Luka 15 - Baibuli Ekibono kya Katonda 2014

Entaama eyabula

¹ Mperaano, abaghooza ab'omusolo n'aboonooni baaseeta ye Yesu okumuwulirisa.

² Abafarisaayo n'Abanamateeka mule baaduuduuma nga bakoba bati: “Ono asangaalira aboonooni era yaalya nabo!”

³ Agho Yesu yaabakobera olufumo luno:

⁴ “Naani ku imwe aba n'entaama ekikumi, memale endala ku edho n'emubulaku, ataleka ekyenda n'omwenda ku nsiko n'aja n'ayagala eyo ebuze okutuusa lw'agizuula?

⁵ Bw'agibona agibbeedera ku mabega nga bw'asagamba.

⁶ Era bw'atuuka eka ayetaku bakagwa be n'ab'oku lulaalo yaabakoba ati, ‘Mwidhe tusagambe kuba nzwire entaama yange ebaire ebuze.’

⁷ Ka mbakobere ni mu igulu okusagamba kuba kutyo, olw'omwonooni omulala eyeenenia, okusinga olw'abantu abatuufu ekyenda n'omwenda abateetaaga kwenenia.

Ka lupiiya akaabula

⁸ “Oba mukazi ki aba ni budhegedhege eikumi, me male akandi ni kamubulaku, atakunaania itaala n'ayeya ndhu, n'ayagala inho na bwegendereza okutuusa lw'akazuula?

⁹ Era bw'akazuula ayetaku bakagwa be n'ab'oku lulaalo yaabakoba ati, ‘Mwidhe tusagambe kuba nzwire ka dhegedhege kange akaali kabuze.’

¹⁰ Kale ka mbakobere: Ebaayo okusagamba mu bamalaika ba Katonda olw'omwonooni omulala eyeenenia.”

Omulenzi eyaghata

¹¹ Yesu yaakoba ati: “Ghaaligho omusaadha ng'ali ni batabane babiri.

¹² Omuto yaakoba ise ati, ‘Lata, mpa ekimega kyange eky'obusika’ era iseibwe yaabagabania mu bibye.

¹³ Ghaabita enaku ntono omulenzi oyo yaasoloza ebibye byonabyona yaaja eyo mu nsi ey'eghala, yaadiibuulira eyo ebibye nga yeebisa nga bw'abona.

¹⁴ Ng'amaze okumalagho byonabyona bye yali nabyo, endhala ey'amaani yaagwa mu nsi eyo, yaatoolera okuluga.

¹⁵ Kye yakola yaaja yaasenga omutaka mulala ow'omu nsi eyo, era oyo yaamugha gwa kwayanga mbiidhi dhe.

¹⁶ Era yeegombanga okulya ku bimere eby'embiidhi, nga ghazira abimugha.

¹⁷ Aye bwe yairamu amagezi yaakoba ati, ‘Ye ng'abakozi ba lata wange balya emere baalekerera! Aye nze naalambukira ghano?

¹⁸ Ndidha kwesitula, nje ye lata wange mmukobe nti, Lata, nayona mu maiso ga Katonda ni mu maiso go

¹⁹ tikaagwanira na kwetebwa mutabane wo, ntwala ng'omukozi wo.’

²⁰ “Agho yeesitula yaaja ye ise. Aye yali akaali ghalaku, ise yaamulengera era yaamugemerwa enaku yaamulumuukirira, yaamugwa mu kifuba, yaamunhwegera.

²¹ Omwana yaamukoba ati, ‘Lata, nayona mu maiso ga Katonda ni mu maiso go, tikaagwanira na kwetebwa mutabane wo.’

²² Aye ise yaakoba abagheereza be ati, ‘Muleete mangu ekivaalo ekisinga bukalamu mumuvaaze, mumuteeku empeta ku ngalo, mumuvaaze n'engaito.

²³ Muleete n'ente entototo eyo empiite era ensavu obukalamu, mugiite, tulye, tusagambe

²⁴ kuba mutabane wange ono yali afiire aye mperaano mulamu, yali yaghata aye aboneike.’ Era embaga yainhama.

²⁵ “Mu kiseera ekyo mutabane omukulu yali ali mu nimiro, era bwe yali aira ng'ali kumpi n'endhu yaawulira ekinhumo, ebivuga n'okukina.

²⁶ Agho yaayeta mulala ku bagheereza yaamubuuza ekigwiregho.

²⁷ Omugheereza yaamukoba ati, ‘Muke wo n'aize, era lata wo aise ente entototo empiite era ensavu obukalamu, kuba asangaire okumubona nga mulamu.’

²⁸ “Aye omulenzi omukulu yaanakughala era nga tayenda na kwingira. Kale ise yaafuluma yaamweghemba angire.

²⁹ Aye omulenzi yaakoba lata we ati, ‘Bona eno, emyaka kamaala nga nkugheereza era tikudheemerangaku mu by'ondagira, aye tompangaku waire akabuzi oti nsanhukeku ni bakagwa bange.

³⁰ Aye ono mutabane wo eyadiibuulira ebintu byo mu bamalaaya olwidhie, ng'omwitira ente entototo empiite era ensavu obukalamu!’

³¹ Ise yaamukoba ati, ‘Mwana wange iwe oli ninze buliidho, era ebyange byonabyona bibyo.

³² Tugwaine tusangaale era tusagambe, kuba muto wo ono yali afiire aye azuukire, yali yaghata aye aboneike.’ ”