Luka 19 - Baibuli Ekibono kya Katonda 2014

Yesu ni Zakkayo

¹ Agho Yesu yangira mu Yeriko ng'ali kukibitamu.

² Ghabaagho omusaadha nga bamweta Zakkayo nga mughooza wa musolo mukulu era nga mukombe.

³ Yayenda okubona Yesu aye tiyaghanga olw'eikuukuubira ery'abantu ate nga yali musaadha mumpi.

⁴ Kale yaalumuka, yaaja emberi, yaaniina omuti omutiini aghange okumubona, kuba eyo n'engira ye yali aja okubitamu.

⁵ Yesu bwe yatuuka mu kifo yaalinga ghaigulu yaamukoba ati: “Zakkayo, yangughaku okwika, kuba olwaleero nteekwa okukukyalira mu maka go.”

⁶ Kale yaayangughaku yaika, era yaamusangaalira n'eisanhu.

⁷ Boonaboona bwe baakibona, baavuuvuuma nga bakoba bati: “Ajiire okukyalira omusaadha omwonooni.”

⁸ Agho Zakkayo yaayemerera yaakoba Musengwa ati: “Musengwa, ndidha kwawulamu ghagati ebintu byange, ekitundu ekindi nkigabire abaavu era oba nga ghaligho omuntu yeenayeena ye nakupankupaniaku ekikye kyonakyona, ndidha kukimuliyira emikuzi ena.”

⁹ Yesu yaamukoba ati: “Olwaleero okulokoka kutuuse ku ndhu eno, kuba ono yeena mwidhukulu wa Aburahamu.

¹⁰ Era Omwana ow'Omuntu yaidha okunoonia n'okuwonia ekyali kibuze.”

Olufumo lwa mina eikumi

¹¹ Bwe baali bakaawulirisa ebyo, Yesu yeeyongera, yaabafumira olufumo, kuba yali ali kumpi ni Yerusalemu, ate nga baali badhuuba bati Obwakyabazinga bwa Katonda bwali bwa kuboneka mangu ago.

¹² Kale yaabakoba ati: “Ghaaligho omusaadha ow'ekitiisa eyaja mu nsi ey'eghala afuulibwe kyabazinga memale aire.

¹³ Ng'akaali kuja yaayeta abagheereza be ikumi yaabagha mina ikumi yaabakoba ati, ‘Mudhisuubuze okutuusa lwe ndiira.’

¹⁴ Aye abantu ab'omu nsi ye, baali nga baamukyagha, era baagheereza abakwenda abaamuva einhuma okukoba bale ye yali ali kuja bati tibenda oyo abafuge.

¹⁵ “Bwe yaira ng'amaze okufuulibwa kyabazinga, yaakoba bamwetere abagheereza be, be yalekera mina, amanhe kye baafunamu mu kusuubula.

¹⁶ Eyasooka yaidha yaakoba ati, ‘Musengwa, mina yo yazaala mina edhindi ikumi.’

¹⁷ Yaamukoba ati, ‘Weekaza omugheereza omulungi! Olw'okuba wali mwesigwa mu bitono, oidha kufuga ebibuga ikumi.’

¹⁸ Owokubiri yaidha yaakoba ati, ‘Musengwa, mina yo yazaala mina edhindi itaanu.’

¹⁹ Oyo yeena yaamukoba ati, ‘Iwe oidha kufuga ebibuga bitaanu!’

²⁰ “Omugheereza owundi yaidha yaakoba ati, ‘Musengwa, mina yo yiino ye nazingirira mu kagoye ni ngigisa.

²¹ Nakutya kuba oli muntu muzibu: otwala ebitali bibyo era waakungula by'otaasiga.’

²² Yaamukoba ati, ‘Omugheereza omubi iwe, by'oyogeire kwe nnaasinziira okukusalira omusango. Wamanha oti ndi muzibu, ntwala ebitali byange, naakungula bye ntaasiga

²³ lwaki kale tiwateresa basuubuzi mina yange? Nze olwandiize nandibaire ngifuna nga kuliku n'amagoba.’

