Luka 2 - Baibuli Ekibono kya Katonda 2014

Okuzaalibwa kwa Yesu

¹ Agho olwatuuka mu nnaku edho, ekiragiro kyava ewa Kaisari Agusito nga kikoba abantu okubalibwa.

² Okubalibwa kuno okwasooka, kwaligho nga Kwirinio n'afuga Siria.

³ Abantu boonaboona baaja okughandiikibwa, buli muntu ku kyalo eky'ewaibwe.

⁴ Yosefu yeena yaava mu kyalo Nazarethi eky'e Galilaaya yaaniinaniina okuja mu kyalo kya Daudi mu Buyudaaya, ekyetebwa Bethelehemu kuba yali wa kika kya Daudi, era wa ku nda ye.

⁵ Yaaja okweghandiisa ni Maria eyali amaze okumwandhula, era ng'ali nda.

⁶ Agho olwatuuka nga bakaali eyo, enaku dhe edh'okuzaala dhaatuuka.

⁷ Yaazaala omwana we omuberi nga mulenzi, yaamuzingirira mu bugozi, yaamuta mu kiibo ensolo mwe dhiriira kuba tibaafuna kifo mu ndhu ey'abageni.

Abaayi ni bamalaika

⁸ Mu kiketezo ekyo mwalimu abaayi abaabanga eyo mu byayiro obwire nga bakuuma ebyayo byaibwe.

⁹ Agho malaika wa Musengwa yaidha ghe baali, ekitiisa kya Musengwa kyayaka okubeezungulula era baatya inho.

¹⁰ Aye malaika yaabakoba ati: “Mutatya, mubone eno, mbaleeteire Amawulire Amalungi era agasangaaza eri abantu boonaboona

¹¹ kuba olwaleero, mu kibuga kya Daudi, omununuzi Kurisito Musengwa, abazaaliirwa.

¹² Kano akamanhiso kwe munaamanhira: Mwidha kwagaana omwana omughere nga bamuzingiriire mu bugozi nga bamulambaaziiza mu kitabo.”

¹³ Tibwalwa nga ghabaagho ogukuukuubira ogw'eigye eikologho ery'omu igulu ghalala ni malaika ole, baasaaka Katonda nga bakoba bati:

¹⁴ “Ekitiisa kibe ye Katonda eyo ghaigulu yeene, n'emiraala gibe ku nsi ku bantu be b'agonza.”

¹⁵ Bamalaika bwe baamala okuva abaayi ghe baali ni baja mu igulu, abaayi baakoba bati: “Tuje e Bethelehemu tubone kino ekibaireyo, Musengwa ky'atumanhiisa.”

¹⁶ Baaja nga bangugha, baayagaana Maria ni Yosefu n'omwana omughere nga bamulambaaziiza agho mu kitabo.

¹⁷ Bwe baabona omwana, baaghaya ku bintu malaika bye yabakobera ku mwana oyo

¹⁸ era boonaboona abaabiwulira, beewuunhia inho ebintu bino abaayi bye baabakobera.

¹⁹ Maria ebibono ebyo byonabyona yaabita ku mwoyo era yaabirowoozangaku inho.

²⁰ Abaayi baagolola nga bagulumiza Katonda era nga bwe bamusaaka, olwa byonabyona bye baabona ni bye baawulira nga bwe byabakoberwa.

²¹ Bwe dhaatuuka enaku omunaana omwana okukeketebwa, baamutuuma eriina Yesu, eriina malaika lye yamweta nga n'enda ye ekaali kutoolebwa.

Yesu bamughaayo mu isinzizo

²² Enaku edh'okutukuzibwa kwaibwe bwe dhaatuuka nga bwekiri mu Mateeka ga Musa, baamutwala e Yerusalemu okumughaayo ye Musengwa.

²³ Nga bwe kyaghandiikibwa mu mateeka ga Musengwa kiti: “Buli mwigulanda ow'obulenzi anaabanga mulonde wa Musengwa.”

²⁴ Era baaja n'okughaayo omusengo nga bwe kyalagirwa mu iteeka lya Musengwa amayemba abiri oba enjiibwa ento ibiri.

²⁵ Mu Yerusalemu mwalimu omuntu, eriina lye nga ni Simeoni, nga muntu akola ebituufu, atya Katonda ng'alindirira okununulwa kwa Isiraeli, era Mwoyo Mutukuvu ng'amuliku.

