Luka 12 - Baibuli Ekibono kya Katonda 2014

Okulabula ku buguya

¹ Mu kiseera ekyo abantu baali nga beesoloiza kamaala inho era nga bali na kuniinaganaku. Agho Yesu yaasookera ku Beegeresebwa be yaakoba ati: “Mweghale ekizimbulukusa eky'Abafarisaayo nkoba obuguya bwaibwe.

² Ezira kighembeibwaku kitalighembulwa, era n'ekigisiibwa ekitalimanhibwa.

³ Kale ebyo bye mwayogerera mu nzikiiza biryogerwa mu musana, ni bye mwagheegheetera mu kutu mu bisenge, birirangirirwa ghaigulu ku ndhu.

Agwaine okutiibwa

⁴ “Bakagwa, ka mbakobere: Mutatyanga abo abaita omubiri, ate ebyo oluwa baaba nga ghazira kyonakyona kye baghanga kukola.

⁵ Aye ka mbalabuleku: Mutye oyo ali n'obukumu obw'okwita n'okusuula mu geyeena. Bwenebwene mbakobera oyo ye mube mutye!

⁶ “Enkazaluya eitaanu tidhigula sente ibiri? Aye Katonda tasobola kwerabiraku waire ndala eti.

⁷ Ate oba n'omughendo ogw'enviiri edhiri ku mitwe gyaimwe Katonda agwidhi. Kale mutatyanga, muli ba mughendo okusinga enkazaluya ekyodo.

Okwatula Kurisito mu bantu

⁸ “Aye ka mbakobere: Oyo yeenayeena ayatula mu maiso ag'abantu ati wange, yeena Omwana w'Omuntu alimwatula mu maiso ga bamalaika ba Katonda

⁹ ate oyo aneegaana mu maiso ag'abantu yeena alyegaanibwa mu maiso ga bamalaika ba Katonda.

¹⁰ Era yeenayeena ayogera ekibono ekibi ku Mwana w'Omuntu, alisoniyibwa, aye oyo avuma Mwoyo Mutukuvu talisoniyibwa.

¹¹ “Ate bwe babatwalanga mu sinagoga ni mu bafuzi ni mu baami okubawozesa, muteraliikiriranga kya kwiramu oba kya kwogera

¹² kuba Mwoyo Mutukuvu alibeegeresa mu saawa yeene eyo kye mugwaine okwogera.”

Olufumo olw'omukombe omusiru

¹³ Agho ghaabaagho mulala ku bantu abaaligho yaamukoba ati: “Mwegeresa, koba muganda wange angabanie ku by'obusika bwaife.”

¹⁴ Aye Yesu yaamukoba ati: “Musaadha iwe, naani eyantaagho okubatawulula n'okubagabania ebyaimwe?”

¹⁵ Agho yaabakoba ati: “Mwegendereze era mweghale okululunkanira ebintu kwonakwona kuba obulamu obw'omuntu tibuli mu kuba na bintu ni bwe biba kamaala bitya.”

¹⁶ Agho yaabakobera olufumo luno ati: “Ghaaligho omuntu omukombe eyali n'enimiro edhaayama einho.

¹⁷ Kyeyava mule ni yeebuuza ati, ‘Nkole ntya, nga nzira ghe nsololeza birime byange?’

¹⁸ Yaakoba ati, ‘Kino kye nja okukola: ndidha kumenhagho ebyagi byange nzimbe ebisinga bino obunene, ntereke omwo emere yange n'eby'obukombe byange.

¹⁹ Era olwo nkobe omwoyo gwange nti: Mwoyo gwange, ofunie ebirungi kamaala, wuumula, olye, onhwe osagambe.’

²⁰ Aye Katonda yaamukoba ati, ‘Musiru iwe! Obwire bwaleero omwoyo gwo guja kukutoolebwaku, olwo ebyo by'otegeike bija kuba by'ani?’

²¹ “Atyo bw'aba ole eyeesololeza eby'obukombe eby'oku nsi ate nga mu bya Katonda ti mukombe.”

Okwesiga Katonda

²² Agho yaakoba Abeegeresebwa be ati: “Kale ka mbakobere muteraliikiriranga kya kulya, lwa bulamu bwaimwe, oba kya kuvaala olw'emibiri gyaimwe.

²³ Obulamu bwa mughendo okusinga emere, era n'omubiri gwa mughendo okusinga ebivaalo.

²⁴ Kale bw'odhuuba amakoova: Tigasiga waire okukungula, gazira kyagi waire eiterekero ery'ensambo eyindi lyonalyona, ate nga Katonda agafunisa emere. Aye imwe timuli ba mughendo okusinga enhonhi?

²⁵ Ye naani ku imwe, ni bwe yeeraliikirira atya, asobola okwongera waire akatono ku buleeyi bwe?

²⁶ Kale, oba nga waire ekitono kityo ghazira akighanga, memale lwaki mweraliikirira ebindi?

²⁷ Ate bw'olowooza ebimuli bya liri nga bwe bikula: Tibitakabana waire okuluka engoye aye nhenda okubakobera, waire Solomoni mu bitiisa bye byonabyona, tiyavaalanga n'ayaga waire n'ekimuli ekirala ku ebyo.

²⁸ Kale oba Katonda avaaza atyo eisubi obusubi eriba olwaleero mu nimiro ate enkyo ni lisuulibwa ku kikoomi memale mbo talisingagho kuvaaza imwe abali n'okwikiriza okutono?

²⁹ Imwe muteemalira ku kwagala kye munaalya ni kye munaanhwa waire okweraliikirira mu bidhuubo

³⁰ kuba ebyo abantu ab'ensi bye basiiba nga baagala aye imwe Lata waimwe aidhi nga mubyenda.

