Luka 18 - Baibuli Ekibono kya Katonda 2014

Olufumo lwa namwandu n'omulamuzi

¹ Agho yaabafumira olufumo okubalaga ati bagwaine okusabanga buliidho era n'obutakoogha.

² Yaabakoba ati: “Ghaaligho ekibuga kirala, omwali omulamuzi eyali nga tatya Katonda era nga tata mu muntu yeenayeena kinhagansi.

³ Era mu kibuga omwo mwabaamu namwandu eyaidhanga y'ali n'amukoba ati, ‘Tutawulule, omponie omuzigu.’

⁴ Omulamuzi yaamala entangama ng'alobye. Aye olumaliira yaakoba mu mwoyo gwe ati, ‘Waire titya Katonda, era ghazira muntu yeenayeena ye ntaamu kinhagansi,

⁵ aye olw'okuba namwandu ono ansinie, ndidha kubatawulula, alobe kwidha kunkooya buli kaakyeire.’ ”

⁶ Agho Musengwa yaakoba ati: “Muwulire omulamuzi oyo omubi bw'akoba.

⁷ Memale obwo Katonda bw'atalitawulula abalonde be abamusaba omusana n'obwire? Mbo bw'alirwa okubayamba?

⁸ Ka mbakobere: Aja kubatawulula, ate mangu. Aye Omwana w'Omuntu bw'aliidha, alyagaana okwikiriza ku nsi?”

Olufumo olw'Omufarisaayo n'Omughooza w'omusolo

⁹ Agho, abo abaali beidhi nga batukuvu era nga banhooma abandi boonaboona, yaabakobera olufumo luno:

¹⁰ “Olwatuuka nga ghabaagho abantu babiri, Omufarisaayo n'omughooza w'omusolo, nga baja mu isinzizo okusaba.

¹¹ Omufarisaayo yaayemerera yaasaba mu mwoyo gwe ati, ‘Katonda wange nkwebaza, kuba tiri ng'oti n'abantu abandi, abanhazi, abazira mazima, abenzi era tiri ng'oti n'omughooza w'omusolo oyo.

¹² Nze nsiiba emikuzi ebiri buli nnaku musanvu, era ku buli bintu eikumi bye nfuna nkughaaku ekirala.’

¹³ Aye omughooza w'omusolo, yaayemerera ghalaku era nga tayenda na kusitulira maiso eri eigulu, yeekuba mu kifuba bw'akoba ati, ‘Katonda wange, nsaasira nze omwonooni!’

¹⁴ Ka mbakobere: Omughooza w'omusolo ono yairayo ewuwe nga mutukuvu mu maiso ga Katonda okusinga ole kuba buli eyeetwala ati wa ghaigulu aja kwisibwa era buli eyeetwala nga wa ghansi aja kutwalibwa nga wa ghaigulu.”

Yesu agha abaana abato omukisa

¹⁵ Abantu baamuleetera n'abaana abato boona abagemeku, aye Abeegeresebwa be bwe baakibona baabadhuuka.

¹⁶ Aye Yesu yaabeeta yaabakoba ati: “Muleke abaana abato baidhe ye ndi mutabalobera kuba abali oti n'abo ni beene Bwakyabazinga bwa Katonda.

¹⁷ Bwenebwene ka mbakobere: Ataikiriza Bwakyabazinga bwa Katonda oti mwana muto taghanga kubungiramu naire.”

Omwami omukombe

¹⁸ Ghaabaagho omwami mulala yaamubuuza ati: “Mwegeresa omulungi, nkole ki okufuna obulamu obutawaagho?”

¹⁹ Yesu yaamukoba ati: “Lwaki okoba oti ndi mulungi? Ezira mulungi okutoolaku Katonda yenka.

²⁰ Oidhi ebiragiro: ‘Toyendanga, toitanga, toibanga, toghaayirizanga. Lata wo n'inhoko obaghanga ekitiisa.’ ”

²¹ Ole yairamu ati: “Ebyo byonabyona nabigema okuva mu buto.”

²² Yesu bwe yawulira ekyo yaamukoba ati: “Okaabuzaayo ekintu kirala. Ja otoole by'oli nabyo byonabyona ogabire abaavu, eby'obukombe oliba nabyo mu igulu era oidhe obitenga ninze.”

²³ Bwe yawulira ekyo, yaafootookerera, kuba yali mukombe mu bakombe.

²⁴ Yesu bwe yamubona ng'afootookereire yaakoba ati: “Nga kikalangafu abakombe okwingira mu Bwakyabazinga bwa Katonda!

²⁵ Kiba kyangu engamiya okubita mu mpami ey'empiso okusinga omukombe okungira mu Bwakyabazinga bwa Katonda.”

²⁶ Abaakiwulira baakoba bati: “Memale olwo naani asobola okulokolwa?”

²⁷ Aye Yesu yaabairamu ati: “Ebitasoboka mu bantu, Katonda abisobola.”

²⁸ Agho Petero yaamukoba ati: “Kale ife, twaleka ebyaife twakunonereza.”

²⁹ Yesu yaabakoba ati: “Bwenebwene ka mbakobere ezira oyo aleka maka, mukazi, oba baganda be, oba bazaire oba baana olw'okuba Obwakyabazinga bwa Katonda,

³⁰ n'atafuna ebisingagho kamaala mu nsi muno, ate ni mu biseera ebiidha n'agheebwa obulamu obutawaagho.”

Yesu ayogera omukuzi ogwokusatu ku kufa kwe

³¹ Agho Yesu yaatwala Eikumi n'Ababiri gha mbali, yaabakoba ati: “Buti tuli kuniinaniina e Yerusalemu era ebintu byonabyona ebyaghandiikibwa abalanzi ebigema ku Mwana w'Omuntu bija kutuukirira.

³² Aja kugheebwayo mu mikono egy'abamaghanga agandi, bamukiine, bamuvume, bamufuudheku amatanta.

³³ Ate nga bamaze okumuwaiga enkoba baidha kumwita, era ku lunaku olwokusatu azuukire.”

³⁴ Aye ghazira mu ebyo kye baategeera; amakulu ag'ebibono ebyo gaabeegisaaku era tibaagemya bye yabakoba.

Yesu awonia omutulu asabiriza ow'e Yeriko

³⁵ Agho olwatuuka, bwe yali ali kumpi okutuuka e Yeriko, ghaabaagho omutulu eyali atyaime ku mbali ku ngira ng'asabiriza.

³⁶ Bwe yawulira eikuukuubira ery'abantu nga libita yaabuuza ki ekirigho,

³⁷ era baamukobera bati, Yesu ow'e Nazarethi n'ali kubita.

³⁸ Agho yaayasiikana ati: “Yesu mwidhukulu wa Daudi, nsaasira!”

³⁹ Abaali bakulembeiremu baamudhuuka asirike, aye yayongera bwongere kwasiikana ati: “Mwidhukulu wa Daudi nsaasira!”

⁴⁰ Kale Yesu yaayemerera, yaalagira bamumuleetere. Bwe yaseeta, yaamubuuza ati:

⁴¹ “Oyenda nkukolere ki?” Yaakoba ati: “Musengwa nhenda kwiramu kubona.”

⁴² Yesu yaamukoba ati: “Iramu okubona, okwikiriza kwo kukuwoniiza.”

⁴³ Akaseera keene ako yairamu okubona era yaanonereza Yesu nga bw'agha Katonda ekitiisa. Abantu boonaboona bwe baakibona baasaaka Katonda.