Luka 20 - Baibuli Ekibono kya Katonda 2014

Obuyinza bwa Yesu

¹ Lwali lulala Yesu bwe yali ng'ali kwegeresa abantu mu isinzizo nga bw'abakobera Amawulire Amalungi, Bakabona Abakulu, Abanamateeka, n'abakulu ab'ebika beesoloza.

² Baamukoba bati: “Tukobere, buyinza bwa kika ki bw'okozesa ebintu bino? Era naani eyakugha obuyinza obwo?”

³ Yesu yaabairamu ati: “Zeena ka mbabuuzeeku ekibuuzo, munkobere.

⁴ Okubatiza kwa Yoanne kwava mu igulu oba mu bantu?”

⁵ Agho batoolera okwekobaana beene na beene bati: “Bwe tunaakoba tuti kwava mu igulu, aidha kukoba ati lwaki timwamwikiriza?

⁶ Ate bwe tunaakoba tuti kwava mu bantu, abantu boonaboona baidha kutukuba amabaale, kuba bakikakasa mu myoyo gyaibwe bati Yoanne yali mulanzi.”

⁷ Agho baamukoba bati: “Titwidhi ghe kwava.”

⁸ Yesu yaabakoba ati: “Zeena tiibakobere buyinza bwe nkozesa bintu bino.”

Olufumo olw'abakozi ab'omu isamba

⁹ Agho yaakobera abantu olufumo luno ati: “Ghaaligho omusaadha eyasimba eisamba lye ery'emizabbibu, yaataamu abakozi, yaaja mu nsi eyindi, yaalwayo.

¹⁰ Ekiseera kyatuuka, yaatuma omugheereza aje y'abakozi amunonere ku biva mu isamba lye aye abakozi baamukuba era baamwiririzaayo ngalo nkalu.

¹¹ Kabiri yaatuma omugheereza owundi, oyo yeena baamukuba, baamukola ebiswaza era yeena baamwiririzaayo ngalo nkalu.

¹² Era yaatuma owokusatu, aye ono yeena baamusindiikiriza baamutoola mu isamba nga bamutaireku n'ebibwa.

¹³ Mwene isamba yeebuuza ati, ‘Nkole ki? Ka ntume mutabane wange omugonzi, oba katyo banaamutaamu ekinhagansi.’

¹⁴ Aye abakozi bwe baamubona, baakoba bati, ‘Ono n'omusika, ka tumwite obusika bube bwaife.’

¹⁵ Agho baamusindiikiriza okumutoola mu isamba, baamwita. “Kale mwene isamba aja kubakola ki?

¹⁶ Aja kwidha azikirize abakozi abo n'eisamba aliteemu abandi.” Abantu bwe baawulira ekyo baakoba bati: “Katonda ataganha ekyo kubaagho.”

¹⁷ Yesu yaabalingirira yaabakoba ati: “Kale, ekyaghandiikibwa kino kitegeeza ki? ‘Eibaale abazimbi lye baaloba bati lizira mugaso, n'eryafuuka empango ey'omusingi mu nsonda.’

¹⁸ Buli muntu agwa ku ibaale eryo amenhekamenheka, ate bwe ligwa ku muntu, limumanhiangula.”

¹⁹ Mu saawa eyo Abanamateeka ni Bakabona Abakulu baayenda bamugeme kuba baategeera bati mu lufumo olwo yali ayogera ku beene, aye baatya abantu.

Okugha omusolo gwa Kaisari

²⁰ Kale baagunirira baasasula abantu empiiya ab'okumuleba, abeefuula abeesimbu ate nga baayenda kumugemekeza mu by'ayogera, basobole okumughaayo mu mikono egy'ab'obuyinza.

²¹ Baidha baamukoba bati: “Mwegeresa, twidhi tuti by'oyogera ni by'oyegeresa bituufu, toboola muntu yeenayeena, aye oyegereresa irala amagira amatuufu aga Katonda.

²² Mpegaano tukobere, twikirizibwa mu Mateeka okugha Kaisari omusolo oba bbe?”

²³ Aye Yesu yaiguka mu katego kaibwe era yaabakoba ati

²⁴ “Mundage e dinari. Ekifaananie ekiriku n'ebighandiiko by'ani?” Baamukoba bati: “Bya Kaisari.”

²⁵ Yesu yaabakoba ati: “Niini mughe Kaisari ebya Kaisari, ni Katonda mumughe ebya Katonda.”

²⁶ Era tibaaghanga kumugema mu bibono bye yayogera ng'abantu baligho, kale baasirika busirike nga beewuunhia kye yabairamu.

Ebigema ku kuzuukira

²⁷ Agho abandi ku Basaddukaayo baidha, abakoba bati ezira kuzuukira,

²⁸ baamukoba bati: “Mwegeresa, Musa yatughandiikira ati, ‘Muganda w'omuntu bw'afa, n'aleka omukazi aye nga talese baana, muganda w'omufu atwalanga namwandu oyo, yaafunira muganda we eizaire.’

²⁹ Mperaano ghaaligho aboluganda musanvu asooka yaafuna omukazi yaafa nga tazaire

³⁰ owokubiri yaatwala namwandu,

³¹ n'owokusatu atyo, okutuusa boonaboona omusanvu bwe baafa nga tibazaire.

³² Olumaliira omukazi yeena yaafa.

³³ Olwo mu kuzuukira omukazi oyo aliba muka ani? Kuba boonaboona omusanvu baaliku ba iba.”

³⁴ Yesu yaakoba ati: “Abantu ab'ensi eno babayiza ate babayira,

³⁵ aye abo abalibonebwa nga bagwaine okuzuukira n'okwingira mu bulamu obwo tibalibayira era tibalibayiza.

³⁶ Baliba nga tibakaafa, kuba baliba ng'oti bamalaika. Era baliba baana ba Katonda, kuba baliba bazuukiire.

³⁷ Era ku by'abafu okuzuukira kiragibwa bukalamu mu kitabo kya Musa, mu bigema ku kisaka ebikoba biti, ‘Musengwa Katonda wa Aburahamu, Katonda wa Isaaka, Katonda wa Yakobo.’

³⁸ Kale ni, ti Katonda wa bafu aye wa balamu kuba eri Katonda, boonaboona baba balamu.”

³⁹ Olwo abandi ku Banamateeka baamukoba bati: “Mwegeresa, oizeemu bukalamu!”

⁴⁰ Era okuva olwo tibairayo kukana kumubuuza.

Ebigema ku Kurisito

⁴¹ Yesu yaabuuza ati: “Lwaki bakoba bati Kurisito mwidhukulu wa Daudi?

⁴² Ate nga Daudi mwene akoba mu kitabo kya Zabbuli ati, ‘Musengwa yakoba Musengwa wange ati: Tyama ghano ku mukono gwange omusaadha,

⁴³ okutuusa lwe ndita abazigu bo ghansi gh'ebigere byo.’

⁴⁴ Kale oba Daudi amweta Musengwa we, memale aba atya kabiri mwidhukulu we?”

Mwekuume Abanamateeka

⁴⁵ Agho ng'abantu boonaboona bali ku muwulirisa, yaakoba Abeegeresebwa be ati:

⁴⁶ “Mwekuume Abanamateeka abagonza okuniaga nga bavaire ebivaalo ebireeyi, okulamusibwa mu biya n'okutyama mu bifo ebisinga mu sinagoga ni ku mbaga

⁴⁷ abakaavuula eby'omu ndhu dha banamwandu, baalwagho nga basaba nga beeraga. Ekibonerezo kyaibwe kirisingaku eby'abandi.”