Luka 14 - Baibuli Ekibono kya Katonda 2014

Yesu awonia omulwaire eyali azimbyezimbye

¹ Agho olwatuuka Yesu yaaja okulya ew'omukulu ow'Abafarisaayo mulala, baamulingirira inho.

² Mu maiso ge agho ghaaligho omusaadha eyali azimbyezimbye amakono n'amagulu.

³ Yesu yaabuuza Abeegeresa b'Amateeka n'Abafarisaayo ati: “Kiikirizibwa okuwonia ku lwa Sabbato oba bbe?”

⁴ Aye baasiriikirira. Yesu yaamugemaku yaamuwonia era yaamusiibula.

⁵ Era yaabakoba ati: “Naani ku imwe aba n'omwana we, oba n'ente ye n'egwa mu kidiba, ataja mangu ago kugisikayo ni bwe luba lwa Sabbato?”

⁶ Bino byabakaya okubiiramu.

Okwegeresa ku bageni n'abakyaza

⁷ Bwe yabona engeri abageni abeete ye baali bali kugwidhubaniramu ebifo eby'ekitiisa, yaabakobera olufumo luno:

⁸ “Omuntu yeenayeena bw'akwetanga ku mbaga tiweetyamyanga mu kifo kya kitiisa, tomanha bw'aba ng'ayeseeyo omuntu akusinga ekitiisa

⁹ ole eyabeeta mwembi n'aidha n'akukoba ati, ‘Viirayo ono mu kifo.’ Agho waatoolera okuswala ng'oli kufuna ekifo eky'einhuma.

¹⁰ Aye bwe bakwetanga ojanga waatyama mu kifo eky'einhuma, kale oyo eyakweta bw'atuuka, yaidha yaakukoba ati, ‘Mukagwa, seeta eno emberi’ olwo ni, olifuna ekitiisa mu boonaboona b'otyaime nabo.

¹¹ Kuba buli eyeetwala ati wa ghaigulu aja kwisibwa, ate buli eyeisa aja kutwalibwa nga wa ghaigulu.”

¹² Yaakoba era n'oyo eyamweta ati: “Bw'ofumbanga ekyomusana oba ekyeigulo toyetanga mikwano gyo, oba baganda bo, oba ab'ekika kyo, oba baliraanwa bo abakombe, kuba tomanha boona bwe bakweta n'osasulwa.

¹³ Aye bw'ofumbanga embaga, oyetanga abaavu, n'abateesobola, n'abalema, n'abatulu

¹⁴ olwo oliba wa nkabi, kuba bazira kye balikusasula olisasulwa ng'abatuufu bazuukira.”

Olufumo olw'embaga makeke

¹⁵ Olwawulira ebyo, mulala ku be yali nabo ku kiiwulo yaamukoba ati: “Nga wa nkabi oyo alirya ku mere mu Bwakyabazinga bwa Katonda!”

¹⁶ Yesu yaamukoba ati: “Ghaaligho omuntu eyafumba embaga makeke yaayeta abantu kamaala.

¹⁷ Ekiseera eky'embaga bwe kyatuuka, yaatuma omugheereza we aje akobe abo abeete baidhe, kuba okutegeka kwali kuwoire.

¹⁸ Aye boonaboona baakola n'ekirala baatoolera okwewolereza. Mulala yaakoba ati, ‘Nguze ekibandha, nteekwa okuja okukirambuula nkusaba onsonighe.’

¹⁹ Owundi yaakoba ati, ‘Naguze emiyimbo etaanu egy'ente edhirima era ndi kuja buti kudhigezesa, nkusaba onsonighe.’

²⁰ Owundi yaakoba ati, ‘Nabayiiza, kale tighanga kwidha.’

²¹ “Kale omugheereza yaira yaabikobera musengwa we. Agho mwenemu yaasungughala, era yaalagira omwiru we ati, ‘Ja mangu mu buguudo ni mu nguudo edh'ekibuga oleete abaavu, abateesobola, abatulu n'abalema.’

²² Omugheereza yaakoba ati, ‘Isebo ky'olagiire kikoleibwa aye era ghakaaligho ebifo.’

²³ Musengwa we kyeyava n'amulagira ati, ‘Ja mu nguudo enene ni mu ngira okake abantu okwidha, endhu yange eidhule.

²⁴ Aye ka mbakobere: Ghazira ku abo abaali beeteibwa anaakomba ku mbaga yange.’ ”

Omughendo ogw'okuba omwegeresebwa

²⁵ Ebiyindi eby'abantu byali biri kutambula ni Yesu. Yesu yaakyuka yaabakoba ati:

²⁶ “Omuntu yeenayeena bw'aidha ye ndi memale n'atakyagha ise, n'inhina, ni mukazi we, n'abaana be, ni baganda be, ni baanhina ate era n'obulamu bwe mwene, taghanga kuba mwegeresebwa wange.

²⁷ Era atabbeeda musalaba gwe n'annonereza tasobola kuba mwegeresebwa wange.

²⁸ “Naani ku imwe aba ayenze okuzimba enhumba ya bukomye, atasooka kutyama n'abalirira ebyetaagisa, n'abona oba ng'ali n'eby'okugimaliriza?

²⁹ Tomanha bw'ataagho musingi, ate n'atagimaliriza, boonaboona ababona ni batoolera okumusekerera,

³⁰ nga bakoba bati, ‘Omuntu ono yaatoolera okuzimba yaalemwa okumaliriza!’

³¹ “Oba, kyabazinga ki aba ng'aja okutabaala kyabazinga owundi, atasooka kutyama ni yeebuuza oba ng'asobola n'abantu omutwalo omulala okutabaala ole ali n'emitwalo ebiri?

³² Era bw'abona nga tasobola agheereza mangu obukwenda ng'ole akaali ghala yaamusaba baisanie.

³³ Kale ni, buli muntu ku imwe atayenda kuleka by'ali nabyo byonabyona, tasobola kuba mwegeresebwa wange.

Omuunhu omuwoire ensa

³⁴ “Omuunhu mulungi, aye omuunhu bwe guwaamu ensa, ogwizaamu otya ensa?

³⁵ Guba tigugasa waire itaka, waire okuba ekigimusa, bagusuula bwa ku luya. Ali n'amatu agawulira awulire!”