Luka 11 - Baibuli Ekibono kya Katonda 2014

Yesu ayegeresa ku kusaba

¹ Olwatuuka, Yesu bwe yamala okusaba, ghaabaagho mulala ku Beegeresebwa be yaamukoba ati: “Musengwa, twegerese okusaba, ng'oti ni Yoanne bwe yayegeresa abeegeresebwa be.”

² Yesu yaabakoba ati: “Bwe mubanga musaba mukobanga muti, ‘Lata, Eriina lyo litiibwe, Obwakyabazinga bwo bwidhe.

³ Emere yaife eyabuliidho gitughenga buli lunaku.

⁴ Tusonighe ebibi byaife kuba ife beene tusonigha buli atukola obubi, era otatutwala mu kulebwa.’ ”

⁵ Agho yaabakoba ati: “Naani ku imwe aba ni mukagwa we, aja y'ali mu bwire ghagati n'amukoba ati, ‘Mukagwa, mpolaayo emigaati esatu,

⁶ kuba ghaligho mukagwa wange antuuseeku ng'ava mu lugendo, ate nzira kye mmugha.’

⁷ Memale ole n'aba mu ndhu n'amwiramu ati, ‘Tondaaza, tumaze okweigala, nze n'abaana bange twebwise ira, tisobola kusituka kwidha kukugha ky'oyenda.’

⁸ Ka mbakobere: Waire nga tasituka kumugha olw'okuba mukagwa we, asituka yaamugha kyonakyona ky'ayenda olw'okumudeeba.

⁹ “Kale nze mbakobera: Musabe muligheebwa mwagale mulizuula mukonkone ku lwigi muliigulirwagho.

¹⁰ Kuba buli asaba afuna, buli ayagala azuula era buli akonkona ku lwigi aliigulirwagho.

¹¹ Naani ku imwe balata b'abaana, agha omwana we omusota ng'amusabye ekyenhandha

¹² oba ng'amusabye eigi n'amugha siga?

¹³ Kale oba imwe, ababi, mwidhi okugha abaana baimwe ebirabo ebirungi, memale Lata waimwe ow'omu igulu! Talisingagho inho okugha Mwoyo Mutukuvu ababa bamusabye?”

Yesu ni Beelezebulu

¹⁴ Agho olwatuuka, Yesu yaabinga ku muntu omuzimu omubi, nga ni gukasiru. Omuzimu bwe gwamuvaaku, kasiru yaatoolera okwogera, era abantu kamaala beewuunhia inho.

¹⁵ Aye abandi baakoba bati: “Aghanga okubinga emizimu emibi ku bwa Beelezebulu, omukulu ow'emizimu emibi.”

¹⁶ Ate abandi nga bamuleba, baamusaba akamanhiso okuva mu igulu.

¹⁷ Aye Yesu bwe yamanha ebidhuubo byaibwe, yaabakoba ati: “Buli bwakyabazinga obwekutulakutulamu buzikirira, era ni bw'eba endhu esasika.

¹⁸ Kale ni oba Sitaani yeekutwiremu atyo, obwakyabazinga bwe bunaayemereragho butya? Kuba niimwe omukobye muti emizimu ngibinga ku bwa Beelezebulu.

¹⁹ Aye oba nga emizimu ngibinga ku bwa Beelezebulu, abaana baimwe bagibinga ku bw'ani? Kale abo n'abalibasalira omusango.

²⁰ Aye oba nga emizimu emibi ngibinga na bukumu bwa Katonda, agho ni Obwakyabazinga bwa Katonda butuuse mu imwe.

²¹ “Ow'amaani ng'ali n'eby'okulwanisa, bw'akuuma amaka ge ebintu bye biba miraala.

²² Aye amusinga amaani bw'amulumba n'amughangula, amutoolaku eby'okulwanisa bye yeesiga, era yaatoola n'ebintu by'amwagaana nabyo yaabigaba.

²³ Omuntu yeenayeena ataba ghalala ninze aba muzigu wange, ate oyo atasoloza ninze asansaania.

Omuzimu omubi bwe gwira

²⁴ “Omuzimu omubi bwe guva ku muntu ye gubangaku, guja nga gubita eyo mu bifo ebikalukalu nga gwagala agh'okuwuumulira. Bwe gulemwa, gukoba guti, ‘Ka neirireyo mu ndhu yange mwe nava.’

²⁵ Bwe gwira gujaagaana nga ndheye era ng'etegekeibwa bukalamu.

²⁶ Agho guja gwayeta emizimu giinaagwo egindi musanvu egigusinga obubi, nga gingira nga giba omwo era ku nkomerero obulamu bw'omuntu oyo buba bubi inho okusinga obwasooka.”

Abasinga okuba ab'enkabi

²⁷ Agho olwatuuka, Yesu bwe yali akaayogera ebyo, ghaabaagho omukazi mu bantu, yaayogerera ghaigulu ati: “Enda mwe wali ya nkabi, n'amabeere ge wayonka ga nkabi!”

²⁸ Aye Yesu yaakoba ati: “Abasinga okuba ab'enkabi n'abo abawulira ekibono kya Katonda ni bakigema.”

