Luka 17 - Baibuli Ekibono kya Katonda 2014

Ebindi ku Yesu bye yakoba

¹ Agho Yesu yaakoba Abeegeresebwa be ati: “Ebisendasenda abantu okugwa mu kibi byakubaagho, aye akagwireku oyo abireeta.

² Oyo kyandimubeereire kikalamu ngoli asibibwa olubengo olunene mu nkoto n'asuulibwa mu nhandha, okusinga okuleetera ni bw'aba omulala ku bato bano okugwa mu kibi.

³ “Kale mwekuume, muganda wo bw'akukolanga ekibi, omunenianga era bwe yeenenianga omusonighanga.

⁴ Era bw'akukolanga ebibi emikuzi musanvu olunaku olulala, era n'airanga y'oli emikuzi egyo omusanvu n'akukoba ati, ‘Tikairayo,’ omusonighanga.”

⁵ Abatume baakoba Musengwa bati: “Twongereku okwikiriza.”

⁶ Musengwa yaabakoba ati: “Nguli mulikuuku n'okwikiriza okwaga n'akamuuma ka kaladaali, mwandisoboire okukoba omuti ogw'enkenene guno muti, ‘Va ghano weesimbe mu nhandha’ gwabawulira.

⁷ “Naani ku imwe aba n'omugheereza we alima oba ayaya, n'amukoba nga yaakava mu nimiro ati, ‘Idha otyame tulye?’

⁸ Tamukoba bukobe ati, ‘Ntegekera kye nnaalya era ovaale bukalamu ompeereze okutuusa bwe nnaamala okulya n'okunhwa, memale weena olye era onhwe?’

⁹ Bw'amala yeebaza omugheereza oyo olw'okukola by'amulagiire?

¹⁰ Kale mwena bwe mukolanga ebyo byonabyona ebibalagirwa mukobanga muti ‘Tuli bagheereza abazira kye tugasa, tukoze bw'ekyo kye tuteekwa okukola.’ ”

Okuwonia abantu ab'endwaire ey'ebigenge

¹¹ Olwatuuka bwe yali aja e Yerusalemu, yaabita ghagati gha Galilaaya ni Samaria.

¹² Bwe yali aja okungira mu kabuga, yaayagaanana n'ab'endwaire ey'ebigenge ikumi, era baayemerera nga ghakaabulayo akata,

¹³ baaleekaana bati: “Yesu Musengwa, tusaasire.”

¹⁴ Yesu bwe yababona yaabakoba ati: “Muje mweyandhule ye bakabona.” Era bwe baali baja baalongooka.

¹⁵ Omulala ku abo bwe yabona ng'awonie, yaira einhuma okusaaka Katonda ng'ayogerera ghaigulu

¹⁶ era yaatuuka yeeyala ku itaka agho gha bigere bya Yesu nga yeeyanza. Era ono yali Musamaria.

¹⁷ Agho Yesu yaakoba ati: “Abawonie tibabaire ikumi? Memale omwenda bali gha?

¹⁸ Tighabaire aira kugha Katonda kitiisa okutoolaku ono ow'eighanga erindi?”

¹⁹ Kale n'okumukoba ati: “Situka oje okwikiriza kwo kukuwoniiza.”

Obwakyabazinga bwa Katonda

²⁰ Abafarisaayo baamubuuza bati: “Obwakyabazinga bwa Katonda butuuka li?” Yaabairamu ati: “Obwakyabazinga bwa Katonda tibuja kwidha na bumanhiso

²¹ era abantu tibalikoba bati, ‘Bona eno, buubuno’ oba bati, ‘Buubule!’ Kuba Obwakyabazinga bwa Katonda buli mu imwe.”

²² Agho yaakoba Abeegeresebwa be ati: “Ekiseera kiri kwidha mwe mulyegombera okubona Omwana w'Omuntu waire olunaku olulala luti, aye nga timusobola.

²³ Ghalibaagho ababakoba bati, ‘Wuule ghale’ oba bati, ‘Wuuno ghano.’ Aye mutajangayo waire okubanonereza,

²⁴ kuba ng'olukuba bwe lughemya ni lumulisa ghansi gh'eigulu woonawoona okuva ku luuyi olundi okutuuka ku lundi, atyo n'Omwana w'Omuntu bw'aliba ku lunaku lwe.

²⁵ Aye ateekwa okusooka okudaazibwa einho, n'okwegaanibwa ab'oluse luno.

²⁶ Nga bwe kyali mu nnaku dha Noa era bwe kiriba ni mu nnaku edh'Omwana w'Omuntu.

²⁷ Abantu baali bali ku kulya, kunhwa, kubayiza, na kubayira, okutuusa ku lunaku Noa lwe yangira mu lyato, amaadhi ag'omwidhuzo gaidha gabazikiriza boonaboona.

²⁸ Mu nsambo n'endala, bwe kiriba oti ni bwe kyali mu nnaku dha Loti: Abantu baali mu kulya, kunhwa, kugula, kutunda, kusiga na kuzimba,

²⁹ aye ku lunaku Loti lwe yafuluma mu Sodoma, omuliro n'obunhota byamagalika okuva mu igulu byabazikiriza boonaboona.

³⁰ Kityo bwe kiriba ku lunaku Omwana w'Omuntu lw'alibonekeraku.

³¹ Ku lunaku olwo, oyo aliba ku ndhu ku ngulu aye nga ebibye biri mu ndhu atairanga inhuma.

³² Mwidhukire muka Loti ekyamutuukaku.

³³ Buli agezaaku okuwonia obulamu bwe aja kubufiirwa, aye buli afiirwa obulamu bwe alibuwonia.

³⁴ Ka mbakobere: Mu bwire obwo ababiri abaliba mu buliri obulala, owundi alitwalibwa owundi yaalekebwa.

³⁵ Ababiri abaliba aghalala nga bali kusa, owundi alitwalibwa owundi yaalekebwa. [

³⁶ Ababiri abaliba mu nimiro, owundi alitwalibwa owundi yaalekebwa.]”

³⁷ Agho baamukoba bati: “Musengwa, luuyi gha?” Yesu yaabakoba ati: “Aghaba ekifiire ensega ghe dheesololeza.”