Luka 16 - Baibuli Ekibono kya Katonda 2014

Olufumo olw'omughanika azira bwesimbu

¹ Yesu era yaakoba Abeegeresebwa be ati: “Ghaaligho omuntu omukombe eyali n'omughanika we, baamumuseeghera bati ayonoona ebintu bye.

² Kyeyava n'amweta n'amukoba ati, ‘Biki bino bye nkuwuliraku? Kale inhonhola ebigema ku bughanika bwo, kuba tokaaghanga kuba mughanika.’

³ Omughanika yaakoba mule ati, ‘Nkole ki? Musengwa wange aja kuntoola ku bughanika. Okulima tikusobola, ate okusabiriza kungemya ensoni.

⁴ Ntegeire eky'okukola abantu okunsangaalira mu ndhu dhaibwe, bwenaaba nga ntooleibwa ku bughanika.’

⁵ “Agho yaayeta buli muntu musengwa we ye yali abandha. Yaakoba eyasooka ati, ‘Musengwa wange akubandha ki?’

⁶ Ole yaakoba ati, ‘Endebe kikumi (100) edh'omuzigo.’ Yaamukoba ati, ‘Gema ekighandiiko kyo, era tyama mangu oghandiike amakumi ataanu (50).’

⁷ Agho yaakoba owundi ati, ‘Ate iwe eibandha lyo lyaga gha?’ Yaamukoba ati, ‘Ensawo kikumi (100) edh'engaano.’ Yaamukoba ati, ‘Gema ekighandiiko kyo oghandiike kinaana (80).’

⁸ “Kale musengwa yaasaaka omughanika oyo atali mwesimbu olw'amagezi ge yasala kuba abaana ab'ensi eno bagezigezi mu ngeri ye bakolaganamu n'ab'oluse lwaibwe okusinga abaana ab'omusana.

⁹ “Era ka mbakobere: Mwefunire emikwano mu bukombe buno obw'ensi, kuba ni bwe buliwaagho, balibasangaalira mu bulamu obw'ebyanda n'ebyanda.

¹⁰ Omwesimbu mu bitono einho era aba mwesimbu mu binene, n'oyo atali mwesimbu mu bitono era taba mwesimbu mu binene.

¹¹ Kale oba nga timwali beesimbu mu bukombe buno obw'ensi, naani aja okubateresa obukombe bwene obw'amazima?

¹² Era oba nga timwali beesimbu ku by'abandi naani alibagha ebyaimwe?

¹³ “Ezira mugheereza aja kuba ni basengwa be babiri kuba akyaghaku mulala yaayenda owundi, oba yeekubira ku mulala yaanhooma owundi. Timusobola kugheereza byombi: Katonda na bukombe bwa nsi.”

Eiteeka n'Obwakyabazinga bwa Katonda

¹⁴ Mperaano Abafarisaayo, kuba baali benda inho eby'obukombe, bino byonabyona baabiwulira aye baamusekerera.

¹⁵ Aye yaabakoba ati: “Niimwe abeerongoosa mu maiso ag'abantu aye Katonda aidhi emyoyo gyaimwe kuba abantu kye basuuta, Katonda akyenhinhala.

¹⁶ “Amateeka n'abalanzi byaligho okutuuka ku Yoanne okuva n'olwo Obwakyabazinga bwa Katonda bwayegeresebwa nga n'Amawulire Amalungi, era buli muntu agezaaku okubungiramu n'amaani.

¹⁷ Aye kyangu eigulu n'ensi okuwaagho okusinga Amateeka okuvaaku waire akatoonheze.

¹⁸ “Buli muntu abinga mukazi we n'abayiza owundi aba ayenze, ate omuntu abayiza omukazi oyo iba y'abinze yeena aba ayenze.

Omukombe ni Lazaro

¹⁹ “Ghaaligho omusaadha omukombe eyavaalanga ebivaalo bya nakasooma nga byakolebwa mu ngoye mpegheevu, era nga buli lunaku yabanga oti ali ku mbaga.

²⁰ Ghaabaagho omusaadha omwavu eyali aidhwire amabwa ye baayetanga Lazaro, ng'aba agho ku mulyango ogw'omukombe.

²¹ Yeegombanga okulya aigute obukunkumuka obwavanga ku meeza ey'omukombe, era embwa dhaidhanga dhaakomberera amabwa ge.

²² “Ekiseera kyatuuka, omusaadha omwavu yaafa, bamalaika baamutwala mu kifo Aburahamu mwe yali. Omukombe yeena yaafa, yaaziikibwa.

²³ Omukombe ng'ali e magombe mu bulumi obungi einho, yaagangamula ku maiso, yaalengera Aburahamu ni Lazaro nga bali ghalala.

²⁴ Agho yaayeta ati, ‘Aburahamu lata, nsaasira otume Lazaro ainhike olwala lwe mu maadhi, aidhe ampozewozeeku olulimi, kuba ndi kulumizibwa inho eno mu muliro.’

²⁵ “Aye Aburahamu yaamukoba ati, ‘Mwana wange idhukira oti mu bulamu bwo wafuna ebirungi byonabyona, aye Lazaro yaafuna ebibi kale mperaano ono n'okuba mu kwesiima, iwe n'oba mu kubonaabona.

²⁶ Ate ghagati waife n'imwe ghaateebwagho olukonko olunene, ng'abo abandyenze okuva eno okwidha eyo tibasobola, waire abenda okuva eyo okwidha eno.’

²⁷ Omukombe yaakoba ati, ‘Niini nkweghembye lata, mutume eri ab'omu ndhu ya lata wange,

²⁸ kuba ndiyo ni baganda bange bataanu, abalabule tomanha boona bwe baidha mu kifo kino eky'okubonaabona.’

²⁹ “Aye Aburahamu yaamukoba ati, ‘Baganda bo bali ni Musa n'abalanzi, babawulirise.’

³⁰ Omukombe yaakoba ati, ‘Aburahamu lata, aye bweghabaagho ava e magombe n'aja ye bali, baidha kwenenia.’

³¹ Aye Aburahamu yaamukoba ati, ‘Oba nga tibawulira Musa n'abalanzi, tibaja kwikiriza omuntu ni bw'alizuukira okuva mu bafu.’ ”