Luka 13 - Baibuli Ekibono kya Katonda 2014

Obuteenenia buleeta kuzikirira

¹ Mu kiseera ekyo ghaabaagho abaakobera Yesu ku Bagalilaaya, bale Pilato be yatabula omusaayi gwaibwe n'emisengo gyaibwe.

² Yesu yaabairamu ati: “Mudhuuba muti Abagalilaaya abo okudaazibwadaazibwa batyo, baali boonooni inho okusinga Abagalilaaya boonaboona?

³ Busa, ka mbakobere imwe mwena bwe muteenenia, muja kuzikirira mutyo.

⁴ “Oba abo eikumi n'omunaana, omunaala ogw'e Siloamu be gwagwaku ni gubaita. Mulowooza muti baali boonooni okusinga abantu boonaboona abaabanga mu Yerusalemu?

⁵ Busa, ka mbakobere: Mwena bwe muteenenia muja kuzikirira mutyo mwenamwena.”

Olufumo olw'omutiini ogutaayama

⁶ Yesu yaabafumira olufumo luno ati: “Ghaaligho omusaadha eyali n'omuti omutiini nga musimbe mu nimiro ye ey'emizabbibu. Yaaja ye guli okwagala ku bibala, aye tiyayagaanaku.

⁷ Yaakoba omukozi ow'omu nimiro eyo ati, ‘Bona eno, buti emyaka giigino esatu mbaire nga ndhagala ku muti guno ebibala aye nga tyagaanaku. Gutemegho, lwaki gumala eitaka ery'obwereere?’

⁸ Aye yaamwiramu ati, ‘Musengwa guleke n'omwaka guno gwona ntoodhetoodhegho okwezunguluza, nteegho n'obusa.

⁹ Tomanha bwe gwama ye bwidha; bwe kitaliba kityo, oligutemagho.’ ”

Yesu awonia ku Sabbato omukazi eyagogoma

¹⁰ Bwe yali ali kwegeresa mu sinagoga ndala, ku Sabbato,

¹¹ ghaabaagho omukazi eyaliku omuzimu ogwamulwaza okumala emyaka ikumi na munaana, nga gwamufunhamu tasobola kwemerera butereevu.

¹² Yesu bwe yamubona yaamweta yaamukoba ati: “Mukazi iwe! Obulwaire bwo buwonie.”

¹³ Yaamwisaaku emikono, era okutemya n'okuzibula ng'ayemerera butereevu, era yaagha Katonda ekitiisa.

¹⁴ Olw'okuba Yesu yamuwonia ku Sabbato, omukulu wa sinagoga, yaasungughala era yakoba ekikunsu eky'abantu ati: “Ghaligho enaku mukaaga emirimo kwe giteekwa okukolerwa, mwidhenga ku nnaku edho muwonezebwe, aye ti ku lwa Sabbato.”

¹⁵ Musengwa yaamwiramu ati: “Bakuusa imwe! Naani mu imwe, ku lwa Sabbato atasibula nte ye, oba ndogoyi ye mu kitabo n'agitwala kunhwa?

¹⁶ Kale tikigwaine omukazi ono mwidhukulu wa Aburahamu, Sitaani y'abaire asibye okumala emyaka eikumi n'omunaana, kusibululwa mu busibe obwo waire ku lwa Sabbato?”

¹⁷ Bwe yakoba ebyo abaali bamutakania baaswala ate abantu boonaboona baasagamba olw'eby'ekitiisa bye yali akola.

Olufumo olw'akamuuma ka kaladaali n'ekizimbulukusa

¹⁸ Agho yaakoba ati: “Obwakyabazinga bwa Katonda tunaabufaanania ki? Era tunaabugeza ku ki?

¹⁹ Buli oti kamuuma ka kaladaali omuntu ke yatoola n'akasimba mu nimiro ye, kaakula, kaafuuka muti, n'enhonhi edh'omu ibbanga dhaakola ebisu ku nsaga dhaagwo.”

²⁰ Era kabiri yaakoba ati: “Obwakyabazinga bwa Katonda nnaabufaanania ki?

²¹ Buli oti n'ekizimbulukusa omukazi kye yatoola n'atabula mu biibo bisatu eby'engaano, byonabyona ni bizimbulukuka.”

Omulyango omufunda

²² Yesu yaaja ng'abita mu bibuga ni mu byalo ng'ayegeresa, ng'alaga e Yerusalemu.

²³ Ghaabaagho eyamubuuza ati: “Musengwa ab'okulokolebwa n'abatono?” Yesu yaabakoba ati:

²⁴ “Mufube inho okungirira mu mulyango omufunda, kuba ka mbakobere abantu kamaala baligezaaku okungira aye tibalighanga.

²⁵ Mwenemu bw'alimala okusituka n'asibagho olwigi, imwe mulyemerera ku luya mwatoolera okukonkona ku lwigi nga mukoba muti, ‘Musengwa, twiguliregho.’ Alibairamu ati, ‘Tibaidhi! Muva gha?’

²⁶ Olwo mulitoolera okumukoba muti, ‘Watubonanga nga tulya era nga tunhwa, era wayegeresanga mu byalo byaife.’

²⁷ Aye alibakoba ati, ‘Nze tibaidhi, tiidhi ye muva! Munve ni mu maiso imwe abakozi ab'ebibi.’

²⁸ Ghalibaagho okulira n'okuluma emba, bwe mulibona Aburahamu ni Isaaka, ni Yakobo n'abalanzi boonaboona nga bali mu Bwakyabazinga bwa Katonda, ate nga imwe bababingira ku luya!

²⁹ Eriyo abaliva ku luuyi olw'e buvandhuba n'olw'e bugwandhuba abaliva ku luuyi olw'omukono omugooda olw'e buvandhuba ni ku luuyi olw'omukono omusaadha olw'e buvandhuba, baatyama ku mbaga mu Bwakyabazinga bwa Katonda.

³⁰ Ate bona, ghaligho ab'ensembo abaliba ababeri, era ghaabaagho ababeri abaliba ab'ensembo.”

Yesu nga bw'agonza Yerusalemu

³¹ Mu saawa yeene eyo ghaabaagho Abafarisaayo abaidha baamukoba bati: “Va ghano oje, kuba Herode ayenda kukwita.”

³² Yaabakoba ati: “Muje mukobe ekibe ekyo muti, ‘Ndi ghano ndi kubinga emizimu emibi, ndi kuwonia abalwaire, leero n'idho, ate ku lunaku olwokusatu mmalirize.’

³³ Nteekwa okutambula olugendo lwange olwaleero, n'idho, ni lule, kuba tikisoboka omulanzi okufiira aghatali mu Yerusalemu.

³⁴ “Yerusalemu, Yerusalemu iwe oita abalanzi n'abakwenda abakugheerezebwa n'obakuba amabaale! Ng'emikuzi kamaala neegomba okusoloza abaana bo aghalala ng'enkoko bw'ekola, aye nga toganha!

³⁵ Kale bona, endhu yaimwe esigaire bwereere etyo. Era ka mbakobere timuja kumbonaku okutuusa lwe mulikoba muti ‘Wa nkabi oyo aidha mu liina lya Musengwa.’ ”