanga.

⁹ Ate bwe muwulira ku ntalo ni ku bwegugungo timudhugumiranga, kuba ebintu ebyo biri n'okusooka okubaagho, aye tikitegeeza kiti mangu ago enkomerero eriba ng'etuuka.”

¹⁰ Era yaabakoba ati: “Eighanga lirirumba eighanga erindi, obwakyabazinga bwalumba obwakyabazinga obundi.

¹¹ Ghalibaagho musisi ow'amaani, ghaabaagho endhala n'endwaire ya kawumpuli mu biketezo kamaala, era ghabaagho ebitiisa n'obumanhiso obw'amaani okuva mu igulu.

¹² Aye ng'ebyo byonabyona bikaali kubaagho, balibagema baabadaazadaaza, baabaghaayo mu mikono gya ab'obuyinza mu sinagoga ni mu makomera, baabaseeghayo ye bakyabazinga ni y'abafuzi abandi, ku lwange.

¹³ Kino kiribasobozesa okugha obudhulizi.

¹⁴ Mukite mu myoyo gyaimwe obuteetegekera kya kwiramu ng'ekiseera kikaali.

¹⁵ Kuba ninze ndibagha engeri ey'okwogera n'amagezi, nga ku bazigu baimwe ghazira aghanga kubitakania waire kubiroba.

¹⁶ Era muligheebwayo abazaire baimwe, baganda baimwe, ab'ekika kyaimwe, mikwano gyaimwe, era baliita abandi ku imwe.

¹⁷ Abantu boonaboona balibakyagha ku lw'eriina lyange.

¹⁸ Aye ghazira luviiri lwa ku mutwe gwaimwe luja kuzikirira.

¹⁹ Mu kuguma kwaimwe mwe muliwoneza obulamu bwaimwe.”

Okuzikirizibwa kwa Yerusalemu

²⁰ “Aye bwe mubonanga ab'amagye nga bali agho beezungulwire Yerusalemu, ng'olwo mumanha muti okuzikirizibwa kwakyo kutuuse.

²¹ Ng'olwo abali mu Buyudaaya balumukira mu nsozi, ng'abali mu kibuga bavaamu, era ababanga mu kyalo bataingiranga mu kibuga;

²² kuba edho n'edhiriba enaku edh'okubonereza n'okutuukiriza ebyaghandiikibwa byonabyona.

²³ Nga bakagwireku abaliba enda, n'abaliba bonsa mu nnaku edho kuba okudaagadaaga okw'amaani kuja kuba ku nsi eno n'obusungu bwa Katonda bwike ku bantu bano.

²⁴ Abandi balibaita n'empiima, abandi balitwalibwa mu maghanga goonagoona nga banhage, era Yerusalemu kiriniinirirwa abamaghanga agandi okutuusa enaku edh'abamaghanga agandi lwe dhiriwaaku.

Okwidha kw'Omwana w'Omuntu

²⁵ “Ghalibaagho obumanhiso ku ndhuba, ku mwezi ni ku muunienie, ate ku nsi ghalibaagho okweraliikirira mu maghanga, n'okusoberwa olw'okuduma okw'amayengo n'enhandha.

²⁶ Abantu balizirikaku olw'okutya nga balinda ebyo ebiri kwidha ku nsi, kuba amaani ag'omu igulu galitengeesebwa.

²⁷ Agho ng'abantu babona Omwana ow'Omuntu ng'aidhira mu kire n'amaani n'ekitiisa ekingi.

²⁸ Ebintu ebyo bwe bitooleranga okubaagho musitukanga mwayemerera, mwalinga ghaigulu kuba okununulibwa kwaimwe kuliba kutuuse.”

Eky'okwega ku mutiini

²⁹ Agho Yesu yaabafumira olufumo ati: “Mubonere ku mutiini, n'emiti egindi.

³⁰ Imwe beene bwe mubona nga gitoolereza okusibusa amakaba nga mumanha ng'endoboozi eri kumpi.

³¹ Mu nsambo n'endala bwe mubonanga ng'ebintu ebyo bitooleire okubaagho, mumanhanga ng'Obwakyabazinga bwa Katonda buli kumpi.

³² Bwenebwene, ka mbakobere, ebintu bino bija kubaagho ng'ab'oluse luno bakaali kuwaagho.

³³ Eigulu n'ensi bija kuwaagho, aye ebibono byange tibija kuwaagho.

Ayogera ku kwekuuma

³⁴ “Mwekuume, ti kulwa nga mwemalira bwa mu binhumo, kutamiira na kweraliikirira bya bulamu buno, olunaku lule lwabagwaku nga timwidhi.

³⁵ Kuba abantu boonaboona ab'oku nsi lulibagwaku ng'oti iggu.

³⁶ Mulingirire inho ebirigho era musabe, musobole okuwona ebyo ebija okubaagho era n'okwemerera mu maiso g'Omwana w'Omuntu.”

³⁷ Buli lunaku yayegeresanga mu isinzizo aye obwire ng'aja yaasula ku Lusozi olw'Emiti Emyoliva.

³⁸ Era buli ku nkyo abantu boonaboona beesololezanga mu isinzizo okumuwulirisa.