Okwenda akamanhiso

²⁹ Agho abantu kamaala bwe baaja nga beesololeza aghali Yesu, yaatoolera okwogera ye bali ng'akoba ati: “Abantu ab'oluse luno bantu babi benda akamanhiso aye ezira kamanhiso kaja kubagheebwa okutoolaku aka Yona.

³⁰ Kuba nga Yona bwe yaba akamanhiso eri ab'e Nineve, n'Omwana w'Omuntu bw'aidha okuba eri abantu ab'oluse luno.

³¹ Kyabazinga omukazi ow'e Sheba alisituka n'abantu ab'oluse luno ku lunaku olw'okusalirwaku omusango yaagubasalira okubasinga kuba yava ensi y'ekoma yaidha okuwulira amagezi ga Solomoni. Aye ate mubone, ali ghano n'asinga Solomoni.

³² Abantu ab'e Nineve balisituka n'abantu ab'oluse luno ku lunaku olw'okusalirwaku omusango baagubasalira kuba beene beenenia bwe baawulira okulamba kwa Yona aye ate mubone: ali ghano n'asinga Yona.”

Eitaala ery'omubiri

³³ “Ghazira akunaania itaala n'alita mu ziizi oba n'alifundikira mu kiibo. Ky'akola alita ku kikondo eky'eitaala, abangira baasobola okubona.

³⁴ Eriiso lyo liri ng'oti n'eitaala ery'omubiri gwo. Eriiso lyo bwe liba eiramu, omubiri gwo gwonagwona guba mutangaavu. Aye bweriba eifu, omubiri gwo gwona guba mu nzikiiza.

³⁵ Kale ni mwegendereze, tomanha ekimulika ekibalimu bwe kifuuka nzikiiza.

³⁶ Bwe kiba ni ng'omubiri gwo gwonagwona gutangaala, nga muzira kazikiiza koonakoona, gulitangaala gwakutangaaza ng'oti n'eitaala eryaka.”

Okunenia Abafarisaayo n'Abeegeresa b'amateeka

³⁷ Bwe yali akaayogera ghabaagho Omufarisaayo eyamweta ewuwe okulya naye, era yaaja yaatyama ku kiiwulo.

³⁸ Omufarisaayo kyamwewuunhisa inho okubona nga Yesu atyaime ku kiiwulo nga tanaabye.

³⁹ Aye Musengwa yaamukoba ati: “Imwe Abafarisaayo, muja mwatukuza ku ngulu okw'ekikopo n'esowaani ate nga munda mwaimwe mwidhwire obukambuzi n'obubi.

⁴⁰ Abasiru imwe, eyakola ku ngulu ti n'eyakola ni munda?

⁴¹ Ebiri munda mubigabirenga abaavu, era agho byonabyona lwe binaabanga ebirongoofu.

⁴² “Aye mukagwireku Abafarisaayo! Mugha ekitundu kirala kirala ku buli bitundu ikumi ebya kakubansiri na buli isubi, aye mwaloba kufaayo ku kukolera bantu ebibagwaniire ni ku kugonza Katonda! Ate nga bino muteekwa okubikola, aye ni bire obutabireka.

⁴³ “Mukagwireku Abafarisaayo! Kuba mwenda inho ebityamo eby'emberi mu sinagoga, n'okulamusibwa mu biya.

⁴⁴ Mukagwireku Abafarisaayo! Kuba muli oti magombe agataboneka, abantu kwe batambulira nga tibaidhi.”

⁴⁵ Agho mulala ku Banamateeka yaamukoba ati: “Mwegeresa, bw'okoba otyo, twena oba otuvumye.”

⁴⁶ Yesu yaakoba ati: “N'imwe mwena Abeegeresa b'Amateeka mukagwireku! Kuba mutwika abantu emigugu emizibu okwetwika, ate nga imwe beene timughanga kubagemeraku naire.

⁴⁷ Mukagwireku! Kuba muzimba amagombe ag'abalanzi ate nga badhaadha baimwe n'abaabaita.

⁴⁸ Kale mutyo mwakakalisa irala era mwaghagira ebikolwa bya badhaadha baimwe kuba abo baabaita ate imwe mwazimba amagombe gaibwe.

⁴⁹ Ni mu Magezi ga Katonda kikoba kiti, ‘Abandi balibakiriga n'abandi balibaita.’

⁵⁰ Kyova ab'oluse luno balibuuzibwa omusaayi ogw'abalanzi boonaboona gwe baafuka okuva ku kwinhama okw'ensi,

⁵¹ okuva ku musaayi gwa Abeli okutuuka ku musaayi gwa Zekaria eyaitirwa ghagati gh'alutaari n'eisinzizo. Bwenebwene nga bwe mbakobeire, ab'oluse luno balibuuzibwa omusaayi ogwo.

⁵² “Mukagwireku imwe Abeegeresa b'Amateeka, kuba mwatoolagho ekisumuluzo eky'okumanha! Imwe beene timwangira ate mwalobera n'abandingiire.”

⁵³ Bwe yali avaagho Abanamateeka n'Abafarisaayo baatoolera okumusokasoka n'okumubuuliriza ebintu kamaala

⁵⁴ nga bamutega bamugemye mu by'ayogera.