²⁶ Mwoyo Mutukuvu yali amaze okumumanhisaaku ati talifa ng'akaali kubona ku Kurisito, omusiige wa Musengwa.

²⁷ Oyo ni yaidha mu isinzizo, Mwoyo Mutukuvu nga n'amukobye. Era abazaire ab'omwana Yesu bwe baamuleeta okumukolaku ebimugemaku ng'empisa y'eiteeka bwe yali,

²⁸ yaamugema mu mikono gye, yaasaaka Katonda ng'akoba ati:

²⁹ “Mperaano Musengwa, siibula omugheereza wo mu idembe nga bwe wakoba.

³⁰ Kuba amaiso gange gaboine okulokola kwo,

³¹ kwe wategekera mu maiso ag'amaghanga goonagoona:

³² Ekimulika eky'okumulisa amaghanga ekitiisa, eky'abantu bo Abaisiraeli.”

³³ Ise n'inhina beewuunhia inho ebibono bino ebyamwogerwaku.

³⁴ Simeoni yaabasabira enkabi, ate yaakoba Maria inhina ati: “Ono omwana ateereibwagho olw'okuzikirira n'okuzuukira okw'abangi mu Isiraeli, era abe akamanhiso ak'okutakania.

³⁵ N'iwe mwene weena omwoyo gwo empiima erigufumita, olwo ebidhuubo ebiri mu myoyo egy'abangi byeyerula.”

³⁶ Era ghaaligho ni Anna omulanzi mughala wa Fanueli, ow'ekika kya Asheri, eyali omukazi omukaire. Okuva ku myaka gye egy'obwegha yamala n'iba emyaka musanvu.

³⁷ Yaaba namwandu okutuusa emyaka kinaana n'ena. Yali nga tava mu isinzizo, omusana n'obwire ng'ali ku kugheereza Katonda, kusaba na kusiiba.

³⁸ Mu kiseera kyene ekyo yaatuuka yeebaza Katonda, era yaayogera ku mwana oyo eri boonaboona abaali balindirira okununulwa kwa Yerusalemu.

Okwirayo e Nazarethi

³⁹ Bwe baamala byonabyona eiteeka lya Musengwa bye liragira, bairayo e Galilaaya, mu kyalo eky'ewaibwe e Nazarethi.

⁴⁰ Omwana yaakula yaaba wa maani, ng'aidhwire amagezi era n'enkabi dha Katonda ng'ali nadho.

Omwana Yesu mu isinzizo

⁴¹ Buli mwaka, abazaire ba Yesu baajanga e Yerusalemu ku Kibinuko eky'Okubitizibwa.

⁴² Bwe yagheza emyaka eikumi n'ebiri egy'obukulu, baniinaniina okuja ku kibinuko, ng'empisa bwe yali.

⁴³ Enaku bwe dhaawaaku, nga bali kwirayo, omwana Yesu yaasigala mu Yerusalemu. Aye abazaire be tibaamanha,

⁴⁴ baali badhuuba bati bali naye mu bantu, be baali bali kutambula nabo. Era baatambula olugendo lwa lunaku lulamba, nga bali kumwagala mu b'ekika ni mu bamanhe.

⁴⁵ Bwe bataamubona, bairayo e Yerusalemu nga bali kumwagala.

⁴⁶ Nga ghabiseegho enaku isatu, baamwagaana mu isinzizo ng'atyaime ghagati mu beegeresa ng'abawulirisa, ate nga bw'ababuuza ebibuuzo.

⁴⁷ Era boonaboona abaamuwulirisa beewuunhia inho amagezi ge, ni bye yairangamu.

⁴⁸ Abazaire be bwe baamubona, baayasaamirira, era inhina yaamukoba ati: “Mwana wange, lwaki otukoze otyo? Bona, lata wo ninze obweira tuli kukwagala nga tuli beeraliikirivu inho.”

⁴⁹ Aye yaabakoba ati: “Mubaire mundhagalira ki? Mubaire timwidhi nga nteekwa okuba ku gwa Lata wange?”

⁵⁰ Aye ekibono kye yabakoba tibaakitegeera.

⁵¹ Agho Yesu yaaserengeta nabo, yaatuuka e Nazarethi, era yaabawuliranga. Inhina ebintu ebyo byonabyona yaabita ku mwoyo.

⁵² Yesu yeeyongera mu magezi n'okukula era n'okugonzebwa Katonda n'abantu.