³¹ Imwe mwagale Obwakyabazinga bwe, n'ebyo byona biidha kubagheebwa.

³² “Mutatya imwe waire nga muli bwa byayo bitono biti, kuba Lata waimwe kyamusanhusa okubagha Obwakyabazinga.

³³ Mutunde ebyaimwe, mugabire abaavu, mwetungire ensawo edhitakairigha mufune n'obukombe obutawaagho mu igulu omwibi y'atatuuka waire ensiiriri okubwonoona.

³⁴ Kuba obukombe bwaimwe ghe buli n'omwoyo gwaimwe ghe guba.

Yesu ayegeresa ku kuba abagheereza abeetegefu

³⁵ “Mwesibe ensibiro, mukunaanie n'entaala dhaake.

³⁶ Mube ng'abagheereza abali kuteegerera musengwa waibwe okwira ng'ava ku kikuudhuko eky'okubayiza nga bw'atuuka n'akonkona ati bamwiguliragho mangu.

³⁷ Abagheereza abo nga ba nkabi, abo musengwa waibwe b'aliira n'ayagaana nga beetegefu. Bwenebwene ka mbakobere: Alyesiba, yaabatyamya ku kiiwulo, yaabita ng'abagheereza.

³⁸ Ni bw'aba ng'aidhie mu bwire ghagati oba nga buja kukya, n'abaagaana atyo, abagheereza abo ba nkabi!

³⁹ Mukiidhi bukalamu muti nguli mwenemu amanhanga esaawa omwibi y'anaidhiraku, yandimwagainenga nga yeetegeike, era tiyandiganhie mwibi kusima kituli mu ndhu ye.

⁴⁰ Mwena muteekwa okwetegeka kuba Omwana w'Omuntu aja kutuuka ku saawa ye mutamusuubiriraku.”

⁴¹ Agho Petero yaakoba ati: “Musengwa, olufumo olwo olufumiire ife oba bantu boonaboona?”

⁴² Musengwa yaakoba ati: “Omughanika omwesigwa era omwegendereza n'ali gha? N'oyo musengwa we y'akuumisa ab'omu maka ge n'okubaghanga emere yaibwe mu biseera ebituufu?

⁴³ Yeesiimye omugheereza oyo musengwa we bw'aliidha n'amwagaana ng'akola atyo.

⁴⁴ Bwenebwene ka mbakobere aja kumutaagho alabirire ebintu bye byonabyona.

⁴⁵ Aye omugheereza oyo bw'akoba mu mwoyo gwe ati, ‘Musengwa aidha kulwagho okutuuka,’ n'atoolera okukubakuba abairu abasaadha n'abakazi, n'alya era n'anhwa n'okutamiira n'atamiira,

⁴⁶ musengwa w'omugheereza oyo aliira ku lunaku lw'atamusuubiriraku era ku saawa y'ataidhi. Alimwegobaku yaamusindika mu badheemu.

⁴⁷ “Ate omugheereza amanha musengwa we by'ayenda n'atakola ntegeka, oba okukola nga musengwa we bw'ayenda, alikubwa emiigo kamaala.

⁴⁸ Aye oyo ataidhi, bw'akola ekimugwaniza okukubwa, alikubwa mitontono. Buli eyagheebwa ebingi era alibuuzibwa bingi era oyo eyateresebwa ebingi, alisingagho okubuuzibwa.”

Yesu aleeta okwawukana

⁴⁹ “Naidha kukunaania ku nsi muliro, ate nkaayenda ki oba nga gumaze okukunaana?

⁵⁰ Ndi n'okubatizibwa kwe nja okubatizibwamu, era kuunumya inho omwoyo, okutuusa lwe kulituukirizibwa.

⁵¹ Mudhuuba muti naidha kuleeta miraala ku nsi? Busa! Ka mbakobere: Kwawukana.

⁵² Kuba okuva ni mperaano abataanu mu ndhu baidha kwawukana, abasatu nga tibaisania n'ababiri, n'ababiri nga tibaisania n'abasatu.

⁵³ Ghalibaagho obutaisania: Lata w'omwana taliisania ni mutabane, n'omwana taliisania n'ise inhina w'omulenzi taliisania ni muka mutabane, n'omughala taliisania n'inhazaala we.”

Okutegeera ebiseera

⁵⁴ Agho Yesu yaakoba abantu ati: “Bwe mubona ekire nga kisituka ku luuyi olw'e bugwandhuba, mukoba muti ganaagwa, era bwe kiba.

⁵⁵ Ate bwe mubona empewo ng'eri kukunta okuva ku luuyi olw'e bugwandhuba nga weekubiireku ku luuyi olw'omukono omusaadha olw'e buvandhuba, mukoba muti, leero kanaayaka, era bwe kiba.

⁵⁶ Baguya imwe! Oba nga mwidhi okutuuka ku makulu ag'emboneka ey'ensi n'eigulu, mulemwa mutya okutuuka ku makulu ag'ebiseera bino?

Okwisania n'akughaghabira

⁵⁷ “Lwaki timwesaliragho imwe beene ekituufu?

⁵⁸ Bwe muba muja embuga n'akughaghabiire, gezaaku okwisania naye nga mukaali mu ngira, talwa kukukwekwebya n'akutuusa ya mulamuzi, omulamuzi n'akugemya mwisirukale, ate omwisirukale n'akuta mu ikomera.

⁵⁹ Ka nkukobere: Omwo tolivaamu okutuusa ng'omaze okusasula n'akasente akasembayo.”