²⁴ “Agho yaakoba abaali beemereire agho ati, ‘Mumutooleku mina eyo mugighe ole ali ni mina eikumi.’

²⁵ Baamukoba bati, ‘Musengwa, ole ali ni mina ikumi!’

²⁶ Musengwa yaakoba ati, ‘Ka mbakobere: yeenayeena aliku ni ky'ali nakyo aligheebwa aye oyo azira, ni k'ali nako kalimutoolebwaku.

²⁷ Ate abo abazigu bange abataayenda mbafuge, mubaleete ghano mubaite nga mbona.’ ”

Yesu angira mu Yerusalemu n'ekitiisa

²⁸ Yesu bwe yamala okwogera ebyo, yaakulemberamu yaaniinaniina, yaasimba e Yerusalemu.

²⁹ Bwe yatuuka okumpi ni Bethifage ni Bethania, agho nga ku Lusozi olw'Emiti Emyoliva, yaatuma babiri ku Beegeresebwa be,

³⁰ ng'abakoba ati: “Muje mu kyalo kye mulingiriire, ekyo bwe munaaba mukingira muti munaayagaana endogoyi ento ng'esibiibwa nga tetyamwangaku muntu yeenayeena, mugisibule mugireete.

³¹ Bwe ghabaagho ababuuza ati, ‘Lwaki muli kugisibula?’ Munaakoba muti Musengwa n'agyenda.”

³² Kale abo be yatuma baaja era baayagaana nga kiri nga bwe yakoba.

³³ Bwe baali basibula endogoyi, beene yo baababuuza bati: “Lwaki muli kusibula endogoyi?”

³⁴ Baabairamu bati: “Musengwa agyenda.”

³⁵ Baagireeta ye Yesu, baagyalaku ebivaalo era baagimutyamyaku.

³⁶ Bwe yali ng'aja, baayala ebivaalo byaibwe mu luguudo.

³⁷ Bwe yali ng'ali kumpi okutuuka agho ng'oserengeta Olusozi lw'Emiti Emyoliva, eikuukuubira ery'Abeegeresebwa lyatoolera okusagamba n'okusaaka Katonda, mu mamiro ag'amaani olw'ebyewuunhio byonabyona bye baali baboine.

³⁸ Baakoba bati: “Wa nkabi kyabazinga oyo aidha mu liina lya Musengwa! Emiraala gibe mu igulu n'ekitiisa kibe eyo ghaigulu yeene.”

³⁹ Agho Abafarisaayo abaali mu ikuukuubira, baamukoba bati: “Mwegeresa, koba ku Beegeresebwa bo.”

⁴⁰ Yaabairamu ati: “Ka mbakobere bano bwe basirika amabaale gaidha kuleekaana.”

⁴¹ Agho Yesu yaatuuka okumpi n'ekibuga, bwe yakibona yaalira.

⁴² Yaakoba ati: “Nguli wamanha waire olwaleero luno ebireeta emiraala! Aye mperaano bya kwegisaaku

⁴³ kuba enaku dhiri kukwidhira abazigu bakusiteku olukomera, bakusibiremu bakuzingize ku ndhuyi dhoonadhoona.

⁴⁴ Balikusaaniagho iwe n'abantu bo abakulimu era tibalireka ibaale ku liinaalyo kuba tiwamanha lunaku lwa kukukyalira.”

Yesu abinga abatundira mu isinzizo

⁴⁵ Agho Yesu yangira mu isinzizo yaatoolera okubingamu abaali bali kutaniramu ebintu.

⁴⁶ Yaabakoba ati: “Kyaghandiikibwa kiti, ‘Endhu yange enaabanga ndhu yaakusabiramu.’ Aye imwe mugifiire mpuku ya banhazi!”

⁴⁷ Era yali ng'ayegeresanga buli lunaku eyo mu isinzizo. Bakabona Abakulu, Abanamateeka n'abataka abakulu, banoonia amagezi ag'okumusaaniagho,

⁴⁸ aye baalemwa okubona eky'okukola kuba abantu boonaboona nga bwe bamuwulirisa, tibenda kulekera.